އިންޑިއާގެ މަޝްހޫރު ލަވަކިޔުންތެރިޔާ ކިޝޯރު ކުމާރުގެ ހަޔާތުގެ މައްޗަށް ބިނާކޮށް އުފައްދާ ބައޮގްރަފިކަލް ޑްރާމާ ކުޅެން އާމިރު ޚާނަށް ހުށަހަޅާފައިވާ ކަމަށް ރިޕޯޓުތައް ބުނެފިއެވެ.
ގިނަ ބައެއްގެ މެދުގައި މިހާރު ވެސް މަގުބޫލު ކުރީގެ ލަވަކިޔުންތެރިޔާ ކިޝޯރުގެ ބައޮޕިކް ގެނެސްދޭނީ ފިލްމު "ބަރުފީ"ގެ ޑައިރެކްޓަރު އަނޫރާގު ބާސޫ ކަމަށް ފިލްމީ ޚަބަރުތައް ބުނެއެވެ. އާމިރު ޚާނަށް ފިލްމު ހުށަހަޅާފައި ވާއިރު އަނޫރާގު އެންމެ ފުރަތަމަ މި ފިލްމު އުފައްދަން ބޭނުންވީ "ބަރުފީ"ގެ އެކްޓަރު ރަންބީރު ކަޕޫރުއާ އެކުއެވެ.
ނަމަވެސް ރަންބީރާ އެކު ފިލްމުގެ މަސައްކަތް ފެށޭގޮތް ނުވުމުން އަނޫރާގު މިހާރު ވަނީ އާމިރަށް ފިލްމު ހުށަހަޅާފައި ކަމަށާއި މި ބައޮޕިކްއާ ގުޅޭ ގޮތުން ދެ ފަރާތުގެ މެދުގައި މަޝްވަރާތައް ކުރިއަށްދާ ކަމަށް ފިލްމީ ޚަބަރުތައް ބުނެއެވެ.
ކުރީގެ މަޝްހޫރު ލަވަކިޔުންތެރިޔާ ކިޝޯރު ކުމާރު--ފޮޓޯ/ބޮލީވުޑްހަންގާމާ
އަނޫރާގު ބާސޫ އާއި ޓީ ސީރީސް ގުޅިގެން ގެނެސްދޭން ނިންމާފައިވާ މި ބައޮޕިކް އަކީ މި ދެ ފަރާތުން ވެސް ވަރަށް ބޮޑަށް އުފައްދަން ޝައުގުވެރިވާ ފިލްމެކެވެ. އާމިރު ޚާން އަކީ ކިޝޯރު ކުމާރުގެ ލަވަތަކަށާއި މިއުޒިކަށް ވަރަށް ބޮޑަށް ލޯބިކުރާ އެކްޓަރަކަށް ވުމުން ކިޝޯރުގެ ރޯލް އެންމެ ފުރިހަމައަށް އަދާ ކުރެވޭނީ އާމިރަށް ކަމަށް އަނޫރާގު ވަނީ ބުނެފައެވެ.
ފިލްމު ކުޅުމާ ދުރުގައި ދުވަސްކޮޅަކަށް ހުންނަން ބޭނުންވާ ކަމަށް އާމިރު ކުރިން ބުނެފައި ވިޔަސް އެކްޓަރަށް ހަ ފިލްމެއްގެ ސްކްރިޕްޓް މިހާރުވެސް ހުށަހަޅާފައިވާ ކަމަށާއި ނަމަވެސް އޭގެތެރެއިން އާމިރު ސޮއިކުރަން ނިންމާފައި ވަނީ ތިން ފިލްމަކަށް ކަމަށް ރިޕޯޓުތައް ބުނެއެވެ.
އޭގެތެރޭގައި ކިޝޯރު ކުމާރުގެ ބައޮޕިކް ފިލްމު، އިންޑިއާގެ ހާއްސަ ޕަބްލިކް ޕްރޮސެކިއުޓާ، އުޖްވަލް ނިކަމްގެ ބައޮޕިކް އަދި އާމިރުގެ ކާމިޔާބު ފިލްމު "ގަޖްނީ"ގެ ސީކުއަލް ފިލްމު ހިމެނެއެވެ.