މިއަދާ ހަމައަށް މަސްވެރިންނަށް ނުދެވި ހުރި ހުރިހާ ފައިސާއެއް މަސްވެރިންނަށް ދޭން ސަރުކާރުގެ މަސް ކުންފުނި، މިފްކޯއާ ހަވާލުކޮށްފައިވާ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
މަސް ކިރުމަށް ފަހު މިހާތަނަށް ނުދެވި ޕެންޑިން ޕޭމަންޓުތަކުގެ ގޮތުގައި ނުވަ މިލިއަން ރުފިޔާ އެބައޮތް ކަމަށާއި، މި ވަގުތު ފައިސާ ދޭނެ ގޮތެއް އަދި ނެތް ކަމަށް ސަރުކާރުގެ މަސް ކުންފުނި މިފްކޯއިން ވަނީ މީގެ ކުރިން ބުނެފައެވެ. އެއީ, 331 ދޯންޏަކަށް ދޭންޖެހޭ ފައިސާގެ އަދަދެވެ.
އެ ކަމާ ގުޅުވައި ދެންމެ ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މިއަދާ ހަމައަށް މަސްވެރިންނަށް ނުދެވި ހުރި ޕޭމަންޓުތަކަށްވާ ޖުމުލަ ފައިސާ އެ ފަރާތްތަކަަށް ރައްދުކުރުމަށް މިފްކޯއާ ހަވާލުކޮށްފައިވާ ކަމަށެވެ.
މަސްވެރިން މަސްބާނައިގެން އައިސް މާރުކޭޓް ސަރަހައްދުގައި ދޯނުތަކުގައި ތިބެގެން މަސް ވިއްކުމުގެ މަސައްކަތުގައި -- ސަން ފޮޓޯ/ ފަޔާޒު މޫސާ
މީގެ އިތުރުން، މެނިފެސްޓޯގައިވާ ގޮތަށް 48 ގަޑިއިރު ތެރޭ ފައިސާ ދެވޭނެ ނިޒާމު ގާއިމުކުރުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވިއެވެ.
މިފްކޯގެ ތަފާސްހިސާބުތަކުން ދައްކާ ގޮތުން މިދިޔަ އަހަރުގެ ނޮވެމްބަރު 17 އިން މި އަހަރުގެ ސެޕްޓެމްބަރު މަހާ ހަމައަށް ދިޔައިރު ކުންފުނިން ވަނީ މަސްވެރިންނަށް ނުދެވި ހުރި ފައިސާގެ ތެރެއިން 862.3 މިލިއަން ރުފިޔާ ދައްކައިފައެވެ.
ނުދެވި ހުރި ފައިސާ ޖުމްލަ އަދަދުގެ ތެރެއިން 3.5 މިލިއަން ރުފިޔާއަކީ ފެލިވަރަށް ކިރި މަހުން ދައްކަންޖެހޭ ފައިސާއެވެ. އަދި، 5.4 މިލިއަން ރުފިޔާއަކީ ކޫއްޑޫއަށް މަސް ކިރައި، މިފްކޯއިން ދޭން ޖެހިފައިވާ އަދަދެވެ. އަދި، 113،171.90 ރުފިޔާއަކީ އައްޑުއަށް މަސް ކިރުމުން ދޭންހުރި ފައިސާއެވެ.
މިފްކޯއިން އޭރު ބުނީ، ދުވަސްވަރަކީ މަސްވެރިކަން ދަށް ދުވަސްވަރެއް ކަމަށްވުމާ އެކު ކުންފުނީގެ މާލީ ހާލަތު ވެސް އޮތީ ވަރަށް ދަށްކޮށް ކަމަށެވެ. އަދި، އެ ކަމަށް ސަރުކާރާ އެކު މަޝްވަރާކޮށް ގޮތެއް ހޯދުމަށް މަސައްކަތްކުރަމުން އަންނަ ކަމަށް ބުނެފައިވެއެވެ.