'ފަލަސްތީނާ އެކު ދިވެހީން' ނަމުގައި ދައުލަތުގެ މީޑިއާ، ޕީއެސްއެމުން ކުރިއަށް ގެންދިޔަ ޓެލަތޯނުން ލިބުނު 19 މިލިއަން ރުފިޔާ، މިދިޔަ އޮގަސްޓް މަހު ފަލަސްތީން ރައްޔިތުންނަށް އެހީވާ ފަންޑަށް ހަވާލުކޮށްފައި ވާކަމަށް ބުނެ ފޮރިން މިނިސްޓްރީން މިރޭ ރަސީދުތައް ހާމަކޮށްފިއެވެ.
ފޮރިން މިނިސްޓްރީން ނެރުނު ބަޔާނެއްގައި ވަނީ އެ ޓެލެތޯން ބޭއްވީ 12 ޖޫން 2024ގައި ކަމަށެވެ. އަދި އެ ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުވާ)އާ ހަވާލުކުރީ އޮގަސްޓް 20ވަނަ ދުވަހު ކަމަށް އެ ބަޔާނުގައި ވެއެވެ.
އެމްއެމްއޭ އަންރުވާއަށް ފައިސާ ޖަމާކުރިކަމުގެ 'ޑެބިޓު އެޑްވައިޒު' ގެ ކޮޕީ --
އެ ބަޔާނުގައި ވާގޮތުން ޓެލެތޯނުން ލިބިފައި ވަނީ 1.2 މިލިއަން ޑޮލަރެވެ. އެއީ 19 މިލިއަން ރުފިޔާއެވެ. މި އަދަދު ކަށަވަރު ކުރީ އޮޓިޑް ފާމެއްކަމުގައިވާ ކްރޯވް މޯލްޑިވްސް އެލްއެލްޕީން ކަމުގައި ފޮރިން މިނިސްޓްރީން ވަނީ ބުނެފައެވެ.
ދިވެހި ސަރުކާރުން މިހާރު ދަނީ ދިވެހި ރައްޔިތުން ހަދިޔާ ކުރި ފައިސާ ޚަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން އަންރުވާއާއެކު މަޝްވަރާކުރަމުންކަން މި ބަޔާނުގައި ފާހަގަކޮށްފައި ވެއެވެ.
މީގެ އިތުރުން، ފޮރިން މިނިސްޓްރީގެ ބަޔާނުގައި ވަނީ، މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހި ރައްޔިތުން ހަދިޔާކޮށްފައިވުމަކީ ފަލަސްތީނުގެ މިނިވަންކަމަށް ރާއްޖެއިން ކުރާ ތާއީދު ދައްކުވައިދޭ ކަމެއްކަމަށެވެ. އަދި އަބަދުވެސް، ގައުމާއި އެ ގަޤައުމުގެ ރައްޔިތުންނާއެކުދިވެހިން ތިބި ކަމުގެ އަލިގަދަ ހެއްކެއް ކަމަށް ވެސް އެ ބަޔާނުގައި ވެއެވެ.
"ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ނަސްލު ނައްތާލުމުގެ އަަމަލުތަކާއި ބައިނަލްއަގްވާމީ ގާނޫނާއި އިންޓަނޭޝަނަލް ހިއުމެނިޓޭރިއަން ލޯއާ ޚިލާފަށް ދެމުން ގެންދާ ހަމަލާތައް ދިވެހި ސަރުކާރުން
ހަރުކަށިބަހުން ކުށްވެރިކުރަމެވެ،" އެ ބަޔާނުގައި ވެއެވެ.
މި ފައިސާ އަންރުވާއާ ހަވާލުކުރިތޯ ޔަގީންކުރަން ފޮރިން މިނިސްޓަރު ޑރ. ޢަބްދުﷲ ޚަލީލް ރައްޔިތުންގެ މަޖިލީހަށް ހާޒިރުކުރަން މިދިޔަ ހޯމަ ދުވަހު ވަނީ ނޯޓިސް ދީފިއެވެ.
ޓެލެތޯނަށް ލިބުނު ފައިސާ އަންރުވާއާ ހަވާލުކުރެވިއްޖެތޯ ޚަލީލާ ސުވާލުކުރުމަށް ހުށަހެޅުއްވީ މަޖިލީހުގެ ގަލޮޅު ދެކުނު ދާއިރާގެ އެމްޑީޕީއަށް ނިސްބަތްވެ ވަޑައިގަންނަވާ މެންބަރު މީކާއީލް ނަސީމެވެ.
އެ ފައިސާ ލިބުނުތާ ހަތަރު މަސް ވެފައިވާއިރު، މިހާތަނަށް ފައިސާ ހަވާލުނުކުރެވިވާ ނަމަ ލަސްވާ ސަބަބު ސާފުކޮށްދިނުމަށާއި އެ ފައިސާ ފަލަސްތީނަށް ރައްދުކޮށްދެވޭނެ ތާރީޚެއް ސާފުކޮށްދިނުމަށް ވެސް މީކާއީލް އެދިފައިވެއެވެ.
މީކާއީލް މިފަދައިން ހުށަހަޅާފައި ވީނަމަވެސް، މިދިޔަ އޮގަސްޓު މަހުގެ 20ގައި ފޮރިން މިނިސްޓްރީން ވަނީ އެ ފައިސާ ފިނޭންސް މިނިސްޓްރީއާއި މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް، ސީދާ އަންރުއާގެ އެކައުންޓަށް ޖަމާކޮށްފައިވާ ކަމަށް މީގެ ކުރިން ވެސް ފޮރިން މިނިސްޓްރީން ބުންޏެވެ.
މުޅި ރާއްޖެއަށް ހުޅުވާލައިގެން، ރައީސް ޑރ. މުހައްމަދު މުއިއްޒުގެ އެދިވަޑައިގަތުމަށް ކުރިއަށް ގެންދިޔަ ޓެލަތޯނަށް ބޮޑު ތަރުހީބެއް ލިބުނެވެ.
އެގޮތުން، ސަރުކާރުގެ ހުރިހާ ވުޒާރާތަކުންނާއި ކުންފުނިތަކުގެ އިތުރުން ބައެއް އަމިއްލަ ފަރާތްތަކުން ވެސް ވަނީ ބޮޑެތި އަދަދުތަކުން އެ ޓެލަތޯނަށް ހަދިޔާކޮށްފައެވެ.
ފަލަސްތީނަށް އެހީވާން އުފައްދާފައިވާ އަންރުއާއަކީ އދ.ގެ މަޖިލީހުން 1948 ވަނަ އަހަރު ފާސްކުރި ޤަރާރަކުން ވުޖޫދަށް ގެނައި ފަންޑެކެވެ.