ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް)ގެ ކުއްލިއްޔާ އޮފް ޤުރްއާން އެންޑް ސުންނާގެ ހަތަރު ވަނަ އަލްމަޙްފަލުލްޤުރްއާނީ، އަންނަ ހޮނިހިރު ދުވަހު ބާއްވަން ނިންމައިފިއެވެ.
އަލްމަޙްފަލުލްޤުރްއާނީއަކީ ޤުރްއާން ކިޔަވައިދެއްވާ މުދައްރިސުންނާއި ޤުރްއާނުގެ ދާއިރާއިން މަތީ ތަޢުލީމު ޙާޞިލުކުރަމުން އަންނަ ފަރާތްތަކަށް އަމާޒުކޮށްގެން ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން ކުރިއަށްގެންދާ ޚާއްޞަ ޙަރަކާތެކެވެ.
އައިޔޫއެމްއިން ބުނީ އެ މަޙްފަލުގެ މައިގަނޑު މަގުސަދަކީ ދިވެހި މުޖުތަމަޢުގެ ޤުރްއާނަށް ޝަޢުޤުވެރިވާ ފަރާތްތަކަށް އަމާޒުކޮށްގެން ކީރިތި ޤުރްއާން ކިޔެވުމުގެ ތަފާތު ޤިރާއަތްތަކަށާއި ތިލާވަތުކުރުމުގެ ފަންނާއި ހުނަރު ތަރައްގީކޮށް ދިވެހި މުޖުތަމައު ކީރިތި ޤުރްއާނުގެ އިލްމަށް އަހުލުވެރިކުރުވުން ކަމަށެވެ. އަދި ޤުރުއާން އުގަންނައިދޭ ފަރާތްތަކަށް ފަހި ފުރުޞަތުތަކެއް ތަނަވަސްކޮށްދިނުމަކީ ވެސް އިތުރު މަގުސަދެކެވެ.
އައިޔޫއެމް ހޯލުގައި ބާއްވާ އެ މަޙްފަލު އިފުތިތާހު ކުރުމުގެ ޖަލްސާގައި ތަފާތު ގިރާއަތްތަކަށް ކިޔެވުމާއި، ތަފްސީރީ ފިލާވަޅުތަކަށް އަލިއަޅުވާލުން އޮންނާނެއެވެ.
އެ މަޙްފަލުގައި ދިވެހިރާއްޖެއިން ބޭރު ތިން ގާރީންގެ ކިޔެވުމާއި ދިވެހި ދެ ގާރީއެއްގެ ކިޔެވުން އަޑު އިއްވާނެއެވެ. އަދި ޤުރްއާން މުދައްރިސުންނަށް ޚާއްސަކޮށްގެން ކީރިތި ޤުރްއާން ރީތިކޮށް ތިލާވަތު ކުރާނެ ހުނަރުތައް ދަސްކޮށްދޭ ތިން ސެޝަނަކާއި ދިގު ރާގަށް ކިޔެވުމުގެ ހުނަރު ތަރައްގީ ކުރާނެ އުކުޅުތައް ދަސްކޮށްދޭ ސެޝަނަކާއި ގުރުއާން އުނގެނި އުގަންނައި ދިނުމުގެ އަދަބުތަކާ ގުޅޭ ސެޝަނެއް ކުރިޔަށް ގެންދިޔުމަށް ހަމަޖެހިފައިވެއެވެ.
ނިމިދިޔަ އަހަރުގެ މަހުފަލުގައި މަދަރުސާތަކުގެ ކިޔަވައިދޭ ޤުރްއާން މުގައްރަރަށް ޚާއްސަކޮށްގެން ޤުރުއާން މަޙްފަލު ކުރިޔަށް ގެންދިޔައިރު މުޅި ރާއްޖެއިން 100އަށްވުރެ ގިނަ ޓީޗަރުންނަށް ފުރުސަތު ދީފައިވެއެވެ.
ކުއްލިއްޔާ އޮފް ޤުރްއާން އެންޑު ސުންނާއަކީ ކީރިތި ޤުރްއާނުގެ ޢިލްމުގެ ކޯސްތައް ރާއްޖޭގައި އެންމެ ފުޅާކޮށް ހިންގާ އެއް މުއައްސަސާއެވެ.