ފިލިޕީންސްއަށް އަރާފައިވާ ތޫފާން ޓްރާމީގެ ސަބަބުން ފެންބޮޑުވެ، ބިންގަނޑު ކަނޑައިގެން ދިޔަ ހާދިސާގައި މިހާތަނަށް މަރުވި މީހުންގެ އަދަދު 126 އަށް އަރާފައިވާ ކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
ބާރުގަދަ ތޫފާން ޓްރާމީ ފިލިޕީންސްއަށް އެރީ ހުކުރު ދުވަހުއެވެ. ތޫފާންގެ ސަބަބުން ހުކުރު ދުވަހު އެކަނިވެސް 85 މީހުން މަރުވެ 41 މީހުން ގެއްލިފައިވާ ކަމަށް ރިޕޯޓުތައް ބުނެއެވެ. މިއީ މި އަހަރުގެ މިހާތަނަށް ދެކުނު ފިލިޕީންސްއަށް އެރި އެންމެ ނުރައްކާތެރި ތޫފާން ކަމަށް އެ ގައުމުގެ ކާރިސާތަކާބެހޭ އިދާރާއިން ހާމަކުރެއެވެ.
ބިންގަނޑު ކަނޑައިގެން ދިޔަ ހާދިސާގެ ސަބަބުން ކިސަޑުތަކުގެ ތެރޭގައި ތިބި މީހުންނާއި، ހިލަތަކާއި ގަސްތަކުގެ ތެރެއިންވެސް މަރުވެފައިވާ މީހުން ވަނީ ފެނިފައެވެ.
ތޫފާންގެ ސަބަބުން އަސަރުކުރާނެ ކަމަށް ބެލެވޭ ފަސް މިލިއަނަށް ވުރެ ގިނަ މީހުން ތިބިއިރު، އޭގެ ތެރޭގައި ގާތްގަނޑަކަށް ބައި މިލިއަނެއްހާ މީހުން ވަނީ އެކި ސަރަހައްދުތަކުގައި ހުރި 6300 އަށްވުރެ ގިނަ ވަގުތީ ހިޔާތަކަށް ބަދަލުވެފައި ކަމަށް ސަރުކާރުގެ އިދާރާތަކުން ބުނެއެވެ.
އެ ތޫފާން ހަފުތާ ބަންދުގައި ވިއެޓްނާމަށް އަރާނެ ކަމަށް ލަފާކޮށްފައިވެއެވެ.
ފިލިޕީންސްގެ އުތުރުގައި އޮންނަ ޖަޒީރާ ލުޒޯންގެ ސްކޫލްތަކާއި ސަރުކާރު އޮފީސްތައްވެސް ވަނީ ތޫފާންގެ ސަބަބުން ތިން ދުވަހަށް ބަންދުކޮށްފައެވެ.
ހޮނިހިރު ދުވަހު ގިނަ ސަރަހައްދުތަކެއްގެ މޫސުން ރަނގަޅުވެފައިވާއިރު، އެ ސަރަހައްދުތައް ސާފުކުރުމުގެ މަސައްކަތް އަންނަނީ ކުރަމުންނެވެ.
ކޮންމެ އަހަރަކު ވެސް ގާތްގަނޑަކަށް 20 ވަރަކަށް ތޫފާން ޕެސިފިކް ކަނޑާއި ދެކުނު ޗައިނާ ކަނޑާ ދެމެދު އޮންނަ ފިލިޕީންސްއަށް އަރައެވެ. ޕިލިޕީންސްއަށް މިހާތަނަށް އެރި އެންމެ ވަރުގަދައެއް ތޫފާން އެރީ 2013 ވަނަ އަހަރުއެވެ. ތޫފާން ހައިޔާންގެ ނަން ދީފައިވާ އެ ތޫފާންގެ ސަބަބުން 7300 އަށްވުރެ ގިނަ މީހުން މަރުވެފައިވެއެވެ.