ރައީސް ޑރ. މުހައްމަދު މުއިއްޒު ވަނީ ސިނގިރޭޓާއި ބިޑިން ނަގައި ޑިއުޓީ ދެގުނައަށް ބޮޑުކޮށް، ވޭޕާއި އީ-ސިނގިރޭޓު ބޭނުންކުރުން އެއްކޮށް މަނާކުރަން ނިންމަވައިފައެވެ. އެ މަސައްކަތް ރައްޔިތުންގެ މަޖިލީހުގައި އަންނަނީ ކުރަމުންނެވެ.
ރައީސް ނިންމެވި ކަންކަމުގެ ތެރޭގައި ހިމެނެނީ:
- އެކްސްޕޯޓް އިމްޕޯޓްގެ ގާނޫނުގެ ހަތްވަނަ މާއްދާގެ ޗެޕްޓަރު 24ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރުން.
- މި މުދަލުން ނެގޭ އެޑްވަލޮރަމް ރޭޓް 50 އިންސައްތަ މަތިކުރުން.
މި ބަދަލުތަކާ އެކު ސިނގިރޭޓުގެ އަގު އެތައް ގުނައެއް ބޮޑުވާނެއެވެ. ރައީސް ވަނީ ވޭޕާއި އީ-ސިނގިރޭޓު ބުއިމާއި، ވިއްކުމާއި، ބޭނުންކުރުން ވެސް ޑިސެމްބަރު 15ގެ ނިޔަލަށް މަނާކުރަން ނިންމަވައިފައެވެ. މިއީ، ތާރީޚީ ފިޔަވަޅުތަކެކެވެ.
މި ހަފުތާގެ 'ސަން އެޑިޓާސް ޓޯކް' ޕޮޑްކާސްޓްގައި ދެއްކީ މި ވާހަކައެވެ. އެ ގޮތުން، ޕޮޑްކާސްޓްގައި ސަންގެ ޕޮލިޓިކަލް އެޑިޓަރު އަހުމަދު އިނާހް ވިދާޅުވީ، ދުންފަތާ ދެކޮޅަށް ސަރުކާރުން ނިންމީ މުހިންމު ނިންމުންތަކެއް ކަމަށެވެ.
އެކަމަކު، ސިނގިރޭޓުން ނަގައި ޑިއުޓީ ދެގުނައަށް ބޮޑުކުރުމަށް ވުރެ، ވަކި އަހަރަކުން ފެށިގެން ވަކި އުމުރަކުން ފެށިގެން ސިނގިރޭޓާއި ދުންފަތް މަނާކުރުން މާ ރަނގަޅުވާނެ ކަމަށް އޭނާ ވިދާޅުވިއެވެ.
އިނާހް ވިދާޅުވީ، މި ގެނައި ގާނޫނީ ބަދަލުތަކާ އެކު އެންމެ އާދައިގެ އަގުހެޔޮ ސިނގިރޭޓު ރާއްޖެއަށް އެތެރެކޮށް ވިއްކަން ފެށުމުގެ ބިރުއެބައޮތް ކަމަށެވެ. އެހެންވެ، އެންމެ އާދައިގެ ސިނގިރޭޓާއި ދުންފަތުގެ ބާވަތްތައް އެތެރެނުކުރެވޭނެ ގޮތަކަށް ގާނޫނުގައި ހިމެނޭ ހުރިހާ ކަމެއް ވަށައިޖެހޭ ގޮތެއްގައި ތަންފީޒުކުރުމުގެ މުހިންމުކަން އޭނާ ފާހަގަކުރެއްވިއެވެ.
ޕޮޑްކާސްޓްގައި ސަންގެ މަލްޓިމީޑިއާ އެޑިޓަރު މުހައްމަދު ނާއިލް ހަފީޒް ވިދާޅުވީ، ވޭޕް މަނާކުރުމަކީ ވަރަށް ހަރުދަނާ ގޮތެއްގައި ސަރުކާރުން ނިންމި ނިންމުމެއް ކަމަށެވެ.
އެ ގޮތުން، ކުޑަކުދިންގެ މެދުގައާއި ޚާއްސަކޮށް ސްކޫލަށްދާ އުމުރުގެ ކުދިންގެ މެދުގައި ވޭޕް ބޭނުންކުރުން އާންމުވެފައިވާ މިންވަރުގެ މައްޗަށް އޭނާ ވަނީ އަލިއަޅުއްވައިލައިފައެވެ. ޒުވާނުންގެ މެދުގައި މިކަން މަގުބޫލުވެފައިވާ މިންވަރާ މެދު އޭނާ ވަނީ ކަންބޮޑުވުން ފާޅުކުރައްވައިފައެވެ.
ނާއިލް ވިދާޅުވީ، ވޭޕް ބޭނުންކުރަން ފެށުމުގެ ސަބަބުން މަސްތުވާތަކެތި ބޭނުންކުރުމަށް ވެސް މަގުފަހިވާ ކަމަށެވެ.
މި ނިންމުމަށް އިނާހް ވެސް ނާއިލް ވެސް ވަނީ މަރުހަބާ ކިޔައިފައެވެ. ޕޮޑްކާސްޓްގައި ދުންފަތުން ނަގައި ޑިއުޓީ ބޮޑުކުރުމާއި ވޭޕް މަނާކުރުމާ ގުޅޭ ގޮތުން ތަފާސްހިސާބުގެ އަލީގައި ވަރަށް ގިނަ ވާހަކަތަކެއް ދެއްކިއެވެ. މުޅި ޕޮޑްކާސްޓް އައްސަވާލައްވާށެވެ.