ހުޅުމާލޭ ފުރަތަމަ ފިޔަވަހީގައި ހުންނަ 'ރަށު' މާރުކޭޓުން 23 ބިދޭސީއަކު އިމިގްރޭޝަނުން އިއްޔެ އަތުލައިގެންފިއެވެ.
އިމިގްރޭޝަނުން ބުނީ، އެ ބިދޭސީންތައް އަތުލައިގަތީ ގަވާއިދާ ޚިލާފަށް ވިޔަފާރިކޮށް، މަސައްކަތް ކުރަމުންދާ ބިދޭސީން ބެލުމަށް އިއްޔެ ހިންގި ޚާއްސަ އޮޕަރޭޝަނެއްގައި ކަމަށެވެ.
މި ރެއިޑުގައި އެ މާރުކޭޓުގެ 15 ގޮޅިއެއް ބަލާ ފާސްކޮށް، 23 ބިދޭސީއަކު އަތުލައިގެންފައިވެއެވެ. އޭގެތެރޭގައި، 15 ފިރިހެނުންނާއި އަށް އަންހެނުން ހިމެނެއެވެ.
އިމިގްރޭޝަނުން ބުނި ގޮތުގައި، މި އޮޕަރޭޝަނުގައި ވަނީ އިމިގްރެޝަންގެ 30 އޮފިސަރުންނާއި ފުލުހުންގެ 24 އޮފިސަރުންނާއި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އިތުރުން އިކޮނޮމިކް މިނިސްޓްރީން ބައިވެރިވި ކަމަށެވެ.
މިދިޔަ މަހުގެ 29ގައި ހުޅުމާލޭގައި "މާސް އިންސްޕެކްޝަނެއް" ވެސް އިމިގްރޭޝަންގެ 200 އެއްހާ އޮފިސަރުންނާއެކު ކުރިއަށް ގެންދިޔައެވެ. އެ އިންސްޕެކްޝަންގައި 314 ތަނެއް ބަލައި ފާސްކޮށް 769 ބިދޭސީއަކާ ސުވާލު ކުރި ކަމަށް އިމިގްރޭޝަނުން މައުލޫމާތުދިނެވެ. އޭގެ ތެރެއިން ގަވާއިދާ ޚިލާފަށް އުޅޭ ބިދޭސީންނާއި ފިލައިގެން އުޅޭކަމަށް ރިޕޯޓުކޮށްފައިވާ ބިދޭސީން ހިމެނޭހެން 28 މީހަކު އެ އިދާރާގެ ބެލުމުގެ ދަށަށް ގެންދިޔައެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީންނަށް ބައެއް ދިވެހިން އެއްބާރުލުންދޭތީ އެކަން އެގޮތަށް ކުރުމުގެ ބަދަލުގައި، އެފަދަ ބިދޭސީން ގަވާއިދުގެ ތެރެއަށް ވެއްދުމަށް އެއްބާރުލުން ދިނުމަށް އިމިގްރޭޝަންގެ ކޮންޓްރޯލާ ޖެނެރަލް ޝައްމާން މުހައްމަދު ވަނީ މީގެ ކުރިން އެދިވަޑައިގެންފައެވެ.
އޭނާ ވިދާޅުވީ މަސައްކަތަށް ބޭނުންވާ ބިދޭސީންގެ ޑިމާންޑް ބޮޑުކަމަށެވެ. އެހެންކަމުން އެފަދަ ފަރާތްތަކާ ދޭތެރޭ ފިޔަވަޅު އެޅުމުގެ އެއްވެސް ނިޔަތެއް އިމިގްރޭޝަންގެ ނެތް ކަމަށާއި އޭގެ ބަދަލުގައި ގަވާއިދާ އެއްގޮތަށް އުޅުމަށް ޝައްމާން ނަސޭހަތްތެރިވިއެވެ.
ފާއިތުވި 10 މަސް ތެރޭގައި ގަވާއިދާ ޚިލާފުވެގެން ރާއްޖޭން 4،054 ބިދޭސީން އަނބުރާ ގައުމަށް ފޮނުވައިލާފައިވާ ކަމަށް އިމިގްރޭޝަނުން ބުނެފައިވެއެވެ.