އެއާޕޯޓުގެ މަރާމާތު މަސައްކަތަށްފަހު ގައުމީ އެއާލައިން މޯލްޑިވިއަންގެ ދަތުރުތައް ގއ. ކޫއްޑޫއަށް މިއަދު ފަށައިފިއެވެ.
ރަންވޭގެ ބައެއް ހަލާކުވެ މޯލްޑިވިއަނުން ކޫއްޑޫއަށް ކުރަމުން އައި ދަތުރުތައް ހުއްޓާލީ މި މަހުގެ 11 ވަނަ ދުވަހެވެ.
"ސަން"އަށް މައުލޫމާތު ދެމުން މޯލްޑިވިއަނުން ބުނީ އެއާޕޯޓުގެ މަރާމާތަށްފަހު މިހާރު އަނެއްކާ ވެސް ކޫއްޑޫއަށް ދަތުރުތައް ފަށާފައިވާ ކަމަށެވެ. ނަމަވެސް މިހާރު ކުރަމުން އަންނަނީ ކޮންމެ ހަފްތާއަކު ދެ ދަތުރުކަމަށެވެ.
"ޔެސް އަޅުގަނޑުމެން މިހާރު ދަތުރުތައް ފަށައިފިން. އެކަމު އަދި މި އިންނަނީ ވީކްލީ ޓޫ ފްލައިޓްސް. އެކަމު ހަމަ ކުރީގެ ގޮތަށް ނޯމަލްކޮށް ދަތުރުތައް ފެށޭނެ ވަރަށް އަވަހަށް،" މޯލްޑިވިއަންގެ އޮފިޝަލަކު ބުންޏެވެ.
މޯލްޑިވިއަނުން ކޫއްޑުއަށް ކުރަމުން އައި ދަތުރުތައް ހުއްޓާލީ ކޫއްޑޫގެ ރަންވޭ ވަރަށް ބޮޑަށް ބާވެ، ހަލާކުވެ އެކަމުގެ ސަބަބުން މޯލްޑިވިއަންގެ ދެ ބޯޓެއް ގްރައުންޑް ކުރަން ޖެހުމުންނެވެ.
ކޫއްޑޫ އެއާޕޯޓު ތަރައްގީ ކުރީ 2011 ވަނަ އަހަރު އޭރުގެ ސަރުކާރުން ދިގުރަށް ކިޔާ ފަޅު ރަށެއްގައި ރިސޯޓެއް ތަރައްގީކުރުމަށް 50 އަހަރަށް ބޮނަވެއްޗާ މޯލްޑިވްސްއާ ހަވާލުކޮށްގެންއެވެ.
ފަންސަވީސް އަހަރަށް އެއާޕޯޓު ހިންގައި ތަރައްގީ ކުރުމަށް 2012 ވަނަ އަހަރު ޑރ. މުހައްމަދު ވަހީދު ހަސަން މަނިކުގެ ސަރުކާރުން ހަވާލުކޮށްފައިވަނީ، ސިންގަޕޫރުގެ ކިއޮން ހޮންގް ކޮންސްޓްރަކްޝަނާއި އެލިސަން ކޮންސްޓްރަކްޝަން ކުންފުނި ގުޅިގެން އުފައްދާފައިވާ ކޭއެޗްއޭ ކޮންސްޓްރަކްޝަންއާއެވެ.