ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް)އިން އަންނަ އަހަރުގެ ފުރަތަމަ ސެމިސްޓާގައި ކިޔަވައިދޭ 68 ކޯހަކަށް އެޕްލިކޭޝަން ހުށަހެޅުމުގެ ފުރުސަތު މާދަމާ ހުޅުވާލާނެކަން އިއުލާންކޮށްފިއެވެ.
އައިޔޫއެމްއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޔުނިވާސިޓީގެ ޑެޕިއުޓީ ވައިސް ޗާންސެލާ އޮފް އެކެޑެމިކް އެފެއާޒް، ޑރ. އައިޝަތު ވަހީދާ ވިދާޅުވީ އެޕްލިކޭޝަން ހުށަހެޅަން ހުޅުވާލާ ކޯސްތަކުގެ ތެރޭގައި ޕީއެޗްޑީ ލެވެލްގެ ތިން ކޯހަކާއި، މާސްޓާސް ލެވެލްގެ 17 ކޯހަކާއި ޕޯސްޓް ގްރެޖުއޭޓް އެއް ކޯހާއި ބެޗްލާސް ލެވެލްގެ 15 ކޯސް އަދި އެސޯސިއޭޓް ޑިގްރީގެ ދެ ކޯހާއި 11 ޑިޕްލޮމާ ކޯސް ހިމެނެއެވެ.
ހަމައެއާއެކު، އައިޔޫއެމްގައި ތަފާތު ޑިސިޕްލިންތަކުގެ ކޯސްތައް ކުރިއަށްގެންދާކަން އޭނާ ފާހަގަކުރެއްވިއެވެ. އޭގެ ތެރެއިން މިފަހަރު ހުޅުވާލަައިފައިވާ ފުރުސަތުތަކުގެ މައިގަނޑު ދާއިރާތަކަކީ:
- ގުރުއާން
- ޝަރީއާ އެންޑް ލޯ
- ފިގުހު
- އިސްލާމިކް ސްޓަޑީސް
- ލެންގުއޭޖް
- އެޑިއުކޭޝަން
- ފައިނޭންސް
- އެކައުންޓިން
- ލީޑާޝިޕް އެންޑް އެޑްމިނިސްޓްރޭޝަން
- މެނޭޖްމެންޓް
- ޖާނަލިޒަމް
"މި ކޯސްތަކަކީ އައިޔޫއެމް މާލެ ކެމްޕަހުގެ އިތުރުން ދިވެހިރާއްޖޭގެ އެކި ކަންކޮޅުތަކުގައި ކުރިއަށްގެންދިޔުމަށް ހަމަޖެހިފައިވާ ކޯސްތައް ކަމަށް ފާހަގަކޮށްލަން. މި ކޯސްތައް އިރާދަކުރެއްވީތީ އައިޔޫއެމްގެ މާލެ ކެމްޕަހުގެ އިތުރުން އައިޔޫއެމްގެ އަތޮޅުތެރޭގެ ހަ ލާނިން ސެންޓަރެއްގައި އަދި 14 އައުޓްރީޗް ސެންޓަރެއްގައި އެބަކުރިއަށްދޭ،" ޑރ. އައިޝަތު ވިދާޅުވިއެވެ.
އަންނަ އަހަރު އައިޔޫއެމްގެ ކޯސްތައް ކުރިއަށްދާނެ ލާނިން ސެންޓަރުތަކުގެ ތެރޭގައި:
- ރ. އުނގޫފާރު
- ޅ. ނައިފަރު
- ލ. ފޮނަދޫ
- ގދ. ތިނަދޫ
- ފުވައްމުލަކު ސިޓީ
- ސ. މީދޫ
ޑރ. އައިޝަތު ވިދާޅުވީ ބައެއް ކޯސްތައް އޮންލައިންކޮށް އަދި އޮންލައިންކޮށާއި ސެންޓަރަށް ހާޒިރުވެގެން ވެސް ކިޔަވާ ގޮތަށް 'ބްލެންޑެޑް'ކޮށް ކުރިއަށްގެންދާނެ ކަމަށެވެ. އޭގެ ތެރޭގައި މާސްޓާ އޮފް ޓީޗިން އެންޑް ލާނިން، މާސްޓާ އޮފް ޕަބްލިކް އެޑްމިނިސްޓްރޭޝަން އެންޑް ގަވަނެންސް، މާސްޓާ އޮފް ބިޒްނަސް މެނޭޖްމެންޓް، މާސްޓާ އޮފް އިސްލާމިކް ރިވީލްޑް ނޮލެޖް ލީޑާޝިޕް އެންޑް އެޑްމިނިސްޓްރޭޝަން އަދި ބެޗްލާ އޮފް އިމާމްޝިޕް ހިމެނޭކަން އޭނާ ފާހަގަކުރެއްވިއެވެ.
"އެހެންކަމުން ޖެނުއަރީ އިންޓޭކުގައި ވެސް އޮންލައިން މޯޑުގައި ތަފާތު ކޯސްތަކެއް ކުރިއަށްގެންދިޔުމަށް ހަމަޖެހިފައިވާކަން ފާހަގަކުރަން އަދި މި ފުރުސަތުތަކުގެ ބޭނުން ހިއްޕެވުމަށް ހުރިހާ ބޭފުޅުންގެ ފަރާތުން އެދެން،" ޑރ. އައިޝަތު ވިދާޅުވިއެވެ.
އައިޔޫއެމްއިން ބޭއްވި ނޫސްވެރިންގެ ބައްދަލުވުން: އައިޔޫއެމްގެ ބައެއް ކޯސްތައް އޮންލައިންކޮށާއި ބްލެންޑެޑް މޯޑްގައި ކުރިއަށްގެންދާނެ -- ފޮޓޯ/ އައިޔޫއެމް
ކޯސްތަކަށް އެޕްލިކޭޝަން ހުށަހަޅާނެ ގޮތާ ގުޅޭ ގޮތުން މައުލޫމާތު ދެއްވަމުން, އައިޔޫއެމްގެ ރަޖިސްޓްރާ އަހުމަދު ރައުފް އަބްދުﷲ ވިދާޅުވީ ތިން ގޮތަކަށް އެޕްލައި ކުރެވޭނެ ކަމަށެވެ. އޭގެ ތެރެއިން އެންމެ ފަސޭހަ ގޮތަކީ ޔުނިވާސިޓީގެ އެޑްމިޝަން ޕޯޓަލް ތެރެއިން އެޕްލައި ކުރުން ކަމަށް އޭނާ ވިދާޅުވިއެވެ.
ދެވަނަ ގޮތަކީ މާލޭގައި ހުންނަ އައިޔޫއެމްގެ މައި ކެމްޕަހަށް ނުވަތަ އަތޮޅުތެރޭގެ ލާނިން ސެންޓަރުތަކަށް ފޯމް ހުށަހެޅުމެވެ. އެގޮތުން އެޕްލިކޭޝަން ފޯމް ވެބްސައިޓުންނާއި ކެމްޕަހާއި ލާނިން ސެންޓަރުތަކުން ވެސް ލިބެން ހުންނާނެކަން ރައުފް ފާހަގަކުރެއްވިއެވެ.
އައިޔޫއެމްއެގެ ލާނިން ސެންޓަރެއް ނެތް ރަށަކުން ނުވަތަ މާލޭގައި ނޫން އެހެން ތަނެއްގައި ހުރެގެން އެޕްލައި ކުރަން ބޭނުންވާ މީހުންނަށް [email protected] އަށް އީމެއިލްކޮށްގެން ވެސް ފޯމް ހުށަހެޅޭނެ ކަމަށް އޭނާ ވިދާޅުވިއެވެ.
އެޕްލިކޭޝަން ފޯމާއެކު ހުށަހަޅާނީ އައިޑީކާޑު ކޮޕީއަކާއި ޕާސްޕޯޓް ސައިޒް ފޮޓޯއަކާއި މިހާތަނަށް ހޯދައިފައިވާ ސަނަދުތަކުގެ ކޮޕީއެވެ.
ރައުފް ވިދާޅުވީ އައިޔޫއެމްއިން ކިޔަވައިދޭ ތިން މޯޑުގައި ވެސް އިމްތިހާނު ހަދާނީ ކޮންމެވެސް އެއް ސެންޓަރެއްގައި ނުވަތަ ކެމްޕަހުގައި ކަމަށެވެ.
"އެހެންވީމަ ފުލީ އޮންލައިންކޮށް ހުރި ޕްރޮގްރާމްތަކުގައި ވެސް ދަރިވަރުން އެގްޒާމަށް ދާން ޖެހޭނީ އެ ދަރިވަރަކަށް އެންމެ ފަސޭހައިން ދެވެން އެ އޮންނަ ސެންޓަރެއް އެ ކުއްޖަކު އެގްޒާމާ ކައިރިވީމަ އިޚުތިޔާރު ކުރެވޭނެ،" އޭނާ ވިދާޅުވިއެވެ.
މީގެ އިތުރަށް ބްލެންޑެޑް މޯޑްގައި ކުރިއަށްގެންދާ ކޯސްތަކުގައި ސެމިސްޓާއަކު މަދުވެގެން އެއް ފަހަރު ކޮންމެ ވެސް އެއް ސެންޓަރަކަށް ނުވަތަ މައި ކެމްޕަހަށް ހާޒިރުވެގެން އުނގެނެން ޖެހޭނެ ކަމަށް ރައުފް ވިދާޅުވިއެވެ.
އައިޔޫއެމްގެ ކޯސްތަކުގެ މައުލޫމާތު ހޮޓްލައިން 7923247އަށް ގުޅައިގެންނާއި ވައިބާ އާއި ޓެކްސްޓް މެސެޖު މެދުވެރިކޮށް ވެސް ސާފުކުރެވޭނެއެވެ. ހަމައެއާއެކު ޔުނިވާސިޓީގެ ދެ ނަމްބަރު ކަމަށްވާ 3022120 އާއި 3022100 އަށް ގުޅުމުން ވެސް މައުލޫމާތު ލިބޭނެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އައިޔޫއެމްގެ ވައިސް ޗާންސެލަރު ޑރ. އަލީ ޒާހިރު ވިދާޅުވީ އެ ޔުނިވާސިޓީން ދެ ކަމަކަށް ވަރަށް ބޮޑަށް ސަމާލުކަން ދޭ ކަމަށެވެ.
"އެއް ކަމަކީ ކުދިންނަށް ލިބޭ ތައުލީމަކީ ފެންވަރު ރަނގަޅު، ކޮލިޓީ ތައުލީމެއް ފޯރުކޮށްދެވޭތޯ ބެލުން. އެހެންވީމަ އެކަމަށްޓަކައި ކުރަން ޖެހޭ ކަންތައްތައް ޔުނިވާސިޓީން މިދަނީ ވަރަށް ބާރަށް ކުރަމުން،" އޭނާ ވިދާޅުވިއެވެ.
އެ މަސައްކަތުގެ ތެރެއިން މުވައްޒަފުންގެ ފެންވަރު ރަނގަޅު ކުރުމަށް ޓަކައި ރާއްޖެއާއި ރާއްޖެއިން ބޭރުގައި ތަފާތު ތަމްރީނު ޕްރޮގްރާމްތަކުގައި ބައިވެރިކުރުވާ ކަމަށް އޭނާ ވިދާޅުވިއެވެ.
ދެވަނަ ކަމަކަށް ޑރ. އަލީ ޒާހިރު ފާހަގަކުރެއްވީ ދަރިވަރުން އުނގެނުމަށް ފަހިކޮށްދިނުމެވެ.
"އެންމެ މުހިންމު އަމާޒެއް އަޅުގަނޑުމެންގެ މި އޮތީ އެކުދިންނަށް. އެހެންވީމަ އެ ކުދިންނަށް ރަނގަޅު ތައުލީމެއް، އެކުދިންނަށް ރަނގަޅު ތަރުބިއްޔަތެއް، އެކުދިންނަށް ރަނގަޅު މާހައުލެއް، އެކުދިންނަށް ކަންކަން ފަސޭހަވެ ފަހިވެގެން ދިޔުމަކީ ޔުނިވާސިޓީން ވަރަށް ބޮޑަށް ވިސްނަމުންދާ ކަމެއް،" އޭނާ ވިދާޅުވިއެވެ.
އައިޔޫއެމްގެ އަންނަ އަހަރުގެ ފުރަތަމަ ސެމިސްޓާގެ ކޯސްތަކަށް އެޕްލިކޭޝަން ހުށަހަޅަން ފުރުސަތު ހުޅުވާލައިފައިވަނީ ޑިސެމްބަރު 31، 13:00ގެ ނިޔަލަށެވެ.