އައްޑޫ ފިޝަރީޒް ކޮމްޕްލެކްސް ތަރައްގީކުރުމަށްޓަކައި ބޭނުންވާ ފައިސާ މިހާރު ހަމަޖެހިއްޖެ ކަމަށާއި އަންނަ އަހަރުގެ ކުރީކޮޅު އެ މަސައްކަތް ފަށާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.
މިއަދުގެ މަޖިލީހުގެ ޖަލްސާގައި އިދިކޮޅު އެމްޑީޕީއަށް ނިސްބަތްވާ މަރަދޫ ދާއިރާގެ މެންބަރު އަހުމަދު ދީދީ ވަނީ އައްޑޫ ފިޝަރީޒް ކޮމްޕްލެކްސްގެ ކެޕޭސިޓީ ބޮޑުކުރުމަކީ މި ސަރުކާރުގެ ވައުދެއް ކަމަށާއި މަސްވެރިން އެކަމަށް ވަރަށް ބޮޑަށް ބޭނުންވެފައިވާ ކަމެއް ކަމަށް ވިދާޅުވެފައެވެ. އަދި އެ މަސައްކަތް ފެށޭނޯ ކޮން ތާރީޚެއްގައިތޯ މެންބަރު ވަނީ ސުވާލުކުރައްވާފައެވެ.
އެ ސުވާލަށް ޖަވާބުދެއްވާ މިނިސްޓަރު ޝިޔާމް ވިދާޅުވީ އެ މަސައްކަތަށް ބޭނުންވާ ފައިސާ މިހާރު ހަމަޖެހިފައިވާ ކަމަށެވެ. އަދި އަންނަ އަހަރު ކުރީކޮޅު އެ މަސައްކަތް ފަށައި، 2026 ވަނަ އަހަރުގެ ކުރީކޮޅަށް ނިންމާލެވޭނެ ކަމަށް ޝިޔާމް ވިދާޅުވިއެވެ.
އައްޑޫ ފިޝަރީޒް ކޮމްޕްލެކްސްގައި 1،500 ޓަނުގެ ސްޓޯރޭޖާއި ބްރައިން ފްރީޒިން ކެޕޭސިޓީގެ ގޮތުގައި 50 ޓަނު މިހާރު އެބަހުރި ކަމަށް ޝިޔާމް ވިދާޅުވިއެވެ. ނަމަވެސް އެ ކޮމްޕްލެކްސް ތަރައްގީކޮށް ނިމުމުން، 2،500 ޓަނުގެ ކެޕޭސިޓީ އިތުރު ކުރެވޭނެ ކަމަށް ޝިޔާމް ވިދާޅުވިއެވެ.
...މަސް ފިނިކޮށް ރައްކާ ކުރުމަށްޓަކައި އިތުރު 1،000 ޓަނާއެކީގައި އިތުރު 50 ޓަނުގެ ބްރައިން ފްރީޒިންއާއެކީގައި އަޅުގަނޑުމެންނަށް އިރާދަކުރެއްވިއްޔާ މިތަނުގެ ކެޕޭސިޓީ 2،500 އަށް އިތުރު ކުރެވިގެން ދާނެ، ފިޝަރީޒް މިނިސްޓަރު އަހުމަދު ޝިޔާމް
އައްޑޫގެ ފިޝަރީޒް ކޮމްޕްލެކްސް ތަރައްގީކުރުމަކީ މިދިޔަ ސަރުކާރުގައި އެ މަސައްކަތް ފަށާނެ ކަމަށް އެތައް ފަހަރަކު ބުނެ ވެސް ފަށާފައި ނުވާ މަސައްކަތެއްކަން ފާހަގަކުރައްވާ ޝިޔާމް ވިދާޅުވީ މި ސަރުކާރުން އެ މަސައްކަތް ވެސް ކުރިއަށްގެންދާނެ ކަމަށެވެ.
މަސްވެރިންނަށް ފައިސާ ދޫނުކޮށްގެން މިއަހަރުގެ ކުރީކޮޅު އައްޑޫ ފިޝަރީޒް ކޮމްޕްލެކްސްގައި ވަނީ ކަރަންޓު ކަނޑާލައި މުޒާހަރާ ވެސް ކޮށްފައެވެ. އޭގެ ފަހުގައި އެތަނުގެ މަސައްކަތްތައް އޮތީ ހުއްޓުމަކަށް އައިސްފައެވެ.