އިތުބާރު ހުރި މަގާމެއްގައި ހުރެ، ކުޑަކުއްޖަކާ ބެހުނު މީހަކު އުމުރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި ހުކުމް ކޮށްފައި ވަނީ ނަސްރުﷲ ފާއިޒު ނަމަކަށް ކިޔާ މީހެއްގެ މައްޗަށެވެ.
އޭނާގެ މައްޗަށް ތިން ދައުވާއެއް އުފުލާފައިވާއިރު އެ ދައުވާތަކަކީ:
- ދިވެހިރާއްޖޭގައި އޮރިޔާންކާޑު ގެންގުޅުން
- ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލުން
- ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުން
ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލިކަން ސާބިތުވާތީ ނަސްރުﷲ ފާއިޒު، 10 އަހަރަށް ޖަލަށް ލުމަށް ކޯޓުން ހުކުމްކޮށްފައިވެއެވެ. އަދި ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގިކަން ސާބިތުވާތީ އޭނާ 15 އަހަރަށް ޖަލަށްލުމަށް ވެސް ކޯޓުން ވަނީ ހުކުމްކޮށްފައެވެ.
އެހެންނަމަވެސް އޭނާގެ މައްޗަށް ކުރެވޭ އޮރިޔާންކާޑު ގެންގުޅުމުގެ ދައުވާ ސާބިތުވެފައެއް ނުވެއެވެ. އެގޮތުން އެ ދައުވާ އެކަށީގެންވާ މިންވަރެއްގެ ޝައްކެއް ނެތި ޝަރީއަތަށް ސާބިތުނުވާ ކަމަށް ކްރިމިނަލް ކޯޓުގައި ހުކުމުގައިވެއެވެ.
މި މައްސަލަ އެ ކޯޓަށް ހުށަހެޅީ ޑިސެމްބަރު 17، 2020ގައެވެ.
މި މައްސަލައަކީ ކުޑަކުއްޖަކާ ގުޅުން ހުރި މައްސަލައަކަށް ވުމުން މި މައްސަލައިގެ އިތުރު ތަފުސީލެއް ކްރިމިނަލް ކޯޓަކުން ހާމައެއް ނުކުރެއެވެ.