ޗައިނާގައި އެޕަލްގެ ވިޔަފާރި ދަށަށްދާތީ އެ ކުންފުނީގެ ސީއީއޯ ޓިމް ކުކް މި އަހަރު ދެވަނަ ފަހަރަށް އެގައުމަށް ވަޑައިގެންފިއެވެ.
ޓިމް ކުކް ވީބޯގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ އޭނާގެ މިދަތުރުފުޅުގައި ޗައިނާގެ ޔުނިވާސިޓީ ދަރިވަރުންނާ ބައްދަލުކުރެއްވި ކަމަށެވެ. މި ބައްދަލުކުރެއްވުމުގައި ދެމެހެއްޓެނިވި ދަނޑުވެރިކަން ކުރިއެރުވުމަށް އެޕަލްގެ އުފެއްދުންތައް ބޭނުންކުރާ ގޮތް ދަރިވަރުން ދައްކުވައިދިން ކަމަށް އޭނާ ވިދާޅުވިއެވެ.
މީގެ އިތުރުން، ބެއިޖިންގެ ތާރީޚީ ސަރަޙައްދެއްގައި މަޝްހޫރު ފޮޓޯގްރާފަރު ޗެން މޭންއާއެކު ހިނގާލައްވާ މަންޒަރު ދައްކުވައިދޭ ވީޑިއޯއެއްވެސް ކުކް ހިއްސާކުރައްވާފައިވެއެވެ.
"ބެއިޖިންއަަށް އެނބުރި އައުމަކީ ވަރަށް އުފާވެރި ކަމެއް،" ކުކް ލިޔުއްވާފައިވެއެވެ.
އެޕަލްއަށް ފާއިތުވި ތިން މަސްދުވަހުގެ ތެރޭގައި 21.4 ބިލިއަން ޑޮލަރުގެ ފައިދާ ލިބުނު ކަމަށް ހާމަކޮށްފައިވެއެވެ. ނަމަވެސް، ފާއިތުވި އަހަރުތަކާ އަޅައިބަލާއިރު ޗައިނާގައި އެޕަލްގެ ވިޔަފާރި ދަށަށް ގޮސްފައިވާ ކަމަށް ތަފާސްހިސާބުން ދައްކައެވެ.
މިހާރު އެޕަލް އޮތީ ޗައިނާގެ މާކެޓްގައި ހަވަނައިގައި ކަމަށް ކެނަލިސް އިން ހާމަކޮށްފައިވެއެވެ.
ކުކް އެންމެ ފަހުން ޗައިނާއަށް ޒިޔާރަތްކުރެއްވީ މިއަހަރުގެ މާޗު މަހެވެ. އެ ދަތުރުފުޅުގައި ޝަންހާއީގައި އައު އެޕަލް ސްޓޯރެއް ހުޅުއްވައި، ބެއިޖިންގައި އޮތް ފޯރަމެއްގައި ބައިވެރިވެވަޑައިގަތެވެ.