ފުލުހުންގެ ކޮމިޝަނަރުގެ އޮފީހުގެ ވެރިޔާކަމުގައި ހުންނެވި އެސިސްޓެންޓް ކޮމިޝަނަރު އޮފް ޕޮލިސް އަހުމަދު ޝިފާން، ސާވިސް ޑިރެކްޓްރޭޓްގެ ވެރިޔާ ކަމަށް ބަދަލުކޮށްފިއެވެ.
މި ބަދަލު ގެނައި އިއްޔެއެވެ. އެކަމަކު، ބަދަލު ގެންނަންޖެހުނު ސަބަބެއް ފުލުހުން ހާމަކޮށްފައެއް ނުވެއެވެ.
ފުލުހުންގެ އޮފިޝަލަކު ވިދާޅުވީ، ފުލުހުންގެ ކޮމިޝަނަރުގެ އޮފީހުގެ ވެރިޔާކަމުން ޝިފާން ބަދަލުކުރީ ސާވިސް ޑިވޮލޮޕްމަންޓް ޑިރެކްޓްރޭޓްގެ ވެރިޔާގެ މަގާމަށް ކަމަށެވެ. އަދި، ކޮމިޝަނަރުގެ އޮފީހުގެ ވެރިޔާގެ މަގާމަށް އައްޔަންކުރީ އެސިސްޓެންޓް ކޮމިޝަނަރު އޮފް ޕޮލިސް މޫސާ އަލީއެވެ.
ބަދަލު ގެނައި ސީދާ ސަބަބެއް ނުބުނެ ފުލުހުން ބުނީ، އިދާރީ ބަހާތަކުގެ ހިންގުމަށް އަބަދު ވެސް ބަދަލުތައް ގެންނަ ކަމަށެވެ.
ފާހަގަކޮށްލެވޭ ގޮތުގައި ޝިފާނަކީ ފުލުހުންގެ އިސް ތަރުޖަމާނު ވެސް މެއެވެ.
ޝިފާންވަނީ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓްގެ ވެރިޔާގެ މަގާމާއި މާލެ ސިޓީ ޕޮލިސްގެ ވެރިޔާކަން ވެސް ކުރައްވައިފައެވެ. ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ވެސް ޝިފާން ފުލުހުންގެ ތަރުޖަމާނުކަން ކުރެއްވިއެވެ.