ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އަށް ދައްކަންޖެހޭ ފައިސާ ނުދައްކާ ހުރި ވިޔަފާރިތަކުގެ ނަންތައް އާންމުކުރަން އެ އިދާރާއިން މިއަދު ނިންމައިފިއެވެ.
އެ އިދާރާއިން ނެރުނު އިއުލާނެއްގައި ވަނީ، އެ ކޯޕަރޭޝަންގެ ހިންގުން ހަރުދަނާކުރުމަށްޓަކައި ކުރަމުންދާ މަސައްކަތުގެ ތެރެއިން، އެ ކޯޕަރޭޝަނަށް އެކި ވިޔަފާރިތަކުން ދައްކަން ޖެހި ނުދައްކައިވާ ފައިސާ ހޯދުމަށްޓަކައި އަޅަންޖެހޭ ހުރިހާ ފިޔަވަޅުތަކެއް އަޅަން ނިންމާފައި ވާކަމަށެވެ.
އެގޮތުން، ކޯޕަރޭޝަނުން ވިޔަފާރި އުސޫލުން ދެމުން އަންނަ ޚިދުމަތްތަކަށް ދޫކޮށްފައިވާ ތަންތަން އަދި ތަރައްގީ ކުރަމުން އަންނަ ތަންތަނަށް ފައިސާ ދައްކަން ޖެހި ނުދައްކާ ހުރި ފަރާތްތަކުން މިއަދުން ފެށިގެން އަންނަ މަހުގެ 30ވަނަ ދުވަހުގެ ނިޔަލަށް ފައިސާ ދައްކައި ޚަލާސްކޮށް އެޗްޑީސީއަށް ދައްކަންޖެހޭ ފައިސާއެއް ނޯންނާކަން ޔަގީންކުރުމަށް އެ ކޯޕަރޭޝަނުން ވަނީ އެދިފައެވެ.
އެ މުއްދަތުގެ ތެރޭގައި ފައިސާދެއްކުމަށް އުޒުރުވެރިވާ ފަރާތްތަކަށް އިތުރު ނޯޓިސްއެއް ދީ، އެ ފަރާތްތަކުގެ މައުލޫމާތާއި އެޗްޑީސިއަށް ދައްކަންޖެހޭ ފައިސާގެ ތަފުސީލު އެޗްޑީސީގެ ވެބްސައިޓުގައި ޝާއިއުކުރާނެ ކަމަށް އެ އިއުލާނުގައި ވެއެވެ.
ސަރުކާރު އެހެން އިދާރާތަކުން ވެސް ދަނީ އެ އިދާރާތަކަށް ލިބެންޖެހޭ ފައިސާ ހޯދުމަށް މަސައްކަތް ކުރަމުންނެވެ. އެގޮތުން މަހުންމަހަށް ދައްކަންޖެހޭ ފައިސާ ނުދައްކާ ފަރާތްތަކުގެ ނަންތައް ބައެއް އިދާރާތަކުން މިހާރު ވެސް ހާމަކުރެއެވެ.