ސަރުކާރުގެ އިދާރާތައް ހިންގުން ހަރުދަނާ ކުރުމަށް، ތަފާސްހިސާބުތައް ބޭނުން ކުރާ މިންވަރު މިހާރަށް ވުރެ އިތުރު ކުރަން ޖެހޭ ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ، ގައުމީ ތަފާސްހިސާބުތަކުގެ ދުވަހާ ގުޅިގެން ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.
ހައިދަރު ވިދާޅުވީ، ރާއްޖޭގެ ތަފާސްހިސާބުގެ ނިޒާމަކީ ލާމަރުކަޒީ ނިޒާމެއް ކަމަށާއި ޒަމާނީ ފަންނިއްޔާތުގެ އެހީގައި މި ނިޒާމު އިތުރަށް ފުރިހަމަ ކުރަން ޖެހޭ ކަމަށެވެ.
އެ ނިޒާމަށް ނެގޭ މައުލޫމާތުތަކުގެ އަލީގައި ސިޔާސަތުތައް ބައްޓަންކޮށް، ރާއްޖޭގެ ތަރައްގީއަށް ދިމާވާ ގޮންޖެހުންތަކަށް އަވަސް ހައްލެއް ގެނައުމުގެ މަސައްކަތް ހަލުވި ކުރަން ޖެހޭ ކަމަށް ހައިދަރު ވަނީ ވިދާޅުވެފައެވެ.
ގައުމީ ތަފާސްހިސާބުގެ ދުވަހާގުޅުވައި ބޭއްވި ރަސްމިއްޔާތުގެ ތެރެއިން --- ފޮޓޯ/ ހައުސިން މިނިސްޓްރީ
އެގޮތުން، ދައުލަތުގެ ހުރިހާ އިދާރާތަކުން އެކުލަވާލާ ތަފާސްހިސާބުތައް ރަނގަޅަށް ބެލެހެއްޓުން ވަރަށް މުހިންމުކަން މިނިސްޓަރު ވަނީ ފާހަގަކުރައްވާފައެވެ.
ހަމަ އެއާއެކު، ޤައުމުގެ ކުރިއެރުމަށްޓަކައި އިދާރާތަކާއި ކައުންސިލްތަކުގައި ހަރަކާތްތެރިވާ އެންމެންވެސް ތަފާސްހިސާބަށް އަހުލުވެރި ކުރެވި، ކަންކަން ނިންމުމުގަޔާއި އިދާރާތަކުގެ ހިންގުން ހަރުދަނާ ކުރުމަށް، ތަފާސްހިސާބު ބޭނުންކުރާ މިންވަރު މިހާރަށްވުރެ އިތުރުކުރަން ޖެހޭ.
އިތުރަށް ވާހަކަދައްކަވަމުން މިނިސްޓަރު ވިދާޅުވެފައި ވަނީ އަދުގެ ޒުވާން ޖީލަކީ ޑޭޓާ ދެނެގަތުމަށާއި އޭގެ ބޭނުންކުރުމަށް އާދަވެފައިވާ، ޒަމާނީ ފަންނިއްޔާތުގެ އެހީގައި ތަރައްގީއަށް ކުރިމަތިވާ ގޮންޖެހުންތަކަށް އީޖާދީ ހައްލުތަކެއް ހޯދާ ބަޔަކަށް ހަދަން ޖެހޭ ކަމަށެވެ.
މިއަހަރަކީ ރާއްޖޭގައި ގައުމީ ފެންވަރެއްގައި ތަފާސްހިސާބުގެ ދުވަސް ފާހަގަކުރާ ތިން ވަނަ އަހަރު ކަމަށްވާއިރު، މިއަހަރުގެ ޝިއާރަކީ 'ސްޓެޓިސްޓިކްސް ފޯ އެން އިންޓެލިޖަންސް ޑްރިވަން ފިއުޗާ' އެވެ.