ފްރެންޗް ލީގު އާންގައި އެންމެ ފަހުގެ ޗެމްޕިއަން ޕެރިސް ސެއިންޓް ޖާމެއިންއިން އޮލިމްޕިކް މާސޭ ބަލިކޮށް، ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނަގައިފިއެވެ.
މާސޭގެ ދަނޑުގައި ކުޅުނު މި މެޗު ޕީއެސްޖީން ކާމިޔާބުކޮށްފައިވަނީ 3-0 އިންނެވެ.
ޕީއެސްޖީން ވަނީ މެޗުގެ ހަތްވަނަ މިނެޓުގައި އުފެއްދި ހަމަލާއެއްގައި މެޗުގެ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ޖޮއާ ނެވޭސެވެ. މެޗުގެ 20 ވަނަ މިނެޓުގައި މާސޭގެ އަމީން ހަރިތުއަށް ރާތް ކާޑު ދެއްކުމާ އެކު މާސޭއިން މެޗުން ނަތީޖާއެއް ނެރުމަށް ކުރަމުންދިޔަ މަސައްކަތަށް އިތުރަށް ހުރަސް އެޅިގެންދިޔައެވެ.
މެޗުގައި ޕީއެސްޖީން ކާމިޔާބުކުރި ދެވަަނަ ލަނޑާކީ މެޗުގެ 29 ވަނަ މިނެޓުގައި މާސޭގެ ލިއޮނާޑޯ ބެލާޑީ އަތުން ބައިކޮޅަށް ވަން ލަނޑެކެވެ. މެޗުގައި އެ ޓީމުން ކާމިޔާބުކުރި ތިންވަނަ ލަނޑު މެޗުގެ 40 ވަނަ މިނެޓްގައި ކާމިޔާބުކޮށްދިނީ ބްރެޑްލީ ބާކޯލާއެވެ.
މި ކާމިޔާބީއާ އެކު ޕީއެސްޖީ މިހާރު އޮތީ ނުވަ މެޗުން ލިބިފައިވާ 23 ޕޮއިންޓާ އެކު ތާވަލުގެ އެއްވަނައިގައެވެ. ދެވަނައިގައި އޮތް އޭއެސް މޮނާކޯ މި ހަފުތާގައި ނީސް އަތުން ބަލިވެފައިވުމުން ޕީއެސްޖީއަށްވަނީ ތިން ޕޮއިންޓްގެ ލީޑެއް ލިބިގެން ގޮސްފައެވެ. މާސޭ މި ނަތީޖާއާ އެކު އުޅެނީ 17 ޕޮއިންޓާ އެކު ތާވަލުގެ ތިންވަނައިގައެވެ.
މުބާރާތުގައި ލީލާއި ލޯންސް ބައްދަލުކުރި މެޗު ރަށުން ބޭރުގައި 2-0 އިން ކާމިޔާބުކޮށްފައިވަނީ ލީލެވެ.
މެޗުގައި ލީލްއިން ކާމިޔާބުކުރި ދެ ލަނޑު މެޗުގެ އިތުރު ވަގުތުގެ އަށްވަނަ މިނެޓާއި 11 ވަނަ މިނެޓުގައި ކާމިޔާބުކޮށްދިނީ ޖޮނަތަން ޑޭވިޑާއި މުހަންމަދު ބަޔޯއެވެ. މި ކާމިޔާބީއާ އެކު ލީލް މިހާރު އޮތީ 17 ޕޮއިންޓާ އެކު ހަތަރުވަނައިގައެވެ. ލޯންސް ފަސްވަނައިގައި އޮތީ 14 ޕޮއިންޓާ އެކުއެވެ.