އުސޫލުތައް އިސްލާހުކުރުމަށްފަހު، އަންނަ މަހު އަނެއްކާ ވެސް ޑޮމެއިންގެ ޚިދުމަތް އަލުން ފަށަން ޓްރާންސްޕޯޓު މިނިސްޓްރީން މިއަދު ނިންމައިފިއެވެ.
ޑޮމެއިންގެ ޚިދުމަތް ދިނުން އެ މިނިސްޓްރީން ހުއްޓައިލީ، ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް މިދިޔަ ސަރުކާރުގައި ފެންމަތިވުމުންނެވެ. އެއާއެކު އެ މައްސަލަތައް ވަކި ގޮތަކަށް ނިމެންދެން ޑޮމެއިންގެ ހުރިހާ ޚިދުމަތެއް ހުއްޓުވީ މިދިޔަ ސަރުކާރުގައި ރައީސް އޮފީހުންނެވެ.
ޓްރާންސްޕޯޓު މިނިސްޓްރީން މިއަދު ކުރި އިއުލާނުގައިވަނީ އެ މިނިސްޓްރީން މަސައްކަތް ކުރަމުން ގެންދަނީ، މި ފެށޭ ނޮވެމްބަރު މަހުގެ ތެރޭގައި ޑޮމެއިންގެ ޚިދުމަތްތައް އަލުން ފަށައި، ދިމާވެފައިވާ މައްސަލަތައް ހައްލު ކުރުމުގެ މަސައްކަތް ފެށުމަށް ކަމަށެވެ.
އެ މިނިސްޓްރީން ބުނީ، މިހާރުގެ އަމާޒަކީ، ރެކޯޑުތައް ބަލަހައްޓައި، މޮނިޓަރުކުރާނެ ހަރުދަނާ ނިޒާމެއް ޤާއިމުކުރުމާއެކު، އަލުން ޑޮމެއިންގެ ޚިދުމަތް ފޯރުކޮށްދިނުމުގެ މަސައްކަތް ފެށުން ކަމަށެވެ. އަދި ކުރިމަގުގައި ދިމާވެދާނެ މައްސަލަތައް މަދުކުރުމަށް ޓަކައި، އެކަށީގެންވާ ހަރުދަނާ އަދި ފުރިހަމަ ޤަވާއިދެއް އެކުލަވާލައި އެ ޤަވާޢިދާ އެއްގޮތަށް، ދެމެހެއްޓެނިވި ގޮތެއްގައި ޑޮމެއިންއާގުޅޭ ޚިދުމަތް ފޯރުކޮށްދިނުން ކަމަށެވެ.
ޚާއްސަކޮށް މިނިސްޓްރީން ފަށާ މަސައްކަތުގެ ތެރޭގައި، އެއްވެސް ފަރާތެއްގެ ޙައްޤަކަށް އުނިކަމެއް އަންނާނެ ކަމެއް އެކުލެވިގެން ނުވާނެކަމުގެ ޔަޤީންކަން ދޭކަމަށް މިނިސްޓްރީން ބުންޏެވެ. އަދި މިނިސްޓްރީގެ މަޤްޞަދަކީ، ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ޤާނޫނާއި ގަވާއިދުގެ ތެރެއިން ލުއިފަސޭހަ ގޮތެއްގައި ހައްލު ހޯދައިދީ، ރައްޔިތުންގެ އިތުބާރު ލިބިފައިވާ ޚިދުމަތަކަށް ހެދުން ކަމަށް ބުނެފައިވެއެވެ.
މި ބަދަލުތަކާއެކު، އަލުން ޑޮމެއިންގެ ޚިދުމަތްތައް ފަށާއިރު، ޢަމަލުކުރަންޖެހޭ އުސޫލުތައް ވެސް އިސްލާހު ކުރެވިގެންދާނެއެވެ. އަދި މީގެ އިތުރުން، ޑޮމެއިންގެ ޚިދުމަތް ފޯރުކޮށްދިނުމުގައި ދޫކުރެވޭ އެންމެހައި ލިޔެކިޔުންތަކަކީ ސެކިއުރިޓީ ފީޗާތައް އެކުލެވޭ ލިޔެކިޔުންތަކަށް ބަދަލުވާނެކަމަށް މިނިސްޓްރީން ބުންޏެވެ.
އެ ކަމަށް ޓަކައި މި ވޭތުވެދިޔަ 10 މަސް ދުވަހުގެ ތެރޭގައި ކުރެވުނު މަސައްކަތުން ވަރަށް އެކަށީގެންވާ ކުރިއެރުންތަކެއް ލިބިފައިވާ ކަމަށް ވެސް މިނިސްޓްރީން ބުންޏެވެ.
ޑޮމެއިންގެ ޚިދުމަތަކީ، ދިވެހިންގެ މެދުގައި އަދި ވަކިން ޚާއްސަކޮށް ޒުވާނުންގެ މެދުގައި، މަޤުބޫލުކަން ލިބިފައިވާ ޚިދުމަތެކެވެ. ޑޮމެއިން ގަތުމަށާއި އެކަމާ ގުޅުންހުރި ޚިދުމަތް ހޯދުމަށް އެ ފަރާތްތަކުން ބޮޑެތި ހޭދަތައް ވެސް ކުރެއެވެ.