ގިނަބައެއްގެ މެދުގައި ވަރަށް ބޮޑަށް މަގުބޫލުކަން ހޯދަމުން އަންނަ ޓިކްޓޮކްގެ މައި ކުންފުނި ޗައިނާގެ ބައިޓްޑާންސްގެ ބާނީ ޖަންގް ޔީމިން ޗައިނާގެ އެންމެ މުއްސަނދި މީހާގެ މަގާމު ހޯދައިފިއެވެ.
ތަފާތު ދިރާސާތައް ހަދާ 'ހުރުން ރިސާޗް އިންސްޓިޓިއުޓް'އިން އެކުލަވާލި ޗައިނާގެ މުއްސަނދިންގެ ލިސްޓުގައި ޖަންގް ވަނީ، ވޭތުވެދިޔަ ތިން އަހަރު ލިސްޓުން އެންމެ ކުރި ހޯދި ޖޮންގް ޝަންޝަން ފަހަތަށް ޖައްސާލައިފައެވެ. ޖޮންގްއަކީ ފުޅީގައި ފެން ބަންދުކޮށް ވިއްކާ ނޮންގްފޫ ސްޕްރިންގްގެ ވެރިޔާއެވެ.
އެ ލިސްޓުގައިވާ ގޮތުން 44 އަހަރުގެ ޖަންގްގެ މިލްކިއްޔާތުގެ އަގު 49.3 ބިލިއަން ޑޮލަރުގައި ހުރިއިރު، ޖޮންގް ޝަންޝަންގެ މިލްކިއްޔާތުގެ އަގު ވަނީ 24 އިންސައްތަ ދަށަށް ގޮސް، 47.9 ބިލިއަން ޑޮލަރަށް ވެއްޓިފައެވެ. މިއީ މިދިޔަ ފެބްރުއަރީ މަހު އޭނާގެ ކުންފުންޏާ ދެކޮޅަށް އާންމުންގެ ފާޑުކިޔުންތަކެއް އަމާޒުވުމާ ގުޅިގެން އައި ދަށްވުމެއް ކަމަށް ރިޕޯޓްތައް ބުނެއެވެ.
މިދިޔަ އަހަރު ޖަންގްގެ ނަން އޮތީ ލިސްޓުގެ ފަސް ވަނައިގައެވެ.
ޓިކްޓޮކްގައި މަހަކު އެކްޓިވްކޮށް ތިބޭ ޔޫޒަރުންގެ އަދަދު އެއް ބިލިއަނަށް ވުރެ ގިނައެވެ. ހުރުން އިންސްޓިޓިއުޓްގެ ލިސްޓުގައި ވާގޮތުން މިދިޔަ އަހަރު ބައިޓްޑާންސްގެ ފައިދާ ވަނީ 30 އިންސައްތައަށް ވުރެ އިތުރުވެފައެވެ.
ޗައިނާގެ އިންޓަނެޓް ދާއިރާގެ އެންމެ ބޮޑު އެއް ކުންފުނި ޓެންސެެންޓްގެ ސީއީއޯ ޕޯނީ މާ ހުއަޓެން ވަނީ މިލިސްޓްގެ ތިންވަނައަށް ވެއްޓިފައެވެ. ނަމަވެސް ޓެންސެންޓްގެ އާމްދަނީއާއި ފައިދާ އިތުރުވުމާ ގުޅިގެން އޭނާގެ މުދަލުގެ އަގު ވަނީ 13 އިންސައްތަ އިތުރުވެ 44.4 ބިލިއަން ޑޮލަރަށް އަރާފައެވެ.
އީ-ކޮމާސް ޕްލެޓްފޯމް ޕިންޑުއޯޑުއޯގެ ބާނީ ކޯލިން ހުއަންގްގެ ނަން އޮތީ ލިސްޓްގެ ހަތަރުވަނައިގައެވެ. އޭނާގެ މުދަލުގެ އަގު ވަނީ ނުވަ އިންސައްތަ ދަށަށް ގޮސްފައެވެ. މިޑިއާ ބްރޭންޑްގެ ބާނީ ހީ ޝިއަންގް ޖިއަން އާއި ސީއޭޓީއެލްގެ ސީއީއޯ ޒެންގް ޔުކުން ވަނީ ފަސްވަނަ އަދި ހަވަނައިގައެވެ.
ހުރުން ރިސާޗްގެ ދިރާސާއިން ދައްކާގޮތުގައި ޗައިނާގައި މިވަގުތު ފަސް ބިލިއަން ޔުއާން (700 މިލިއަން ޑޮލަރު) އަށް ވުރެ ބޮޑު މިލްކިއްޔާތެއް އޮތް 1،094 މީހުން ތިބިއިރު، މިއީ މިދިޔަ އަހަރާ އަޅާބަލާއިރު 12 އިންސައްތަ ނުވަތަ 147 މީހުން މަދު އަދަދެކެވެ. އަދި މިއީ 2021 ވަނަ އަހަރު ރެކޯޑު އަދަދެއްގައި ހުރި 1،185 އާ އަޅާބަލާއިރު 30 އިންސައްތައަށް ވުރެ ބޮޑު ދަށްވުމެކެވެ.
މިއަހަރު ޗައިނާގެ އެންމެ މުއްސަނދި ވިޔަފާރިވެރިންގެ ޖުމްލަ މުދަލުގެ އަގަކީ ތިން ޓްރިލިއަން ޑޮލަރަށް އަރައެވެ. މިއީ މިދިޔަ އަހަރަށްވުރެ 10 އިންސައްތަ ދަށް އަދަދެކެވެ.
"މިއީ ޗައިނާގެ އިގްތިސާދާއި ސްޓޮކް މާކެޓްތަކަށް ދަތި އަހަރެއް ކަމަށްވުމުގެ ސަބަބުން ވީކަމެއްކަމަށް ބެލެވޭ،" ހުރުން ރިޕޯޓްގެ ޗެއާމަން އަދި ޗީފް ރިސާޗަރު ރޫޕަޓް ހޫގެވަފް ވިދާޅުވިއެވެ.
މިހާރު މުއްސަނދިންގެ ލިސްޓުގައި ގިނައީ ޓެކްނޮލޮޖީ، ކޮންސިއުމާ އިލެކްޓްރޯނިކްސް އަދި ހަކަތައިގެ އާ ދާއިރާތަކުގެ ވިޔަފާރިވެރިންނެވެ. މީގެ ކުރިން މި ލިސްޓުގައި އެންމެ ގިނައިން ތިބީ ރިއަލް އެސްޓޭޓް ޑިވެލޮޕަރުންނެވެ. މިކަން ހޫގެވާފް ވަނީ ފާހަގަކުރައްވާފައެވެ.
އޭނާ ފާހަގަކުރެއްވި ގޮތުގައި ޗައިނާގެ އާ ޖީލުގެ ވިޔަފާރިވެރިން ކުރީގެ ޖީލުތަކަށް ވުރެ ބައިނަލްއަގްވާމީ ފެންވަރުގައި މަސައްކަތްކުރާ މިންވަރު ބޮޑެވެ. މިސާލަކަށް ބައިޓްޑާންސްގެ ޖަންގް ޓިކްޓޮކް މެދުވެރިކޮށް ދުނިޔޭގެ ބާޒާރަށް ނުކުތުމާއި، ޕިންޑުއޯޑުއޯގެ ހުއަންގް، ޓެމޫ މެދުވެރިކޮށް ދުނިޔޭގެ އީ-ކޮމާސް ހަބަކަށް ވުމަށް މަސައްކަތްކުރުން ހޫގެވާފް ފާހަގަކުރެއްވިއެވެ.