އާ އަހަރާ ދިމާކޮށް ރާއްޖޭގެ ބޭންކުތައް ބަންދުކުރަން ނިންމައިފިއެވެ.
މިއީ ކޮންމެ އާ އަހަރެއް ފެށުމާ ގުޅުވާ ބޭންކުތަކުން ނަގާ ބަންދެކެވެ.
ބެންކް އޮފް މޯލްޑިވްސް (ބީއެމްއެލް) އިން ނެރުނު ބަޔާނެއްގައި ބުނީ ޑިސެމްބަރު 30 ވަނަ ދުވަހުން ފެށިގެން ޖެނުއަރީ 5، 2025 އާ ހަމައަށް އެ ބޭންކުގެ މައި އޮފީހާއި، ސާވިސް ސެންޓަރުތަކާއި ބްރާންޗުތައް ބަންދުވާނެ ކަމަށެވެ.
އަދި މި ފަސް ދުވަހު އޮފީސްތައް ބަންދުވި ނަމަވެސް، އޭޓީއެމްތަކާއި އިންޓަނެޓު ބޭންކިން އަދި ކޯލް ސެންޓަރު މެދުވެރިކޮށް ކަސްޓަމަރުންނަށް ޚިދުމަތް ލިބޭނެ ކަމަށް ބީއެމްއެލް އިން ވަނީ ބުނެފައެވެ.
"ސަން" އަށް މައުލޫމާތު ދެމުން މޯލްޑިވްސް އިސްލާމިކް ބޭންކު (އެމްއައިބީ) އިން ބުނީ އެ ބޭންކު ވެސް އާ އަހަރަށް ބަންދުކުރާނެ ކަމަށެވެ. ނަމަވެސް އޮންލައިން ބޭންކިންގެ ޚިދުމަތްތައް ލިބޭނެ ކަމަށް އެ ބޭންކުން ބުންޏެވެ.
މީގެ ކުރިން ވެސް ކޮންމެ އާ އަހަރާ ދިމާކޮށް ބޭންކުތައް ބަންދު ކުރަނީ ބޭންކު އޮޑިޓް ކުރުމަށެވެ.
މަރުކަޒީ ބޭންކު، އެމްއެމްއޭ ވެސް އެ މުއްދަތުގައި ބަންދުވާނެއެވެ.