އައިފޯންގެ ސެޓެލައިޓް ކަވަރޭޖް ރަނގަޅު ކުރުމަށް އެޕަލްއިން ގްލޯބަލްސްޓާއަށް 1.5 ބިލިއަން ޑޮލަރު އިންވެސްޓްކުރަން ނިންމައިފިއެވެ.
ހުކުރު ދުވަހު ގްލޯބަލްސްޓާއިން، ރެގިއުލޭޓަރީ ފައިލިންއެއްގައި ހާމަކުރި ގޮތުގައި، އެޕަލްއިން އައިފޯނުގެ މުވާސަލާތީ ޚިދުމަތްތައް ފުޅާކުރުމަށް 1.5 ބިލިއަން ޑޮލަރާ ހަމައަށް އިންވެސްޓްކުރަން ވަނީ ނިންމައިފައެވެ.
މި ޚަބަރާ ގުޅިގެން ގްލޯބަލްސްޓާގެ ހިއްސާގެ އަގު 30 އިންސައްތަ މަތިވެފައިވާއިރު، އެޕަލްގެ ހިއްސާގެ އަގު 1.4 އިންސައްތަ ދަށަށް ގޮސްފައިވެއެވެ.
އެޕަލްގެ ހިއްސާގެ އަގު ދަށްވީ ކުރިއަށް އޮތް ކުއާޓަރުގައި އެ ކުންފުނީގެ އާމްދަނީ އިތުރުވާނެކަމަށް ލަފާކުރިތާ އެއް ދުވަސް ފަހުންނެވެ.
ފަންޑިން އެއްބަސްވުމުގެ ދަށުން، އެޕަލްއިން 1.1 ބިލިއަން ޑޮލަރުގެ ނަގުދު ފައިސާ ދޫކުރުމާއެކު، 400 މިލިއަން ޑޮލަރަށް ގްލޯބަލްސްޓާގެ 20 އިންސައްތަ ހިއްސާ ގަންނާނެއެވެ. ގްލޯބަލްސްޓާއިން ބުނާ ގޮތުގައި މި ފައިސާގެ ބައެއް ބޭނުންކުރާނީ ދަރަނި އަދާކުރުމަށެވެ.
މި މުޢާމަލާތަކީ ނެޓްވޯކް އެކްސެސް މަދު ސަރަޙައްދުތަކުގައި ތިބޭ ކަސްޓަމަރުންނަށް ސެޓެލައިޓް މެދުވެރިކޮށް ގުޅުން ފޯރުކޮށްދިނުމަށް ޓަކައި މޯބައިލް ސާވިސް ޕްރޮވައިޑަރުންނާއި ސްޕޭސް ކުންފުނިތަކުގެ މެދުގައި އުފައްދައިފައިވާ އިތުރު ޕާޓްނާޝިޕެކެވެ.
މީގެ އިތުރުން، ގްލޯބަލްސްޓާއިން އެ ކުންފުނީގެ ނެޓްވޯކް ކެޕޭސިޓީގެ 85 އިންސައްތަ އެޕަލްއަށް ކަނޑައަޅާނެ ކަމަށްވެސް ބުނެފައިވެއެވެ.
އެޕަލްއިން 2022 ވަނަ އަހަރު ގްލޯބަލްސްޓާއާއެކު ޕާޓްނާޝިޕެއް ހަދާފައިވަނީ އެޕަލްގެ ޔޫޒަރުންނަށް، އާބާދީ ކުޑަ ސަރަޙައްދުތަކުން ކުއްލި ނުރައްކަލުގެ މެސެޖު ފޮނުވޭނެ ފީޗާއެއް ތަޢާރަފުކުރުމަށެވެ.