ބޭންކް އޮފް މޯލްޑިވްސް (ބީއެމްއެލް)އަށް ދިގު މުއްދަތަކަށް ޚިދުމަތް ކޮށްދެއްވާފައިވާ މުވައްޒަފުންގެ އަގު ވަޒަންކޮށް އެ މުވައްޒަފުންނަށް އެވޯޑުތައް ދީފިއެވެ.
މި އެވޯޑްތައް ހަވާލުކުރުމަށް ރޭ ބޭއްވި ހަފްލާގައި ބޭންކަށް 15 އަހަރާއި 20 އަހަރާއި 25 އަހަރާއި 30 އަދި 35 އަހަރުގެ މުއްދަތަކަށް ޚިދުމަތް ކޮށްދީފައިވާ 29 މުވައްޒަފުންނަށް ބީއެމްއެލްއިން ވަނީ އެވޯޑު ދީފައެވެ.
35 އަހަރަށް ބީއެމްއެލްއަށް ޚިދުމަތްކޮށް، އެވޯޑު ހާސިލްކުރި ބޭފުޅުން:
- ސްވިފްޓް ސާވިސް މެނޭޖަރު އަމްޝޫދާ ނަޢީމް
- ކަސްޓަމާ ސާވިސް މެނޭޖަރު އައިމިނަތު ނަސީމް
- ޗެކް ޕްރޮސެސިން މެނޭޖަރު އައިޝަތު ޝާދުނާ
ބީއެމްއެލްއަށް ދިގު މުއްދަތަކަށް ޚިދުމަތް ކުރި 29 މުވައްޒަފުންނަށް އެވޯޑު ދީފި --- ފޮޓޯ/ ބީއެމްއެލް
މީގެ އިތުރުން، އެ ބެންކަށް 30 އަހަރު ޚިދުމަތްކޮށް، ތިން ބޭފުޅަކު ވަނީ އެވޯޑު ހާސިލްކުރައްވާފައެވެ. އެ ބޭފުޅުންނަކީ ކަސްޓަމާ ސާވިސް އޮފިސަރު ފާޠިމަތު ޙުސައިންއާއި އެޖެންޓް ބޭންކިން މެނޭޖަރު ފާޠިމަތު މުޙައްމަދުގެ އިތުރުން ޗީފް ކޮމްޕަލަޔަންސް އޮފިސަރު މަރިޔަމް ޙަމީދެވެ.
އެވޯޑު ދިނުމަށް ބޭއްވި ރަސްމިއްޔާތުގައި ބީއެމްއެލްގެ މެނޭޖިން ޑިރެކްޓަރު މުޙައްމަދު ޝަރީފް ވަނީ އެ ބެންކަށް ދިގު މުއްދަތަކަށް ޚިދުމަތް ކޮށްދެއްވާފައިވާ މުވައްޒަފުންނަށް ޝުކުރު އަދާކުރައްވާފައެވެ.
ރާއްޖޭގެ އެންމެ ބޮޑު، އަދި ދިވެހިންނަށް އެންމެ ގިނަ ވަޒީފާގެ ފުރުސަތު ފަހިކޮށްދީފައިވާ ބޭންކަކީ ބީއެމްއެލް ކަމަށްވާއިރު، އެ ބެންކުގައި މިހާރު ވަޒީފާ އަދާކުރާ މުވައްޒަފުންގެ 99 ޕަސެންޓަށް ވުރެ ބޮޑު އިންސައްތައެއް ހިއްސާކުރަނީ ދިވެހީންނެވެ.
ބީއެމްއިލް އަންނަނީ އެ ބޭންކުގެ މުވައްޒަފުންނަށް ވަޒީފާގެ ފުރުސަތާއި މަސައްކަތަށް ބޭނުންވާ ތަމްރީނުތައްދީ، ވަޒީފާގެ ކުރިއެރުންތައް ފޯރުކޮށްދެމުންނެވެ.