ޔުނިވާސަލް ފައުންޑޭޝަނުގެ ޚަރަދުގައި މި އަހަރު ތިން ޑޮކްޓަރަކަށް ސްޕެޝަލައިޒްވުމުގެ ފުރުސަތުދީ، މިއަދު އެ ސްކޮލަޝިޕްތައް ހަވާލުކޮށްފިއެވެ.
ރާއްޖޭން ބޭރުގައި ޞިއްޙީ ދާއިރާއިން މަތީ ތައުލީމު ހާސިލް ކުރުމަށް ބޭނުންވާ ދަރިވަރުންނަށް ރާއްޖޭން ބޭރުން ސްކޮލަޝިޕްގެ ޚާއްސަ ފުރުސަތު އެ ފައުންޑޭޝަނުން ހުޅުވައިލީ މިދިޔަ އަހަރު، އަލްމަރްހޫމް ޑރ. އިބްރާހީމް އުމަރު މަނިކުގެ ހަނދާނުގައެވެ.
މި އަހަރުގެ ސްކޮލަޝިޕްތައް ހަވާލުކުރީ، ޔުވިވާސަލްގައި ބޭއްވި ޚާއްސަ ރަސްމިއްޔާތެއްގައެވެ. މި ސްކޮލަޝިޕްގެ ފުރުސަތު މި އަހަރު ލިބުނު ފަރާތްތަކަކީ:
- ޑރ. ފާތިމަތު މިޝްފާ ވަސީމް (ކަރުން މަތީގެ ބަލިތަކަށް ޚާއްސަ)
- ޑރ. ނުހާ އަބްދުލް ރަހްމާން (ކުޑަކުދިންގެ ބަލިތަކަށް ޚާއްސަ)
- ޑރ. އާމިނަތު ނަޖުދާ (ސާޖަރީއަށް ޚާއްސަ)
ޔުނިވާސަލް ފައުންޑޭޝަނުން 2014ވަނަ އަހަރުން ފެށިގެން އަންނަނީ އެ ފައުންޑޭޝަނުގެ ޚަރަދުގައި ސްކޮލަޝިޕްގެ ފުރުސަތުތައް ދެމުންނެވެ.
މިދިޔަ 10 އަހަރު ތެރޭގައި އެ ފައުންޑޭޝަނުން ދީފައިވާ ސްކޮލަޝިޕްތައް:
- ޞިއްޙީ ދާއިރާއިން - 67
- އެކައުންޓިން އަދި ފައިނޭންސް ދާއިރާއިން - 4
- ބިޒްނަސް މެނޭޖްމަންޓް، އެޗްއާރް އެންޑް މާކެޓިން ދާއިރާއިން - 19
- ގްރެފިކްސް އެންޑް އިންޓީރިއާ ދާއިރާއިން - 3
- އެޑިއުކޭޝަން ދާއިރާއިން - 2
- އިންޖިނިއަރިން ދާއިރާއިން - 10
- ހޮސްޕިޓާލިޓީ އަދި ކަލިނަރީ ދާއިރާއިން - 9
- އައިޓީ ދާއިރާއިން - 3
- މެރިން ބަޔޮލޮޖީ ދާއިރާއިން - 1
- ޕައިލެޓް ޓްރެއިނިން - 3
ޔުނިވާސަލް ފައުންޑޭޝަނުން މިހާތަނަށް ރާއްޖޭން ބޭރުން 121 ސްކޮލަޝިޕްގެ ފުރުސަތު ދީފައިވާއިރު، މިހާރު ވެސް 15 ފަރާތަކުން ދަނީ އެ ސްކޮލަޝިޕްތަކުގައި ބޭރު ގައުމުތަކުގައި މަތީ ތައުލީމު ހާސިލް ކުރަމުންނެވެ. އޭގެ ތެރޭގައި ވެސް ގިނައީ ޞިއްޙީ ދާއިރާގެ ސްކޮލަޝިޕްތަކުގައި ކިޔަވަމުންދާ ފަރާތްތައް ކަމަށް އެ ފައުންޑޭޝަނުން ބުނެއެވެ.
އަދި މީގެ އިތުރުން 20 ފަރާތެއް، އެ ފައުންޑޭޝަންގެ ރިޒޯޓު އިންޓާންޝިޕްތަކުގައި ވެސް އެބަ ތިއްބެއެވެ. މިދިޔަ ހަ އަހަރު ތެރޭގައި 130 ކުދިން އިންޓާންޝިޕް ޕްރޮގްރާމް ވެސް ފުރިހަމަކޮށްފައެވެ.
ޔުނިވާސަލް ފައުންޑޭޝަނުން އަންނަނީ އެކި ޖަމިއްޔާތަކާއި ސަރުކާރުގެ އިދާރާތަކާ ގުޅިގެން ތަފާތު ޕްރޮގްރާމްތައް ހިންގަމުންނެވެ.
މީގެ ތެރޭގައި އިމާދުއްދީން ސްކޫލްގައި ސްޕެޝަލް އެޑިއުކޭޝަންގެ ހަތަރު ކްލާސްރޫމް އަޕްގްރޭޑްކުރުމާއި، އެންއައިއީއާ ގުޅިގެން ސެން ޓީޗަރުން ތަމްރީނު ކުރުމުގެ ވޯކްޝޮޕްތައް ހިންގުމާއި، ޓައިނީ ހާޓްސްއާއެކު ހާޓް ޗެކްއަޕް ކޭމްޕްތައް އިންތިޒާމްކުރުމާއި، އެމްއާރުސީ މެދުވެރިކޮށް ބަލިމީހުން ދަތުރުކުރުމަށް އެހީތެރިވެދިނުމާއި، ގޮނޑުދޮށް ސާފުކުރުމުގެ ހަރަކާތްތަކުގެ އިތުރުން އެހެން ހަރަކާތްތައް ކުރިޔަށް ގެންގޮސްފައިވެއެވެ.