ރާއްޖޭގައި މިހާރު މަރުގެ ހުކުމް ތަންފީޒުކުރުމަށް ތައްޔާރުވަމުން ދާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނު ވިދާޅުވެއްޖެއެވެ.
ދާޚިލީ ވުޒާރާއިން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ މަރުގެ އަދަބު ތަންފީޒުކުރުމަށް ބަލަންޖެހޭ މިންގަނޑުތަކެއް އެެބަހުރިކަމަށެވެ. އަދި މިކަމަށް ބައިނަލްއަގްވާމީ ހުރިހާ ތަނެއްގައި ވެސް މިންގަނޑުތަކެއް ހުންނަކަން ވަޒީރު ވަނީ ފާހަގަކޮށްފައެވެ.
"އޭގެތެރޭގަ ކޯޓުން ގޮސް، މިއޮންނަ ހުރިހާ މަރުހަލާއެއްނިމި އެމީހާއަށް އެ ދެވޭ އަދަބަކީ އިއާދަނުކުރެވޭ އަދަބަކަށްވާތީ އެ ހުރިހާ މިންގަނޑަކުން ބަލަންޖެހޭ ހުރިހާ ކަމެއް ބަލާނިމި ކަނޑައެޅޭ އުސޫލުތަކެއެއްގެ މަތީން އެކަންތައް ކުރަނީ." ވަޒީރު ވިދާޅުވިއެވެ.
ވަޒީރު ވިދާޅުވީ ތަންފީޒީ މަރުހަލާގެ ހުރިހާ ކަމެއް ނިމި ސުވާލު ނުއުފެދޭ ދެ މީހެއްގެ މައްސަލަ އެބައުޅޭކަމަށެވެ.
ވަޒީރު ވިދާޅުވީ މަރުގެ ހުކުމް ތަންފީޒުކުރުމަށް މިހާރު ކުރިއަށްދަނީ ތައްޔާރުވާންޖެހޭ އުސޫލުތަކަކާއި ގަވާއިދު ތަކަށް ކަމަށާއި އެކަމަށް ބޭނުންވާތަނާއި މީހުން ތަމްރީނުކުރުމުގެ މަަސައްކަތް މިހާރު ކުރިއަށް ދާކަމަށެވެ.
ރައީސް އޮފީހުގައި މިއަދު ބޭއްވި ނޫސްވެރީންގެ ބައްދަލުވުމުގެ ތެރެއިން --- ފޮޓޯ/ ރައީސް އޮފީސް
"ދެން އޮތީ ތަންފީޒީ މަރުހަލާ، އެއަށް އަޅުގަނޑުމެން ތައްޔާރުވާންޖެހޭ އުސޫލުތަކަކާއި ގަވާއިދުތަކެއެއް އެބަހުރި އެކަމަށް ބޭނުންވާތަން ތައްޔާރުކޮށް މީހުން ތަމްރީނުކޮށް މި ކަންކަން އަޅުގަނޑުމެން މިހާރު މި ކުރަނީ. އަޅުގަނޑުމެންނަށް ޔަގީންކަންދޭން ކެރިދާނެ މި އިއުލާނު ކުރައްވާފައި ވާގޮތަށް އެ ކަން ކުރާނަން ދިވެހި ރާއްޖޭގައި."ވަޒީރު ވިދާޅުވިއެވެ.
މީގެ ކުރީން ވަޒީރު ވަނީ މަރުގެ އަދަބު ތަންފީޒުކުރުމަކީ މި ސަރުކުން ކުރަން ނިންމާފައިވާ މަސައްކަތެއް ކަމަށާއި ނަމަވެސް އެކަމާއި ގުޅިގެން ބަލަންޖެހޭ ގިނަ ކަންތައްތަކެއް ހުރިކަމަށް ވިދާޅުވެފައެވެ. އަދި މަރުގެ އަދަބު ތަންފިޒްކުރުމުގެ ކަންކަން ކުރާނި ގާނޫނާއި ގަވާއިދުގެ ތެރެއިންކަމަށް ވެސް ވަޒީރު އޭރު ވަނީ ވިދާޅުވިއެވެ.