މާލޭގެ ފާމަސީއެއްގެ ދޮރު ހަލާކުކޮށްލައިގެން އެތެރަށް ވަދެ، އެ ތަނުގެ ތިޖޫރީ ވަގަށް ނެގި މީހަކު 28،000 ރުފިޔާއިން ޖޫރިމަނާ ކޮށްފިއެވެ.
މި މައްސަލައިގައި އިއްޔެ ހުކުމްކުރީ ގދ. ގައްދޫ ފެތިރޯނުގޭ މުތުއިމް މުހައްމަދުގެ މައްޗަށެވެ.
ކްރިމިނަލް ކޯޓުގައި އޭނާގެ މައްޗަށް އުފުލާފައިވާ ދައުވާގައި ބުނެފައިވަނީ މި އަހަރުގެ ޖޫންމަހުގެ ހަތަރުވަނަ ދުވަހު 4:00ހާއިރު، އިތުރު ބަޔަކާއެކު މާލޭގައި ހުންނަ އޯކިޑްމަގު ސެންޓްރަލް މެޑިކަލް ސެންޓަރުގެ ފާމަސީގެ ދޮރު ހަލާކުކޮށްލައިގެން ވަދެ، އެ ފާމަސީގައި ހުރި ތިޖޫރީއެއް ވަގަށް ނަގާފައިވާ ކަމަށެވެ.
އެހެން ނަމަވެސް ތިޖޫރީގައި ފައިސާހުރިކަމެއް، ނުވަތަ ހުރީ ކިހާ އަދަދެއްގެ ފައިސާއެއް ކަމެއް ކޯޓު ހުކުމުން އެނގޭކަށް ނެތެވެ.
މި މައްސަލަައިގައި މުތުއިމްގެ މައްޗަށް އުފުލީ ވައްކަމުގެ ދައުވާއެވެ.
މުތުއިމްގެ މައްޗަށް އުފުލި ދައުވާއަށް އިއުތިރާފުވެ، ދައުލަތާއެކު އިއުތިރާފުގެ އެއްބަސްވުމެއް ހެދުމުގެ ފުރުސަތަށް އޭނާވަނީ ކޯޓުގައި އެދިފައެވެ. އެއާ އެކު އިއުތިރާފުގެ އެއްބަސްވުން ހަދައި، ދައުލަތުގެ ފަރާތުން ކޯޓަށް ހުށަހެޅީ މިދިޔަ ސެޕްޓެންބަރު 26ގައެވެ.
ކުށްވެރިންނާ އެކު ދައުލަތުން އިއުތިރާފުގެ އެއްބަސްވުމަކަށް ދާ ހާލަތުގައި، ކުށްވެރިޔާގެ މައްޗަށް އަދަބު ކަނޑައަޅަނީ އެ އެއްބަސްވުމުގެ ދަށުން އަދަބު ލުއިކޮށްދިނުމަށް ފަހުގައެވެ.
މި މައްސަލައިގައި ހަދާފައިވާ އިއުތިރާފުގެ އެއްބަސްވުމަށް ރިއާޔަތްކޮށް، ކޯޓުން ހުކުމްކުރީ، މުތުއިމްގެ މައްޗަށް 28،800 ރުފިޔާގެ ޖޫރިމަނާ އަދަބެކެވެ. އެހެން ކަމުން ޖޫރިމަނާ ފައިސާ ހަތަރު މަސްދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް ދެއްކުމަށް ހުކުމްގައިވެއެވެ.
މި އަހަރުގެ މިހާތަނަށް ފުލުހުންނަށް ހުށަހަޅައިފައިވާ މައްސަލަތަކުގެ ތަފާސްހިސާބަށް ބަލާއިރު، އެންމެ ގިނައިން ހުށަހަޅައިފައި އޮތީ ވައްކަމުގެ މައްސަލަތަކެވެ. އެ ގޮތުން އަހަރުގެ މިހާތަނަށް ވައްކަމުގެ 3،036 މައްސަލައެއް ވަނީ ފުލުހަށް ހުށަހަޅައިފައެވެ.