ތިލަމާލެ ބްރިޖު މަސައްކަތުގެ 45.82 ޕަސެންޓު މިހާރު ނިމިފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވަނީ މަޝްރޫއުގެ އެންމެ ފަހުގެ ތަފްސީލްތައް ހިއްސާކުރައްވައިފައެވެ.
މިނިސްޓަރު ވިދާޅުވި ގޮތުގައި މިހާރު ނިމިފައިވަނީ:
- ތަނބުތަކުގެ ޕައިލިން މަސައްކަތުގެ 79.5 ޕަސެންޓު.
- ޕްރީކާސްޓު ސެގްމަންޓު 43.5 ޕަސެންޓު
- ޕައިލް ކެޕްގެ މަސައްކަތް 67.8 ޕަސެންޓު
- ޕިއާ ކޮމްޕްލެކްސް 62.2 ޕަސެންޓު
މަސައްކަތް ނިންމުމުގައި ތާވަލުގައި އޮތް މިންވަރަށްވުރެ ބޮޑުތަނުން މަސައްކަތް ލަސްވެފައިވާކަމަށް މިދިޔަ އަހަރުގެ ނޮވެމްބަރު މަހު މިނިސްޓަރު ވަނީ ވިދާޅުވެފައެވެ.
އެހެންވީ ފުން ކަނޑުގައި ބްރިޖު އެޅުމުގެ ތަޖުރިބާ އެފްކޮންސްގައި ނެތުމުން ކަމަށާއި އެފްކޮންސްއިން މަސައްކަތުގެ ބުރަކަމާއި ބޮޑުކަން އަންޑާ އެސްޓިމޭޓްކުރުމުން ކަމަށް އޭރު މިނިސްޓަރު ވިދާޅުވިއެވެ. އަދި އަންޑާއެސްޓިމޭޓްކުރުމުގެ ސަބަބުން އެކަށީގެންވާ މިންވަރަށް ތައްޔާރުވެވިފައި ނެތް ކަމަށް ވެސް ވިދާޅުވިއެވެ.
މިނިސްޓަރު މުއްތަލިބު ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި -- ފޮޓޯ/ ރައީސް އޮފީސް
އެހެންވެ ސަޕްލިމަންޓަރީ އެގްރިމަންޓެއްގައި ސޮއިކޮށް އެ މަޝްރޫއު ނިންމަން އިތުރު 30 މަސް ދީފައެވެ. މިނިސްޓަރު ވިދާޅުވި ގޮތުގައި މިއީ އެ ކުންފުނިން ބޭނުންވެގެން ސަރުކާރުން އެއްވެސް ބަދަލެއް ނުގެނެސް ފާސްކުރި މުއްދަތެވެ.
އެއާއެކު މިއަދު ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވަނީ އަނެއްކާ ވެސް އެފްކޮންސްއިން މަސައްކަތް ލަސްކުރުމަށް އެކި ބަހަނާތައް ދައްކަމުން އަންނަކަމަށް ވިދާޅުވެފައެވެ.
އެގޮތުން މޫސުމީ އެކި ކަންކަމާއި، ކަނޑު ގަދަވުން ފަދަ ކަންކަމާ ގުޅުވައި ބައެއް މުހިންމު މަަސައްކަތްތައް ލަސްކުރާކަމަށް ވިދާޅުވިއެވެ.
"މާ ބޮޑުތަނެއް ލަސްކަމެއް ނުފެނު ނަމަވެސް ބައެއް ކްރިޓިކަލް މަސައްކަތްތައް އަޅުގަނޑުމެން ބޭނުންވާ ސްޕީޑުގައި ކުރިއަށް ނުދާކަން އަޅުގަނޑު ފާހަގަކޮށްލަން. އޭގެ ތެރޭގައި ޑީޕް ސީ ޕައިލިންގެ މަސައްކަތް އަޅުގަނޑުމެން އެންމެ ބޭނުންވާ ސްޕީޑުގައެއް ނުދޭ،" މިނިސްޓަރު ވިދާޅުވިއެވެ.
އެއާއެކު، އެ ބަހަނާތަކަކީ ސަރުކާރުން ގަބޫލުކުރާ ކަންތައްތަކެއް ނޫންކަން ކޮންޓްރެކްޓަރުންނަށް އަންގަފައިވާ ކަމަށާއި، މަސައްކަތް ލަސްކުރުމަށް އިތުރު މުއްދަތު ނުދެވޭނެކަމަށް މިނިސްޓަރު ވިދާޅުވިއެވެ.
އެހެންވެ އެކަމުގެ ކަންބޮޑުވުންތައް ކޮންޓްރެކްޓަރުންނާ ހިއްސާކޮށް ބައްދަލުވުންތައް ބާއްވަމުން އަންނަކަމަށާއި، އަދިވެސް މަސައްކަތް ތާވަލާ އެއްގޮތަށް ކުރިއަށް ދާނެކަމުގެ އުންމީދު އެބައޮތްކަމަށް މިނިސްޓަރު ވިދާޅުވިއެވެ.