ދައުލަތުގެ ހިއްސާވާ ކުންފުނިތަކުގެ މާލީ ހާލަތު ބެލެހެއްޓޭނެ ރަނގަޅު ނިޒާމެއް ގާއިމުކުރުމަށްޓަކައި 'އެސްއޯއީ ފައިނޭންޝަލް ކޮންސަލްޓެންޓެއް' ހޯދަން ފިނޭންސް މިނިސްޓްރީން އިއުލާނުކޮށްފިއެވެ.
މިއީ 30،000 ރުފިޔާގެ މުސާރައެއް ކަނޑައަޅާފައިވާ އެއް އަހަރު ދުވަހުގެ ކޮންޓްރެކްޓެކެވެ.
ފިނޭންސް މިނިސްޓްރީން ކުރި އިއުލާނުގައި ބުނީ އެސްއޯއީތަކުގެ މާލީ ހާލަތު ބެލެހެއްޓޭނެ ރަނގަޅު ނިޒާމެއް ގާއިމުކުރުމަށްޓަކައި އެކައުންޓިން ނުވަތަ ފައިނޭންޝަލް ދާއިރާއިން ތައުލީމް ހާސިލްކޮށް ތަޖުރިބާ ލިބިފައިވާ ބޭފުޅުންނަށް އެ މަގާމަށް ކުރިމަތިލުމުގެ ފުރުސަތަށް ހުޅުވާލާ ކަމަށެވެ.
އެ ވަޒީފާއަށް ޝައުގުވެރިވާ ފަރާތްތަކުން 29 އޮކްޓޯބަރު ވާ އަންގާރަ ދުވަހުގެ މެންދުރު 13:00 ގެ ކުރިން 'އެކްސްޕްރެޝަން އޮފް އިންޓަރެސްޓް (އީއޯއައި)' މެއިލް މެދުވެރިކޮށް ހުށަހެޅުމަށް ވަނީ އެދިފައެވެ. އީއޯއައި ހުށަހަޅާއިރު އައިޑީ ކާޑު، ސީވީ އަދި ތައުލީމީ ސެޓްފިކެޓްތަކުގެ ކޮޕީގެ އޮތުރުން ވަޒީފާއަދާކުރިކަމުގެ ލިޔުންތައް ހުށަހެޅުމަށް ވަނީ އެދިފައެވެ.
މި މަސައްކަތާ ގުޅޭ މައުލޫމާތު ފިނޭންސް މިނިސްޓްރީގެ ވެބްސައިޓް މެދުވެރިކޮށް ލިބޭނެއެވެ. އަދި އިތުރު މައުލޫމާތު ހޯދުމަށް މިނިސްޓްރީއަށް އީމެއިލް މެދުވެރިކޮށް ލިޔުމަށް ވަނީ އެދިފައެވެ.
ވަޒީފާގެ ޝަރުތުތައް:
- އެކައުންޓިން، ފައިނޭންސް، ފައިނޭންޝަލް މެނޭޖްމަންޓް ނުވަތަ އެއާ އެއްވަރުގެ ޕްރޮފެޝަނަލް ސަނަދެއް ހާސިލްކޮށްފައިވުން.
- ޕްރައިވެޓް ސެކްޓާގައި ފައިނޭންޝަލް ޕާފޯމަންސް މޮނިޓަރިން އަދި އިވެލުއޭޝަންގެ ތަޖުރިބާ ހުރުން.
- ޕަބްލިކް ސެކްޓާގައި މަދުވެގެން ފަސް އަހަރު ދުވަހުގެ ފައިނޭންޝަލް ޕާފޯމަންސް މޮނިޓަރިން އަދި އިވެލުއޭޝަންގެ ތަޖުރިބާ ލިބިފައިވުން.
- ސަރުކާރު ހިއްސާވާ ވިޔަފާރިތައް މޮނިޓާކުރުމާއި އިވެލުއޭޓް ކުރުމާ ގުޅޭ ގޮތުން ޕަބްލިކް ސެކްޓާގެ ތަޖުރިބާ ހުރުން.
- މާލީ ނިންމުންތައް ނިންމުމުގެ ގާބިލުކަން ހުރުން.
- އިނގިރޭސި ބަހުން ލިޔުމާއި އަނގަބަހުން މުއާމަލާތު ކުރުމުގެ ހުނަރު ހުރުން.
- ފައިނޭންޝަލް ރިޕޯޓިން، ސްޓްރެޓެޖީ އެންޑް ގަވަނަންސް، މެނޭޖްމަންޓް އެކައުންޓިން، އޮޑިޓް އެންޑް އެޝުއަރެންސް، ފައިނޭންސް، ޓެކްސޭޝަން އަދި އިންޓާނަލް ކޮންޓްރޯލްތައް ކަނޑައެޅުން.
ފިނޭންސް މިނިސްޓްރީން އެސްއޯއީ ފައިނޭންޝަލް ކޮންސަލްޓެންޓެއް ހޯދަން އިއުލާނުކޮށްފައި މިވަނީ ސަރުކާރުން ޚަރަދުކުޑަކުރުމަށްޓަކައި މާލީގޮތުން ބޮޑެތި ފިޔަވަޅުތަކެއް އަޅަމުންދާ ދަނޑިވަޅެއްގައެވެ.
އެގޮތުން ސިޔާސީ މަގާމުތަކުގައި ތިއްބެވި ބޭފުޅުންނާއި ބައެއް މުއައްސަސާތަކުގެ ވެރިންނާއި ސަރުކާރު ހިއްސާވާ ކުންފުނިތަކުގެ ބައެއް މުވައްޒަފުންގެ މުސާރައިން ކުރިއަށް އޮތް ދެ އަހަރު ދުވަހުގެ މުއްދަތަށް 10 އިންސައްތަ އުނިކުރަން ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ.