ބޮލީވުޑްގެ މަޝްހޫރު ބަތަލާ ރަވީނާ ޓަންޑަންގެ ދަރިފުޅު ރަޝާ ތަޑާނީ ފިލްމު އިންޑަސްޓްރީއަށް ތައާރަފުވާ ފިލްމުގެ ނަމާ އެކު އޭގެ ޕޯސްޓަރު ދައްކާލައިފިއެވެ.
އަބީޝެކް ކަޕޫރު ޑައިރެކްޓްކޮށް ގެނެސްދޭ މި ފިލްމުގެ ނަމަކީ "އާޒާދު"އެވެ. މި އެޑްވެންޗާ ފިލްމުން ރަޝާ ތަޑާނީއާ އެކު އެކްޓަރު އަޖޭ ދޭވްގަންއަށް ބޮޑު ބޭބެ ކިޔަ އާމަން ދޭވްގަން ވެސް ފިލްމީ ދާއިރާއަށް ތައާރަފުވާނެއެވެ.
ހަމައެއާއެކު ފިލްމުގެ ވަރަށް މުހިއްމު ރޯލެއް އަޖޭ ދޭވްގަން ވެސް ކުޅޭ ގޮތަށް ވަނީ ހަމަޖެހިފައެވެ. މީގެއިތުރުން ފިލްމު "ކޮކްޓެއިލް"އިން ބޮޑު މަގުބޫލު ކަމެއް ހޯދި ބަތަލާ ޑަޔާން ޕެންޓީ ވެސް ފިލްމުގެ ހާއްސަ ރޯލަކުން ބެލުންތެރިންނަށް ފެންނާނެއެވެ.
ފިލްމު "އާޒާދު"ގެ ޕޯސްޓަރެއް--ފޮޓޯ/ބަޮލީވުޑްހަންގާމާ
މި ފިލްމުގެ ޓީޒާއެއް މާދަމާ ރިލީޒް ކުރާ ދެ ފިލްމު "ބޫލް ބުލައްޔާ 3" އަދި "ސިންގްހަމް އަގެއިން" ބަލާލަން ތިއޭޓަރަށް ދާ ގިނަ ބަޔަކަށް ފެންނާނެ ކަމަށް ރިޕޯޓުތައް ބުނެއެވެ. މި ފިލްމުގެ ޑައިރެކްޓަރު އަބީޝެކް ކަޕޫރުގެ ފާހަގަކޮށްލެވޭ ފިލްމުތަކުގެ ތެރޭ "ކައި ޕޯޗޭ"، "ކެދަރުނާތު"، "ރޮކް އޮން" އަދި "ޗަންދިގަރު ކަރޭ އާޝިޤީ" ހިމެނެއެވެ.
އަންނަ އަހަރުގެ ޖަނަވަރީ މަހު ރިލީޒް ކުރުމަށް ތާވަލު ކުރެވިފައިވާ މި ފިލްމުން އިންޑަސްޓްރީއަށް ތައާރަފުވާ ރަޝާ އާއި އާމަން އަކީ އަންނަ އަހަރު އިންޑަސްޓްރީއަށް ތައާރަފު ވާނެ އެންމެ އުންމީދީ ތަރިން ކަމަށް ރިޕޯޓުތައް ބުނެއެވެ.
ރަޝާއާ އެކު އަޖޭއަށް ބޮޑު ބޭބެ ކިޔާ އާމަން އިންޑަސްޓްރީއަށް ނުކުންނަން ތައްޔާރުވެފައި ވާއިރު ފާހަގަކޮށްލެވޭ ކަމަކީ ރަޝާގެ މަންމަ ބަތަލާ ރަވީނާގެ ކެރިއަރުގެ ކުރީކޮޅު ވަރަށް ގިނަ ފިލްމުތައް އަޖޭއާ އެކު ކުޅެފައިވާ ކަމެވެ.