ސޯޝަލް މީޑިއާގެ އެންމެ މަގުބޫލު މެސެޖިން އެޕްލިކޭޝަންތަކުގެ ތެރޭގައި ހިމެނޭ ވަޓްސްއެޕްގެ ވީޑިއޯ ކޯލްތަކަށް މުޅިން އައު ފީޗާތަކެއް ނެރެން ތައްޔާރުވެއްޖެއެވެ.
މިއަދު ޝާއިއުކުރި ރިޕޯޓެއްގައި ވަބެޓާއިންފޯއިން ރިޕޯޓުކުރި ގޮތުގައި، ވަޓްސްއެޕްގެ އެންޑްރޮއިޑް އެޕަށް ގެނައުމަށް ތައްޔާރުވަމުންދާ އައު ފީޗާތަކާއެކު، ވީޑިއޯ ކޯލްތަކާއި ފޮޓޯ ނެގުމުގެ ތަޖުރިބާއަށް އިންގިލާބީ ބަދަލެއް އަންނާނެއެވެ.
ވަޓްސްއެޕްގެ ބީޓާ ވާޝަން 2.24.22.10 ގައި ފާހަގަކުރެވުނު މި ފީޗާތަކަކީ، ވީޑިއޯ ކޯލްތަކުގައާއި ފޮޓޯ ނެގުމުގައި ފިލްޓަރުތަކާއި، ބެކްގްރައުންޑް އިފެކްޓްތަކާއި އެހެނިހެން ކެމެރާ އިފެކްޓްތައް ބޭނުންކުރެވޭނެ ގޮތް ތަޢާރަފުކުރާ އަޕްޑޭޓެކެވެ. މި ފީޗާގެ އަޕްޑޭޓެޑް ވާޝަން މިހާރު ޕްލޭ ސްޓޯރުގައި ލިބެން ހުރި ނަމަވެސް، އަދި ބޭނުންކުރެވެނީ ހަމައެކަނި ވަކި ބީޓާ ޓެސްޓަރުންގެ ގްރޫޕަކަށެވެ.
ވަޓްސްއެޕް ކެމެރާ އިފެކްޓްސް ---
ޕްރައިވަސީ ސެޓިންގްސްގެ ތެރެއިން އެކްޓިވޭޓްކުރެވޭ މި ފީޗާތަކުގައި ބައެއް އިފެކްޓްތަކަކީ މޫނުގެ ސިފަތަކާއި އަތުގެ ހަރަކާތްތަކަށް ބިނާކޮށް އޮޓޮމެޓިކުން އެކްޓިވޭޓްވާނެ އިފެކްޓްތަކެވެ. އަދި އަނެއްބައި އިފެކްޓްތައް ޔޫޒަރުންނަށް އަމިއްލައަށް އިޚްތިޔާރުކޮށް ބޭނުންކުރެވޭނެއެވެ. ޔޫޒަރުންގެ ފަސޭހައަށްޓަކައި، މި ފީޗާތައް ކެމެރާ ސްކްރީނުންނާއި ވީޑިއޯ ކޯލް އިންޓަފޭސް މެދުވެރިކޮށްވެސް އޮން/އޮފް ކުރެވޭނެއެވެ.
ސަލާމަތީ ގޮތުން އެންމެ މުހިންމު ކަމަކީ، މި އައު ފީޗާތައް އިތުރުކުރުމަށްފަހުގައިވެސް ވަޓްސްއެޕްގެ އެންޑް-ޓު-އެންޑް އެންކްރިޕްޝަން ދެމެހެއްޓޭނެ ކަމެވެ. މިއީ ވަޓްސްއެޕް ބޭނުންކުރާ ފަރާތްތަކުގެ ޕްރައިވަސީ ރައްކާތެރިކުރުމަށް އެޅޭ މުހިންމު ފިޔަވަޅެއްކަން ފީޗާ ޓްރެކަރުން ފާހަގަކޮށްފައިވެއެވެ.
މި އައު އަޕްޑޭޓް އާންމުކޮށް ބޭނުންކުރެވެން ފެށޭނެ ތާރީޚެއް އަދި ހާމަކޮށްފައެއް ނުވެއެވެ. އެހެންނަމަވެސް، ބީޓާ ޓެސްޓިން ކާމިޔާބު ވުމާއެކު، ކުރިއަށް އޮތް މަދު ދުވަސްތަކެއްގެ ތެރޭގައި ހުރިހާ ޔޫޒަރުންނަށް މި ފީޗާ ލިބޭނެ ކަމަށް ލަފާކުރެވެއެވެ.