ހުޅުމާލޭގެ ހަތަރު އަނގޮޅިތަކުގައި ގާއިމްކޮށްފައިވާ ރައުންޑްއެބައުޓްތަކާ އެކު އާންމުކޮށް އެކްސިޑެންޓު ހިނގާ ސަރަހައްދުތައް 32 އިން އަށަކަށް މަދު ކުރެވިފައިވާ ކަމަށް ފުލުހުން ބުނެފިއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އިންސްޕެކްޓާ އޮފް ޕޮލިސް، އިސްމާއީލް ރަފީއު ވިދާޅުވި ގޮތުގައި ހުޅުމާލޭގައި އާންމުކޮށް އެކްސިޑެންޓު ހިނގާ 32 ހަތަރު އަނގޮޅިއެއް ފާހަގަ ކުރެވިފައިވާއިރު، ރައުންޑްއެބައުޓްތައް ގާއިމްކުރުމާއެކު އެ އަދަދު ވަނީ އަށަކަށް މަދު ކުރެވިފައެވެ.
އާންމުކޮށް އެކްސިޑެންޓުތައް ހިނގާ ސަރަހައްދުތަކުގައި ރައުންޑްއެބައުޓްތައް ގާއިމްކުރުމަށްފަހު، އުޅަނދުތައް އެތެރޭގެ މަގުތަކުން ދުއްވަން ޚިޔާރުކުރާކަން ފާހަގަ ކުރެވިފައިވާ ކަމަށް ވެސް އޭނާ ވިދާޅުވިއެވެެ.
ނަމަވެސް އެެހެންވެ އެތެރޭގެ މަގުތަކުގައި އެކްސިޑެންޓުތައް ކޮންމެވެސް ވަރަކަށް އިތުރުވެފައިވާކަން ފާހަގަކުރެވިފައިވާކަމަށް އޭނާ ވިދާޅުވިއެވެ.
ރަފީއު ވިދާޅުވި ގޮތުގައި އެކްސިޑެންޓުތައް ހިނގާ ކަމަށް ފާހަގަކުރެވޭ ދިމަދިމާލުގައި ފުލުހުން ފެންނަ މިންވަރު އިތުރު ކުރުމަށް ކުރަންޖެހޭ މަސައްކަތްތައް އަންނަނީ ރާވަމުންނެވެ.
އެޗްޑީސީގެ އެސިސްޓެންޓް ޑިރެކްޓަރު، އަހްމަދު ސޮފްވާން ވިދާޅުވި ގޮތުގައި މީގެ ކުރިން ހުޅުމާލޭގެ ކެރީން ކެޕޭސިޓީ ކަނޑައަޅައި، ވެހިކަލްތަކުގެ ލިމިޓު ވެސް އޮތީ ކޮންޓްރޯލް ކުރެވިފައެވެ.
އެހެން ނަމަވެސް ސިނަމާލެ ބްރިޖު އެޅުމާއެކު، ހުޅުމާލޭގެ ވެހިކަލް ކެރީން ކެޕޭސިޓީ، ކަނޑައަޅާފައިވާ އަދަދަށްވުރެ މިހާރު މާ ބޮޑަށް އިތުރުވެފައިވާކަން އޭނާ ފާހަގަ ކުރެއްވިއެވެ.
އެހެންވެ ޓްރެފިކާއި ޕާކިން މައްސަލަ ވެސް ދިމާވަމުން އަންނަކަމަށް ވިދާޅުވިއެވެ.
އެގޮތުން ވިޒިބިލިޓީ ގެއްލޭ ގޮތަށް ކަންމަތިތަކުގައި ޕާކުކުރާ މައްސަަލަ ދިމާވާކަމަށް ވެސް ވިދާޅުވިއެވެ.
އެހެންވެ ހުޅުމާލޭގެ މި މައްސަލަ ހައްލު ކުރުމަށް ޓަކައި ޕާކިން ބިލްޑިންތަކެއް އެޅުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.
"...ޕާކިން ބިލްޑިންތަކެއް ވެސް އެބަ އަޅަން... ހުޅުމާލޭގައި ރެޖިސްޓްރީކޮށްފައި ހުރި ވެހިކަލްތަކާ ގާތްކުރާ ވަރަށްވުރެ އިތުރަށް، ޑަބަލްކޮށް އަދި ޕްލަސް، ހުޅުމާލެއަށް އަރާ ފައިބާ ފްލޯއަށް ވެސް ބަލާފައި، ނަންބަރުތަކަށް ވެސް ބަލާފައި ހުރިހާ ޕާކިން ބިލްޑިންތަކެއް ވެސް އަޅުގަނޑުމެން ކަނޑައަޅާފައި މި އިނީ" ސޮފްވާން ވިދާޅުވިއެވެ.
މާލޭގައި ގަވާއިދާ ޚިލާފަށް ޕާކު ކުރާ މައްސަލަ ބޮޑުވުމާއެކު އިދާރާތަކުން އުސޫލުތައް ހަރުކަށި ކުރުމުން، އެ މައްސަލަ ދިމާވާން ފެށީ ހުޅުމާލޭގައެވެ. އަދި ހުޅުމާލޭގައި ދުއްވާ ވެހިކަލްތައް ގިނަވުމާއެކު އެކްސިޑެންޓު ހިނގާ މިންވަރު ވެސް އިތުރުވެގެންދިޔައެވެ.