ފަލަސްތީނުގެ ކެޓަގަރީން 19 ފިލްމެއް އުނިކޮށްފައިވާތީ ނެޓްފްލިކްސްއަށް ފާޑުކިޔުން އަމާޒުވެއްޖެއެވެ.
މިޑްލް އީސްޓް މޮނިޓާއިން ބުނީ, މި މަހުގެ މެދުތެރޭގައި ފަލަސްތީނުގެ ގިނަ އަދަދެއްގެ ކޮންޓެންޓް ނެޓްފްލިކްސްއިން ނަގާފައިވާއިރު، އިސްރާއީލަށް ތާއީދުކުރާ ގްރޫޕްތަކުގެ ޕްރެޝަރުގެ ސަބަބުން އެ ކޮންޓެންޓުތައް ނައްތާލީ ކަމަށް ވެސް ބައެއް ފަރާތްތަކުން ބުނާ ކަމަށެވެ.
ހައްގުތަކަށް މަސައްކަތްކުރާ ފްރީޑަމް ފޯވާޑުން ބުނީ ނެޓްފްލިކްސްއިން ފަލަސްތީނުގެ ގާތްގަނޑަކަށް ހުރިހާ ފިލްމެއް ނަގާފައިވާއިވާ ކަމަށެވެ.
"އަޅުގަނޑުމެން ވަރަށް ކަންބޮޑުވޭ ނެޓްފްލިކްސްއިން ފަލަސްތީނުގެ ފިލްމުތަކުގެ ގާތްގަނޑަކަށް މުޅި ލައިބްރަރީ ޑިލީޓް ކުރުމުން. ފަލަސްތީނުގެ އަޑުތައް އިތުރަށް ދާނީ މަޑުވަމުން. ނެޓްފްލިކްސްއިން ފަލަސްތީނުގެ އަޑުތައް ފުހެލާފައިވަނީ ހުޅަނގުގެ ޚަބަރުތަކާއި މުނިފޫހިފިލުވުމުގެ މީޑިއާ ޖަޔަންޓް ކުންފުނިތަކުން ފަލަސްތީނާ ގުޅޭ އެތައް ދޮގު ވާހަކަތަކެއް ދައްކަމުންދާ ދަނޑިވަޅެއްގައި،" އެ ޖަމިއްޔާއިން ބުނެފައިވެއެވެ.
އެ ކަމާ ގުޅިގެން ނެޓްފްލިކްސްއިން ބުނީ، 32 ފިލްމާ އެކު ފަލަސްތީނު ސްޓޯރީސް ކަލެކްޝަން ލޯންޗުކުރީ ތިން އަހަރުގެ ލައިސަންސް އެއްބަސްވުމެއްގެ ދަށުން 2021 ވަނަ އަހަރުގެ އޮކްޓޯބަރު މަހު ކަމަށެވެ. އެ ލައިސަންސްތަކުގެ މުއްދަތު މިހާރު ހަމަވެފައިވާ ކަމަށް އެ ކުންފުނިން ބުންޏެވެ.
ނެޓްފްލިކްސްގެ މެންބަރުން ބޭނުންވާ ކަހަލަ ތަފާތު ފެންވަރުގެ ފިލްމުތަކަށާއި ޓީވީ ޝޯތަކަށް އިންވެސްޓް ކުރާ ކަމަށާއި ދުނިޔޭގެ އެކި ކަންކޮޅުތަކުގެ އަޑު ގެނެސްދެމުންދާ ކަމަށް ވެސް ނެޓްފްލިކްސްއިން ބުނެއެވެ.