ވެލާނާ އިންޓަނޭޝަނަލް އެއާޕޯޓު ތަރައްގީކޮށް އަޕްގްރޭޑްކުރުމަށް ޗައިނާގެ އެކްސްޕޯޓް އިމްޕޯޓް ބޭންކް (އެގްޒިމް) ބޭންކުން 2015ވަނަ އަހަރު ނެގި 378 މިލިއަން ޑޮލަރުގެ ލޯނު ދެއްކުމަށް ބޭނުންވާ 75 މިލިއަން ޑޮލަރު ސަރުކާރުން ރިފައިނޭންސް ކޮށްފިއެވެ.
ދަރަނި ރިފައިނޭންސްކުރުމަކީ ނަގައިފައިވާ ދަރަންޏެއް ދެއްކުމަށް އިތުރު ދަރަންޏެއް ނެގުމެވެ. އަދި ކުރީގެ ލޯނުތަކުގެ ޝަރުތުތައް އާ ލޯނަށް ބަދަލުވުމެވެ.
މި އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 23ވަނަ ދުވަހެވެ.
އިއްޔެ އޮތް މާލިއްޔަތު ކޮމިޓީގެ ބައްދަލުވުމުގައި ވަނީ ފިނޭންސް މިނިސްޓްރީން މިކަމާ ގުޅޭގޮތުން ކޮމިޓީއަށް ފޮނުވި ސިޓީ ހާމަކޮށްފައެވެ.
އެ ސިޓީގައިވާ ގޮތުން 74،767،599.98 އެމެރިކާ ޑޮލަރު ރިފައިނޭންސް ކުރުމަށް އެއްބަސްވުމެއްގައި ވަނީ ސޮއިކޮށްފައެވެ.
މި ލޯނުގެ ދަށުން ދައްކަންޖެހޭ ފުރަތަމަ އިންޓަރެސްޓް ޕޭމަންޓު ދައްކަން ޖެހެނީ 21 ޖެނުއަރީ 2025ގައެވެ. އެއަށްފަހު ކޮންމެ އަހަރެއްގެ 21 ޖެނުއަރީ އަދި 21 ޖުލައިގައި އިންޓަރެސްޓް ޕޭމަންޓުތައް ދައްކަން ޖެހޭނެއެވެ. އިންޓަރެސްޓް ރޭޓަކީ ދެ ޕަސެންޓެވެ. އެއީ 3.3 މިލިއަން ޑޮލަރެވެ.
ދަރަނި އަނބުރާ ދައްކަންޖެހޭ މުއްދަތަކީ ތިން އަހަރުގެ ގްރޭސް ޕީރިއަޑެއް ހިމަނައިގެން ހަ އަަހަރެވެ. އެހެންކަމުން 2030ވަނަ އަހަރު މި ލޯނު ދައްކައި ނިންމަން ޖެހޭނެއެވެ.
މިއީ ނޮން ކޮންޑިޝަނަލް ޓާމްސްގައި ނަގާ ލޯނެކެވެ.
ފިނޭންސް މިނިސްޓްރީން އެ ސިޓީގައި ބުނި ގޮތުގައި މި ދަރަނި ރިފައިނޭންސްކުރި މައިގަނޑު ސަބަބުތަކަކީ މެދުރާސްތާގައި ދައްކަންޖެހޭ ދަރަނި ދެއްކުމުގައި ދައުލަތަށް ލުއިތަކެއް ހޯދުމެވެ. އަދި ދައުލަތުގެ ރިޒާވުން ކުރަންޖެހޭ ހޭދަ ކުޑަކުރެވި ދައުލަތުގެ މާލީ ހާލަތު ރަނގަޅުކުރުމެވެ.