ރާއްޖެއިން ބޭރުގައި ތިބޭ ދަރިވަރުންނަށް އެ މީހުންގެ ޑޮލަރު ލިމިޓު ބޮޑުކުރަން އެދެން ޚާއްސަކޮށްގެން ބޭންކް އޮފް މޯލްޑިވްސް (ބީއެމްއެލް)އިން ސްޓޫޑެންޓް ޕޯޓަލްގެ ނަމުގައި ޕޯޓަލްއެއް ތައާރަފުކޮށްފިއެވެ.
އެ ޕޯޓަލް މެދުވެރިކޮށް މިހާރު ބޭރުގައި ތިބި ދަރިވަރުންނަށް ޑޮލަރު ލިމިޓު ބޮޑުކުރަން އެދެވޭނެއެވެ.
ބީއެމްއެލްއިން ބުނީ، ޕޯޓަލް މެދުވެރިކޮށް ކާޑު ލިމިޓު ބޮޑުކުރަން އެދޭތާ އެއް ދުވަހުގެ ތެރޭގައި ދަރިވަރުންނަށް ލިމިޓު ބޮޑުކޮށްދޭނެ ކަމަށެވެ.
ޕޯޓަލްގައި ރަޖިސްޓްރީވުމަށް ދަރިވަރުގެ ޕާސްޕޯޓާއި ސްޓޫޑަންޑް ވިސާއާ ޔުނިވާސިޓީގެ އެންރޯލްމެންޓް ލެޓާ ބޭނުންވާނެއެވެ.
ކާޑު ލިމިޓު ބޮޑުކުރުމާ ބެހޭ އިތުރު މައުލޫމާތު ބީއެމްއެލްގެ ވެބްސައިޓުން ލިބޭނެއެވެ.
މި ފަހުން މިދިޔަ މަހު 23ގައި ބީއެމްްއެލުން ވަނީ ރާއްޖެއިން ބޭރުގައި ކިޔަވާ ދަރިވަރުންގެ ކާޑު ލިމިޓު 1،200 ޑޮލަރަށް ބޮޑުކޮށްފައެވެ. އެ އަދަދަށް ލިމިޓު ބޮޑުކުރަން ދަރިވަރުން އެދުމުން، ލިމިޓު ބޮޑުކުރެވުމާ އެކު ބީއެމްއެލްގެ މޯބައިލް އެޕްލިކޭޝަނަށް ނޮޓިފިކޭޝަން އަންނާނެއެވެ.
ބޭރުގައި ކިޔަވާ ދަރިވަރުންގެ ޑޮލަރު ލިމިޓް ކުރިން އޮތީ 750 ޑޮލަރާ ހަމައިގައެވެ. މި ބަދަލަކީ ފެބްރުއަރީ އެކަކުން ފެށިގެން ގެންނާނެ ކަމަށް ސަރުކާރުން މިދިޔަ ޑިސެމްބަރު މަހުގެ 25ގައި ހާމަކުރި ބަދަލެކެވެ. ނަަމަވެސް، ޑޮލަރުގެ ދަތިކަން ބޮޑުވެ، އެ ނިންމުން ތަންފީޒުކުރުން ލަސްވީއެވެ.
ރާއްޖެއިން ބޭރުގައި ކިޔަވާ ދަރިވަރުންނަށް ޑޮލަރު ލިމިޓް ބޮޑުކޮށްދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.