އޮންލައިންކޮށް ޖުވާކުޅުން، ނުވަތަ "އޮންލައިން ބެޓިން" ރާއްޖޭގައި ހުއްޓުވުމަށް ޓަކައި ގާނޫނަށް އިސްލާހުތައް ގެންނަވާނެ ކަމަށް ބަންޑާރަނައިބު އަޙުމަދު އުޝާމް މިއަދު ވިދާޅުވެއްޖެއެވެ.
އޮންލައިންކޮށް ޖުވާކުޅުމުގެ މައްސަލަ ބޮޑުވެފައިވަނިކޮށް، ޖުލައިމަހުގެ ތެރޭގައި ފުލުހުން ވަނީ އެ ފަދަ ހަތަރުވަރަކަށް ސައިޓު ބްލޮކް ކުރަން ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)އަށް ހުށަހަޅައިފައެވެ. އެއާ އެކު އޭރު ބައެއް ސައިޓުތައް ބްލޮކް ވެސް ކުރިއެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވީ ފުޅާ ދާއިރާއެއްގައި އޮންލައިންކޮށް ޖުވާ ކުޅުން ރާއްޖޭގައި އާންމުވެފައިވާކަން ފާހަގަކުރެވިފައިވާ ކަމަށެވެ. އެ ކަން ހުއްޓުވުމަށް ޓަކައި ގާނޫނަށް އަދި މިހާތަނަށް އިސްލާހެއް ހުށަހަޅާފައެއް ނެތެވެ.
އެހެން ނަމަވެސް ޖުވާކުޅުން ހުއްޓުވުމަށް ޓަކައި ގާނޫނު އިސްލާހުކުރުމުގެ މަޝްވަރާތައް ސަރުކާރުގެ ތެރޭގައި ކުރެވެމުންދާ ކަމަށް އޭނާ ވިދާޅުވިއެވެ. އަދި އެއީ ގާނޫނަށް އިސްލާހު ގެނެސްގެން ހައްލުކުރަންޖެހޭ މައްސަލައެއް ކަމަށާއި، އެ އިސްލާހުތައް ގެންނާނެ ކަމަށް އުޝާމް ވަނީ ވިދާޅުވެފައެވެ.
އޮންލައިންކޮށް ޖުވާ ކުޅެ، ރާއްޖޭގައި ބައެއް މީހުން ގިނަ އަދަދެއްގެ ފައިސާ ވެސް ހޯދައެވެ.