ތައުލީމީ ދާއިރާއަށް ޚާއްސަކޮށްގެން ކުރިޔަށް ގެންދިއުމަށް ހަމަޖެހިފައިވާ "އެޑިއުޓެކް ސިމްޕޯޒިއަމް"ގައި ބައިވެރިވުމުގެ ފުރުސަތު ގައުމީ ޔުނިވަސިޓީ (އެމްއެންޔޫ)އިން ހުޅުވާލައިފިއެވެ.
މި ސިމްޕޯޒިއަމްއަކީ އެމްއެންޔޫގެ ސެންޓަ ފޯ އެޑިއުކޭޝަނަލް ޓެކްނޮލޮޖީ އެންޑް އެކްސެލެންސް ސެންޓަރުން ކުރިޔަށް ގެންދާ ހަރަކާތެކެވެ. މި ހަރަކާތް ބޭއްވުމަށް ހަމަޖެހިފައިވަނީ އަންނަ އަހަރުގެ ސެޕްޓެމްބަރު މަހުގެ 17އިން 18އަށެވެ.
އެމްއެންޔޫއިން ބުނީ މި ސިމްޕޯޒިއަމަކީ ރާއްޖެއާއި ރާއްޖޭން ބޭރުގެ ތައުލީމީ ދާއިރާގެ ތަފާތު އެކި ދާއިރާތަކުގައި މަސައްކަތް ކުރާ ފަރާތްތަކަށް ހުޅުވާލައިގެން ކުރިޔަށް ގެންދިއުމަށް ހަމަޖެހިފައިވާ ސިމްޕޯޒިއަމެއް ކަމަށެވެ. އެ ގޮތުން ޓެކްނޮލޮޖީގެ އެހީގައި އުނގެނުމާއި އުނގަންނައިދިނުމުގެ އެކި ހަރަކާތްތައް އެންމެ ރަނގަޅު ގޮތުގައި ކުރިޔަށް ގެންދެވޭނެ ގޮތްތައް ދެނެގަނެ، އެ ފަދަ ގޮތްތައް ފަހި ކުރެވޭނެ އީޖާދީ ވިސްނުންތައް މި ސިމްޕޯޒިއަމްގައި ހިއްސާ ކުރެވޭނެ ކަމަށް ބުނެފައިވެއެވެ.
ޒަމާނީ ތައުލީމެއް ފޯރުކޮށްދިނުމަށް ޓަކައި ޓެކްނޮލޮޖީ އިންޓަގްރޭޓް ކުރުމަކީ އަސާސީ ބޭނުމެއް ކަމަށްވާއިރު، މި ސިމްޕޯޒިއަމަކީ ފަންނިއްޔާތުގެ އެހީގައި ތައުލީމީ ދާއިރާ އިތުރު ހަރުފަތަކަށް ވާސިލުކޮށްދިނުމަށް މަދަރުސާތަކާއި، މަތީ ތައުލީމު ފޯރުކޮށްދޭ މަރުކަޒުތަކަށް ލިބޭނެ ރަނުގެ ފުރުސަތެއް ކަމަށް އެ ސެންޓަރުން ފާހަގަ ކުރެއެވެ.
މީގެ އިތުރުން މި ސިމްޕޯޒިއަމްގައި ދިވެހިބަހާއި އިނގިރޭސިބަހުން ވެސް ބައިވެރީންނަށް ހުށަހެޅުންތައް ހުށަހެޅުމުގެ ފުރުސަތު ވަނީ ހުޅުވާލެވިފައެވެ. އަދި އަމިއްލަ ގޮތުންނާއި ތައުލީމު ފޯރުކޮށްދޭ މަރުކަޒު ތަމްސީލުކުރާ ގޮތަށް ވެސް ބައިވެރިވެވޭނެ ގޮތް ވަނީ ހަމަޖެހިފައެވެ.
މި ސިމްޕޯޒިއަމްގައި ދާއިރާގެ ފުންނާބު އުސް މާހިރެއްގެ ތަގުރީރު ކުރުމާއި، އުނގެނުމާއި އުނގަންނައިދިނުމުގައި ޓެކްނޮލޮޖީ ބޭނުން ކުރުމާ ގުޅޭ ގޮތުން ޕެނަލް ޑިސްކަޝަންތައް ވެސް ކުރިޔަށް ގެންދާނެއެވެ. އަދި އެ ދާއިރާގައި ބޭނުންކުރެވޭ އެކި ޓެކްނޮލޮޖީތަކާއި ގެޖެޓްތައް ދައްކާލުމަށް ބާއްވާ "އެޑިއުޓެކް އެގްޒިބިޝަން"އެއް ވެސް ކުރިޔަށް ގެންދިއުމަށް ވަނީ ހަމަޖެހިފައެވެ.
މި ސިމްޕޯޒިއަމްގެ ތީމެއްގެ ގޮތުގައި ކަނޑައަޅާފައިވަނީ "ލެވަރޭޖިން އެޑިއުކޭޝަން ތްރޫ ދި އެޑްވާންސްމަންޓް އޮފް ޓެކްނޮލޮޖީ"އެވެ.
ސިމްޕޯޒިއަމްގެ ބައިވެރިންގެ ހުށަހެޅުންތަކުގެ ތެރެއިން ދެ ގިންތިއަކުން އެންމެ ރަނގަޅު ތިން ހުށަހެޅުމެއް ހޮވައި، "އެޑިއުޓެކް އެކްސެލަންސް އެވޯޑު" ނަމުގައި އެވޯޑެއް ދިނުމަށް ވެސް ވަނީ ނިންމައިފައެވެ. މި އެވޯޑު ދޭނީ އަމިއްލަ ގޮތުންނާއި ތައުލީމު ފޯރުކޮށްދޭ މަރުކަޒު ތަމްސީލުކުރާ ގޮތަށް ހުށަހަޅާ ހުށަހެޅުންތަކަށް ވަކިވަކީންނެވެ.
އެމްއެންޔޫގެ ވެބްސައިޓު މެދުވެރިކޮށް މި ސިމްޕޯޒިއަމްގައި ރެޖިސްޓާ ވެވޭނެއެވެ.