އެންޓި ކޮރަޕްޝަން ކޮމިޝަން (އޭސީސީ)އިން ބަލަމުންދާ ކޮރަޕްޝަނުގެ މައްސަލައަކާ ގުޅިގެން ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ ޕާސްޕޯޓު ހިފަހައްޓައިފިއެވެ.
އޭސީސީގެ އޮފިޝަލަކު ވަނީ "ސަން"އަށް މިކަން ކަށަވަރުކޮށްދީފައެވެ. އޭނާ ވިދާޅުވި ގޮތުގައި ސައީދުގެ ޕާސްޕޯޓު ހިފެހެއްޓީ މި މަހުގެ ނުވަވަނަ ދުވަހުގައެވެ. ނަމަވެސް މި މައްސަލަ ބަލަމުންދާތީ އިތުރު މައުލޫމާތު ދެވެން ނެތް ކަމަށް އޮފިޝަލް ވަނީ ވިދާޅުވެފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ފެނަކައިގައި ކޮރަޕްޝަންގެ ބޮޑެތި އަމަލުތަކެއް ހިންގާފައިވާ ކަމަށް ތުހުމަތުކޮށް، އެ މައްސަލަތައް މި ސަރުކާރުން ވަނީ އޭސީސީއަށް ހުށަހަޅައިފައެވެ.
އެ ގޮތުން ފެނަކައިގެ ކުރީގެ މެނޭޖްމަންޓާ ގުޅޭ ކޮރަޕްޝަނުގެ 25 މައްސަލައެއް އޭސީސީއަށް ހުށަހަޅާފައިވާ ކަމަށް، އެ ކުންފުނީގެ މިހާރުގެ އެމްޑީ، މުއާޒް މުހައްމަދު ރަޝީދުވަނީ މިދިޔަ އޮގަސްޓުމަހު ވިދާޅުވެފައެވެ.
މި ސަރުކާރުން ވެރިކަމާ ހަވާލުވީ ފެނަކައަކީ "ކޮރަޕްޝަންގެ ހާއްޔެއް"ގެ ގޮތުގައި ސިފަކުރަމުންނެވެ. އަދި އެ ކުންފުނި އޮތީ 1.7 ބިލިއަން ރުފިޔާއިން ދަރުވާލާފައި ކަމަށް ފެނަކައިން ވަނީ މީގެ ކުރިން ބުނެފައެވެ.
ނަމަވެސް މި ވެރިކަމަށް ހަތް މަސް ދުވަސްތެރޭ ފެނަކައިގެ ދަރަނީގެ ގޮތުގައި ހުރި ފައިސާގެ ތެރެއިން 300 މިލިއަން ރުފިޔާ ދައްކައިފައިވާ ކަމަށް އެ ކުންފުނިން ވަނީ ބުނެފައެވެ. އަދި ފައިސާ ދޫކޮށް ޚަލާސްކުރި ފަރާތްތަކުގެ ތެރޭގައި 278 ވެންޑަރުން ހިމެނޭ ކަމަށް ވަނީ ބުނެފައެވެ.
މީގެ އިތުރުން ގެއްލުމުގައި ހިންގަމުން އައި އެ ކުންފުންޏަށް މި އަހަރުގެ ދެވަނަ ކުއާޓަރުގައި ހަތް މިލިއަން ރުފިޔާގެ ފައިދާއެއް ވެފައިވާ ކަމަށް ވެސް ފެނަކައިން ބުނެފައިވެއެވެ.