ރާއްޖޭގައި ތެލުގެ ވިޔަފާރި ފުޅާ ދާއިރާއެއްގައި ކުރާ، ހޯކްސްގެ ބޯޓަކުން އެތެރެކުރަން އުޅުނު ގިނަ އަދަދެއްގެ ސިނގިރޭޓު ކާޓަންތަކެއް ކަސްޓަމްސްއިން ހިފަހައްޓައިފިއެވެ.
މިކަމާ ގުޅިގެން "ސަން"އާ ވާހަކަ ދައްކަމުން ހޯމް މިނިސްޓްރީން ބުނީ ހޯކްސްގެ ބޯޓަކުން އެތެރެކުރަން އުޅުނު ސިނގިރޭޓު ކާޓަންތަކެއް ހިފަހައްޓާފައި ވަނީ މިދިޔަ ހުކުރު ދުވަހުގެ ރޭ ކަމަށެވެ. އަދި ކަސްޓަމްސްއިން އެ ރެއިޑް އޮޕަރޭޝަން ކުރިއަށް ގެންދާ ކަމަށް ބުންޏެވެ.
ނަމަވެސް އެއީ ކިހާ އަދަދެއްގެ ކާޓަންތަކެއް ކަމެއް ސާފުނުވާ ކަމަށް އެ މިނިސްޓްރީން ބުންޏެވެ.
މި އޮޕްރޭޝަނަކީ އަދިވެސް ކުރިއަށްދާ އޮޕްރޭޝަނެއްކަން ހޯމް މިނިސްޓްރީން ފާހަގަކުރިއެވެ.
މިކަމާ ގުޅިގެން ހޯކްސްގެ މެނޭޖްމަންޓުގެ ފަރާތުން "ސަން" ވާހަކަދެއްކި މީހަކު ވިދާޅުވީ، އެއީ ބޭރު ބަޔަކާއި ހޯކްސްގެ މުވައްޒަފުންގެ ޓީމެއް ގުޅިގެން ހިންގަފައިވާ "ޖަރީމާއެއް" ކަމަށެވެ.
އަދި މިކަމާ ގުޅިގެން ކަސްޓަމާއި ފުލުހުންނަށް ދޭންޖެހޭ ފުރިހަމަ އެއްބާރުލުން ހޯކްސްގެ ފަރާތުން ދޭނެކަމަށް އޭނާ ވިދާޅުވިއެވެ.
"އަޅުގަނޑުމެންގެ ބޯޓުތަކުގައި ހުންނާނެ ކެމެރާ ވެސް އެހެންވީމަ އެ ފުޓޭޖުތައް ވެސް އަޅުގަޑުމެން ދޭނަން. މިކަމުގައި ބޭނުންވާ ފުރިހަމަ އެއްބާރުލުން ހޯކްސްގެ ފަރާތުން އިދާރާތަކަށް ދޭނަން،" އޭނާ ވިދާޅުވިއެވެ.
މިކަމުގައި ޝާމިލްވާ މުވައްޒަފުންނަށް ދޭންޖެހޭ އަދަބު ކުންފުނިން ދޭނެކަމުގެ ޔަގީންކަން އޭނާ ދެއްވިއެވެ.
ހޯކްސްގެ ބޯޓަކުން ވަގަށް ސިނގިރޭޓު ކާޓަންތަކެއް އެތެރެކުރި އިރު، ރައީސް ޑރ. މުހައްމަދު މުއިއްޒު ވަނީ ދުންފަތުން ތައްޔާރުކޮށްފައި ހުންނަ ބާވަތްތަކުން ނަގާ އިމްޕޯޓު ޑިއުޓީގެ މިންވަރު އިތުރުކުރުމަށާއި، ދުންފަތުގެ ބަދަލުގައި ބޭނުންކުރާ އިލެކްޓްރޯނިކް ސިނގިރެޓުގެ ބާވަތްތައް މަނާ ކުރުމަށް ނިންމަވާފައެވެ.
ރައީސް ނިންމެވި ކަންކަމުގެ ތެރޭގައި ހިމެނެނީ:
- އެކްސްޕޯޓް އިމްޕޯޓްގެ ގާނޫނުގެ ހަތްވަނަ މާއްދާގެ ޗެޕްޓަރު 24ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރުން.
- ސިނގިރެޓާއި ބިޑިން ނެގޭ އެޑްވަލޮރަމް ރޭޓް 50 އިންސައްތަ މަތިކުރުން.
- އާއްމު ތަންތަނުގައި ދުންފަތުގެ އިސްތިޢުމާލުކުރުން ހުއްޓުވުމަށް ތަންފީޒީ އިދާރާތަކުގެ ދައުރު ވަރުގަދަކުރުމަށް ޚާއްސަ ފިޔަވަޅުތަކެއް އެޅުން.
މީގެ އިތުރުން ޒުވާނުން ދުންފަތުގެ ގޯސް އާދައިން ދުރުކުރުމަށްޓަކައި، ދުންފަތާއި ދުންފަތުން އުފައްދާފައިވާ ތަކެތީގެ ވިޔަފާރީގެ މުއާމަލާތްކުރެވޭނެ އެންމެ ހަގު އުމުރަކީ 18 އަހަރުގެ ބަދަލުގައި 21 އަހަރުކަމަށް ކަނޑައެޅުމަށް ވެސް އެމަނިކުފާނު ވަނީ ނިންމަވާފައެވެ.