އިންޑިއާގެ ސިކުން ހިންގާ ވަކިވެގަތުމުގެ ހަރަކާތަށް ތާއީދުކުރާ ހަރުދީޕް ސިންގް ނިޖާރް ކެނެޑާގައި މިދިޔަ އަހަރު މަރާލި މައްސަލައިގައި، އިންޑިއާގެ ބޮޑު ވަޒީރު ނަރެންދްރާ މޯދީގެ އަރިސް ވަޒީރަކަށް ކެނެޑާއިން ތުހުމަތުކޮށްފިއެވެ.
ކެނެޑާގެ ޚާރިޖީ ވަޒީރު ޑޭވިޑް މޮރިސަން ވިދާޅުވީ އިންޑިއާގެ ކެބިނެޓް ވަޒީރެއް އަދި ބޮޑުވަޒީރުގެ ގާތް މުޝީރަކު ކެނެޑާގެ ރައްޔިތުންގެ ޖާސޫސީ މައުލޫމާތު އެއްކުރުމުގެ އޮޕަރޭޝަންތައް ހިންގުމަށް އަމުރުކުރި ކަމަށެވެ.
ވޮޝިންޓަން ޕޯސްޓުން މީގެ ކުރިން ރިޕޯޓްކޮށްފައިވާ ގޮތުގައި ކެނެޑާގައި ސިކުން ވަކިވެގަތުމަށް އަމާޒުކޮށްގެން ހިންގާ އަނިޔާވެރިކަމާއި ބިރުދެއްކުމުގެ ކެމްޕޭނެއްގެ ފަހަތުގައި ހުންނެވީ އިންޑިއާގެ ދާޚިލީ ވަޒީރު އަމިތު ޝާހު ކަމަށް ކެނެޑާއިން ތުހުމަތުކުރެއެވެ. މޮރިސަން ވަނީ އެކަން ކަށަވަރުކޮށްދީފައެވެ.
ކެނެޑާގެ ބޮޑު ވަޒީރުގެ ގައުމީ ސަލާމަތާ ބެހޭ މުޝީރު ނަތަލީ ޑްރޮއިން އަންގާރަ ދުވަހު ވިދާޅުވީ އިންޑިއާ ސަރުކާރުން، ފުރަތަމަ ކެނެޑާގައި ތިބި އިންޑިއާގެ ރައްޔިތުންނާއި ކެނެޑާގެ ރައްޔިތުންނާ ބެހޭ މައުލޫމާތު އެއްކުރި ހެކިތައް ކެނެޑާއަށް ލިބިފައިވާ ކަމަށެވެ.
އޭގެފަހުން އެ މައުލޫމާތު އިންޑިއާ ސަރުކާރަށް ފޯރުކޮށްދިނީ ލޯރެންސް ބިޝްނޯއީއާ ގުޅުން ހުރި ޖިނާއީ ނެޓްވޯކަކާ ގުޅިގެން ކަމަށް ތުހުމަތު ކުރެވޭ ކަމަށްވެސް ނަތަލީ ވިދާޅުވިއެވެ.
ބިޝްނޯއީ މިހާރު އިންޑިއާގެ ޖަލުގައި ހުރި ނަމަވެސް ނަތަލީ ވިދާޅުވީ، އޭނާގެ ފުޅާ ޖިނާއީ ނެޓްވޯކަކީ ކެނެޑާގައި މީހުން މެރުމާއި، މެރުމަށް ރޭވުމާއި، ބާރުގެ ބޭނުންކޮށްގެން މަޖުބޫރުން ކަންތައްތަ ކުރުވުމާއި، އެހެނިހެން އަނިޔާވެރި ޖަރީމާތަކާ ގުޅުން ހުރި ނެޓްވޯކެއް ކަމަށެވެ.
ނަތަލީ ވިދާޅުވީ އިންޑިއާގެ ޑިޕްލޮމެޓުންނަކީ ޖިނާއީ ތަހުގީގުތަކުގައި ތުހުމަތުވާ ބައެއް ކަމަށް، ރޯޔަލް ކެނޭޑިއަން މައުންޓް ޕޮލިސް (އާރުސީއެމްޕީ)އިން އާންމުކޮށް އިއުލާނު ކުރުމުގެ ކުރިން ޖަވާބުދާރީވުން ކަށަވަރު ކުރުމަށް އިންޑިއާ ސަރުކާރުގެ އެއްބާރުލުން ހޯދުމަށް މަސައްކަތް ކުރި ކަމަށެވެ. އެގޮތުން މީގެ ދެ ދުވަސް ކުރިން ސިންގަޕޫރުގައި މޯދީގެ ގައުމީ ސަލާމަތާ ބެހޭ މުޝީރު އަޖިތު ދޯވަލްއާ އެކު ބައްދަލުވުމެއް ބާއްވާފައިވާ ކަމަށް ވިދާޅުވިއެވެ.
ނަމަވެސް އެކަން އިއުލާނުކުރަން ނިންމީ އިންޑިއާ ސަރުކާރުގެ އެއްބާރުލުން ކެނެޑާއަށް ނުދޭނެކަން ސާފުވުމުން ކަމަށް ނަތާލީ ވިދާޅުވިއެވެ.
އިންޑިއާ ސަރުކާރުން ވަނީ އެ ތުހުމަތުތައް ދޮގުކޮށް، ކެނެޑާގައި ތިބި އެ ގައުމުގެ ހަ ޑިޕްލޮމެޓުން އަނބުރާ ގައުމަށް ގެނެސްފައެވެ.
ބްރިޓިޝް ކޮލަމްބިއާގައި ހަރުދީޕް ސިންގް ނިޖާރު މަރާލި މައްސަލައިގައި އިންޑިއާ ސަރުކާރުގެ އެޖެންޓުން ބައިވެރިވި ކަމަށް އިތުބާރު ހުރި ހެކިތަކެއް ލިބިފައިވާ ކަމަށް މިދިޔަ އަހަރު ޖޫން މަހު ކެނަޑާގެ ބޮޑުވަޒީރު ޖަސްޓިން ޓްރޫޑޯ ވަނީ ވިދާޅުވެފައެވެ.
އޭގެ ފަހުން މި އަހަރުގެ އޮކްޓޯބަރު 14 ވަނަ ދުވަހު ކެނެޑާއިން ވަނީ އެކްޓިވިސްޓް މަރުވި މައްސަލައިގައި ތުހުމަތުވާ ކަމަށް ބުނެ އިންޑިއާގެ ހައިކޮމިޝަނަރާއި އިތުރު ފަސް ޑިޕްލޮމެޓުން ވަކިކޮށްފައެވެ.
ސިކުންނަށް ވަކި ދައުލަތެއް އުފައްދަން ހިންގާ "ޚާލިސްތާން" ކެމްޕެއިނަށް ތާއީދުކުރާ ސިކުންގެ މީހެއް ކަމަށްވާ ނީޖާރް މަރާލާފައި ވަނީ މިދިޔަ އަހަރު ޖޫން މަހު ސިކުންގެ ފައްޅިއެއްގެ ބޭރުގައެވެ. އެކަމުގެ އަޑީގައި ތިބީ އިންޑިއާގެ ޖާސޫސުން ކަމަށް ކެނެޑާއިން ތުހުމަތުކުރެއެވެ.
ކެނެޑާއަށް 1997 ވަނަ އަހަރު ހިޖުރަކޮށް، 2015 ވަނަ އަހަރު އެ ގައުމުގެ ރައްޔިތަކަށްވި ނީޖާރަކީ ޓެރަރިޒަމާއި މީހުން މެރުމަށް ރޭވުމުގެ ތުހުމަތުގައި އިންޑިއާގެ އިދާރާތަކުން ހޯދަމުންދިޔަ މީހެކެވެ.
ނީޖާރު މަރާލި މައްސަލައިގެ ތަހުގީގަށްފަހު ހާމަ ކުރި ކަންކަމާ ގުޅިގެން އިންޑިއާއި ކެނެޑާގެ ގުޅުން ވަނީ ގޯސްވެފައެވެ.