އީރާނަށް ޖާސޫސުކޮށްދޭ އިސްރާއީލު ބަޔަކު އަތުލައިގެންފައިވާ ކަމަށް އިސްރާއީލުގެ ޖާސޫސީ އިދާރާ ޝިން ބެޓާއި ފުލުހުން ހޯމަ ދުވަހު އިއުލާންކޮށްފިއެވެ.
ޝިން ބެޓާއި ފުލުހުން ގުޅިގެން ނެރުނު ބަޔާނަކާ ހަވާލާދީ ރޮއިޓާސްއިން ބުނީ ހައިފާ ހިމެނޭ ގޮތަށް އިސްރާއީލުގެ އުތުރުން އިސްރާއީލުގެ ހަތް މީހަކު ހައްޔަރުކޮށްފައި ވަނީ އިސްރާއީލުގެ އަސްކަރީ މަރުކަޒުތަކާއި ހަކަތަ އާއި ބަނދަރުގެ އިންފްރާސްޓްރަކްޗާއާ ބެހޭ ގޮތުން ޖާސޫސީ މައުލޫމާތު އެއްކޮށްފައިވާ ކަމަށް ތަހުގީގުން އެނގުމުންނެވެ.
އިސްރާއީލުގެ ފުލުހުން ބުނީ އެ މައްސަލައަކީ މިހާތަނަށް އިސްރާއީލުން ފެނުނު އެންމެ ސީރިއަސް މައްސަލަތަކުގެ ތެރޭގައި ހިމެނޭ އެއް މައްސަލަ ކަމަށެވެ.
އެ މައްސަލައިގައި ކުޑަ ދެކުދިން ވެސް ހިމެނޭއިރު، ޖާސޫސީ މައުލޫމާތު ހޯދުމަށް އެމީހުންނާ ހަވާލުކޮށްފައި ވަނީ އީރާނުގެ ޖާސޫސީ ޚިދުމަތުގެ ދެ އޭޖެންޓުން ކަމަށް އިސްރާއީލުގެ ބަޔާނުގައި ބުނެފައިވެއެވެ.
މައުލޫމާތު އެއްކުރި ތަންތަނުގެ ތެރޭގައި އުތުރުގެ ރަށެއް ކަމަށްވާ ހަދަރާގައި ހުންނަ އިންޖީނު ގެއަކާއި، ވައިގެ ބާރާއި ކަނޑުގެ ސިފައިންނާއި، އަސްކަރީ މަރުކަޒުތަކުގެ އިތުރުން އިސްރާއީލުގެ އަޔަން ޑޯމާއި ވައިގެ ދިފާއީ ބެޓެރީތަކާއި ބަނދަރުތައް ހިމެނޭ ކަމަށް އެ ބަޔާނުގައިވެއެވެ.
ޝައްކު ކުރެވޭ މީހުން މަސައްކަތް ކުރީ ލައްކައެއްހާ ޑޮލަރަށް ކަމަށާއި އޭގެ ތެރެއިން ބައެއް ޕްރޮސެސް ކޮށްފައިވަނީ ކްރިޕްޓޯކަރަންސީ ބޭނުންކޮށްގެން ކަމަށް ވެސް އެ ބަޔާނުގައި ބުނެފައިވެއެވެ.
ކުރިއަށް އޮތް ދުވަސްތަކުގައި އިސްރާއީލުގެ ޕީޖީ އޮފީހުން އެމީހުންނާ ދެކޮޅަށް ދައުވާ އުފުލާނެ ކަމަށް ބެލެވެއެވެ.
ސެޕްޓެމްބަރު މަހު ވެސް އިސްރާއީލުގެ ސަލާމަތީ ޚިދުމަތްތަކުން ވަނީ އިސްރާއީލުގެ ބޮޑު ވަޒީރު، ބެންޖަމިން ނަތަންޔާހޫ ހިމެނޭ ގޮތަށް، އިސްރާއީލުގެ ބައެއް މީހުން މަރާލުމަށް އީރާނުން ރޭވި ރޭވުމެއްގައި ބައިވެރިވި ކަމަށް ތުހުމަތު ކޮށް އިސްރާއީލުގެ މީހަކު ހައްޔަރުކޮށްފައެވެ.
އިސްރާއީލަކީ އީރާނުގައި ޖާސޫސީ އޮޕަރޭޝަންތައް ހިންގާ ކަމުގެ ދިގު ތާރީޚެއް އޮތް ގައުމެކެވެ. ޖާސޫސީ އޮޕަރޭޝަންތައް ހިންގައިގެން ޖުލައި މަހު ތެހެރާންގެ ދައުލަތުގެ ގެސްޓްހައުސްއެއްގައި ފަލަސްތީނުގެ މިނިވަން ކަމަށް މަސައްކަތްކުރާ، ޖަމާއަތް ހަމާސްގެ ސިޔާސީ ލީޑަރު އިސްމާއީލް ހަނިއްޔާ އަވަހާރަކޮށްލި ކަމަށް ވެސް އިސްރާއީލަށް ތުހުމަތުކޮށްފައިވެއެވެ. ނަމަވެސް އެކަމުގެ ޒިންމާ އިސްރާއީލުން ނަގާފައެއްނުވެއެވެ.