ޓިކްޓޮކްގައި ބޮޑު މަގުބޫލުކަމެއް ހޯދާފައިވާ މަރިޔަމް ސަމާއަށް ލައިވެއްގެ ތެރެއިން މަރުގެ އިންޒާރު ދިން މައްސަލައެއް ފުލުހުން މިއަދު ބަލަން ފަށައިފިއެވެ.
ޓިކްޓޮކްގެ މަގުބޫލުކަން އިތުރުވެ، ގިނަ ބަޔަކު އަންނަނީ ޓިކްޓޮކް ލައިވްތައް ހުށަހަޅަމުންނެވެ. ބައެއް ފަހަރު އެ ފަދަ ލައިވްތަކުގައި ޒުވާބުތައް ހިނގާ، ބޭއަދަބީ ބަސްތައް ވެސް ބޭނުންކުރެއެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، ޓިކްޓޮކްގައި އަންހެނަކަށް މަރުގެ އިންޒާރު ދިން މައްސަލައެއް ފުލުހުންގެ ސަމާލުކަމަށް އައިސްފައިވާ ކަމަށެވެ.
މި މައްސަލައާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.
ފުލުހުން މިއީ ކޮން މައްސަލައެއްކަން ނުބުނި ނަމަވެސް މީސްމީޑިއާގައި ކުރި ޕޯސްޓެއްގައި ޓިކްޓޮކްގައި މަގުބޫލުކަން ހޯދާފައިވާ ސަމާ ވަނީ އޭނާއަށް މަރުގެ އިންޒާރު ދޭ ވީޑިއޯއެއް ހިއްސާކޮށްފައެވެ.
އެ ވީޑިއޯއިން އެނގޭ ގޮތުގައި ސަމާއަށް މަރުގެ އިންޒާރު ދިނީ ދިވެހި އަންހެނެކެވެ.
އެއީ، ޓިކްޓޮކް ލައިވެއްގެ ތެރެއިން ހިނގާ ދިޔަ ޒުވާބެއްގެ ތެރޭގައި ހިނގި ކަމެއް ކަމަށްވެއެވެ.
ޓިކްޓޮކްގައި މީހުންނަށް އެހީ ހޯދައިދީގެން ވެސް ސަމާއަށް ބޮޑު ސަމާލުކަމެއް ލިބުނެވެ.