ޓިކްޓޮކް މަނާކުރުމަށް ފާސްކުރި ޤާނޫނަށް އެމެރިކާގެ ސުޕްރީމް ކޯޓުން ތާއީދުކޮށްފިއެވެ.
އެމެރިކާގެ ސުޕްރީމް ކޯޓުން މިއަދު ނިންމި ނިންމުމެއްގައި، ޗައިނާގެ ކުންފުންޏެއް ކަމަށްވާ ބައިޓްޑާންސްގެ މިލްކިއްޔާތުގައިވާ ޓިކްޓޮކް ބަންދުކުރުމަށް ނުވަތަ ވިއްކާލުމަށް ލާޒިމްކުރާ ޤާނޫނަށް ތާއީދުކޮށްފައިވެއެވެ.
މިނިންމުމަކީ އެމެރިކާގެ އާބާދީގެ ގާތްގަނޑަކަށް ދެބައިކުޅަ އެއްބައި މީހުން ބޭނުންކުރާ މި އެޕްލިކޭޝަނަށް އެރި ބޮޑު ލޮޅުމެކެވެ.
ކޯޓުގެ ފަނޑިޔާރުން އިއްތިފާޤުން ނިންމި މި ނިންމުމުގައި، މިދިޔަ އަހަރު އެމެރިކާގެ ކޮންގްރެސްއިން ފާސްކޮށް، ޑިމޮކްރެޓިކް ޕާޓީގެ ރައީސް ޖޯ ބައިޑަން ސޮއިކުރި މި ޤާނޫނަކީ އެމެރިކާގެ ޤާނޫނު އަސާސީގެ ފުރަތަމަ އިސްލާހުގައި ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމާ ޚިލާފު ޤާނޫނެއް ނޫން ކަމަށް ކަނޑައަޅާފައިވެއެވެ.
ޓިކްޓޮކް އަދި ބައިޓްޑާންސް އިން ވަނީ މި ޤާނޫނަކީ އެމެރިކާގެ ރައްޔިތުންގެ ޚިޔާލުފާޅުކުރުމުގެ މިނިވަންކަމަށް ނުރައްކާވާނެ ޤާނޫނެއް ކަމަށް ބުނެފައެވެ. މި އެޕްލިކޭޝަން މެދުވެރިކޮށް ކޮންޓެންޓް އަޕްލޯޑްކުރާ ބައެއް ފަރާތްތަކުން ވެސް މި ޤާނޫނާ ދެކޮޅު ހަދާފައިވެއެވެ.
އެމެރިކާގެ ސަރުކާރުން ބުނާގޮތުގައި، ޗައިނާގެ ސަރުކާރުގެ ބާރު ހިނގާ މި އެޕްލިކޭޝަނަކީ އެމެރިކާގެ ޤައުމީ ސަލާމަތަށް ނުރައްކަލެކެވެ.
މިހާރު ޤާނޫނުގައިވާ ގޮތުން، އާދިއްތަ ދުވަހުގެ ނިޔަލަށް ބައިޓްޑާންސްއިން ޓިކްޓޮކް ވިއްކާނުލައިފިނަމަ، އެމެރިކާގައި މި އެޕްލިކޭޝަން ބަންދުކުރަންޖެހޭނެއެވެ.