ކ. ގުޅިފަޅު ކައިރިން ދެ ލޯންޗު ޖެހި ރޭ ހިނގި އެކްސިޑެންޓުގައި އަނިޔާވީ މީހުންގެ ތެރެއިން ދެ މީހަކަށް އަދިވެސް އައިޖީއެމްއެޗްގެ އެމަޖެންސީގައި ފަރުވާދޭކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗްގެ މީޑިއާ އޮފިޝަލަކު "ސަން"އަށް މައުލޫމާތު ދެއްވަމުން ވިދާޅުވީ، އެކްސިޑެންޓާ ގުޅިގެން 20 މީހުން ރޭ ހޮސްޕިޓަލަށް ގެންދިޔަ ކަމަށެވެ. އެމީހުންނަށް މާ ސީރިއަސް އަނިޔާތަކެއް ނުލިބޭކަން ފާހަގަކޮށް އޭނާ ވިދާޅުވީ، 18 މީހުން މިހާރު ދޫކޮށްލާފައި ވާކަމަށެވެ.
ދެ މީހަކަށް އެމަޖެންސީގައި ފަރުވާދޭ ކަމަށް ވިދާޅުވި ނަމަވެސް، އަނިޔާގެ ތަފުސީލެއް އޮފިޝަލް ހާމަނުކުރައްވައެވެ.
އެ އެކްސިޑެންޓާ ގުޅޭ ގޮތުން ރޭ ފުލުހުން ބުނީ، 12 މީހަކަށް އަނިޔާވެ ހޮސްޕިޓަލަށް ގެންދިޔަކަމަށެވެ. އަދި އެއްވެސް މީހަކަށް ސީރިއަސް އަނިޔާއެއް ނުލިބޭކަމަށް އޭރު ފުލުހުން ބުންޏެވެ.
ސޯޝަލް މީޑިއާގައި ދައުރަވަމުން އަންނަ ގޮތުގައި އެކްސިޑެންޓުވެފައި ވަނީ ގްރޭންޑް ޕާކް ކޮއްދިއްޕަރު ޕީކޭޑީ-10 ކިޔާ ލޯންޗަކާއި ފެރިދޫ ޓުއާޒްގެ ސެނޯރާ ކިޔާ ލޯންޗެކެވެ.
މި އެކްސިޑެންޓުގެ ރިޕޯޓު ފުލުހުންނަށް ލިބުނީ ރޭ 19:34 ހާއިރެވެ.
ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.