ދުނިޔޭގެ އެކި ގައުމުތަކުން ވާދަކޮށް، ރީތީގެ ރާނީ ހޮވުމަށް ބާއްވާ މިސް ޔުނިވާސްގައި ފުރަތަމަ ފަހަރަށް ރާއްޖެއިން ބައިވެރިވެއްޖެއެވެ.
މި މުބާރާތުގައި ރާއްޖެ ތަމްސީލުކުރާނީ އުމުރުން 21 އަހަރުގެ މޮޑެލް، މަރިޔަމް ޝައިނާ ނަސީމެވެ.
މިއަހަރުގެ މިސް ޔުނިވާސް މުބާރާތް ބޭއްވުމަށް ހަމަޖެހިފައި ވަނީ މެކްސިކޯގައެވެ. މުބާރާތް އަންނަ މަހުގެ 14ވަނަ ދުވަހު ފަށާއިރު ފައިނަލް ޝޯ ބާއްވަނީ އަންނަ މަހުގެ 16ވަނަ ދުވަހެވެ.
އިންޑިއާގައި ހުންނަ މެކްސިކޯގެ އެމްބަސީން މިއަދު ކުރި ޓްވީޓެއްގައި ވަނީ، މި މުބަރާތުގައި ބައިވެރިވެ، މެކްސިކޯއަށް ދިއުމަށް ޝައިނާއަށް ވިސާ ހަމަޖައްސައިދީފައި ވާކަމަށެވެ.
މެކްސިކޯއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ޑިއޭގޯ ޕެރެޒް ވަނީ ޝައިނައާ ބައްދަލުކުރައްވައި، ކާމިޔާބު ލިބޭނެ ކަމަށް އުއްމީދުކުރައްވާ ކަމަށް ވިދާޅުވެފައެވެ.
މީގެ ކުރިން ޝައިނާ ވަނީ ރާއްޖޭގައި ބޭއްވި ޓޮޕް މޮޑެލް މޯލްޑިވްސް 2022ގައި ބައިވެރިވެ، އެ މުބާރާތް ކާމިޔާބުކޮށްފައެވެ. އަދި މިދިޔަ އަހަރު މިސްރުގައި ބޭއްވި ޓޮޕް މޮޑެލް އޮފް ދަ ވޯލްޑް 2023 މުބާރާތުގައި ވެސް އޭނާ ބައިވެރިވެ ރާއްޖެ ތަމްސީލުކޮށްފައިވެއެވެ.
މިސް ޔުނިވާސްގައި ރާއްޖެ ތަމްސީލުކުރާ ޝައިނާ --
މިއަހަރުގެ މިސް ޔުނިވާސް މުބާރާތުގައި 130 ގައުމަކުން ބައިވެރިވެއެވެ. ރާއްޖޭގެ އިތުރުން މި މުބާރާތުގައި އަލަށް ބައިވެރިވާ ގައުމުތަކުގެ ތެރޭގައި، ސޯމާލިއާ، ބެލަރޫސް، އިރާން، އުޒްބަކިސްތާން އަދި ޔުނައިޓެޑް އަރަބް އެމިރޭޓްސް ހިމެނެއެވެ.
މިއީ މިސް ޔުނިވާސްގެ 73ވަނަ މުބާރާތެވެ. މިސް ޔުނިވާސް މުބާރާތަކީ ގިނަ ބަޔަކު އިންތިޒާރުކުރާ މުބާރާތެކެވެ.