ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު ފަޒުލް ރަޝީދާއި، ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުއާޒު މުހައްމަދު ރަޝީދުގެ މައްޗަށް ކޮރަޕްޝަންގެ ތުހުމަތުކުރައްވައި، އެ ދެމީހުންގެ މައްސަލަ ބަލަންޖެހޭނީ ޖަލުގައި ބައިތިއްބައިގެން ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިރޭ ވިދާޅުވެއްޖެއެވެ.
މިފަހުން ވަނީ އެޗްޑީސީގެ ކޮރަޕްޝަންގެ ބޮޑެތި މައްސަލަތައް ފެންމަތިވެފައެވެ. މި މައްސަލަތައް، ތަހުގީގު ކުރަމުން ދަނިކޮށް ފަޒުލް މަގާމުން އިސްތިއުފާ ދެއްވިއެވެ. އަދި ފެނަކަ ހިންގުމުގައި ހުރި ގޮންޖެހުންތައް ފާހަގަކޮށް ދުވަސްކޮޅެއް ފަހުން މުއާޒު ވެސް ވަނީ އޭނާ ހުންނެވި މަގާމުން އިސްތިއުފާ ދެއްވައިފައެވެ.
ޕީއެންއެފުން ސިލްސިލާކޮށް ބާއްވާ ޖަލްސާތަކުގެ ތެރެއިން މިރޭ ބޭއްވި ޖަލްސާގައި ޔާމީން ވިދާޅުވީ ރައީސް ޑރ. މުހައްމަދު މުއިއްޒު އެންމެ ވަޒީރުކަން ދެއްވުމުން އެކަން ގަބޫލުނުކޮށް ހުއްޓައި ވަޒީރެއްގެ ފެންވަރުގައި ފަޒުލްއަށް އެޗްޑީސީގެ އެމްޑީކަން ދެއްވިކަމަށެވެ.
"މިހާރު އެއޮތީ އެޗްޑީސީން ނުހައްގުން ދޫކޮށްފައި އޮތް ލިސްޓު ވެސް ޕަބްލިކް ޑޮމެއިންއަށް އައިސް. ރައްޔިތުން އަރައިގަތީމަ ފަޒުލްއަށް މަޖުބޫރުވެގެން ފަޒުލް ނިކުތީ. ފަޒުލް އިސްތިއުފާ ދިނީ،" ޔާމީން ވިދާޅުވިއެވެ.
ކޮރަޕްޝަން ނައްތާލާނަމޭ ވިދާޅުވެ، ރައީސް މުއިއްޒު އެ ކުރައްވަނީ ކޮން މަސައްކަތެއްތޯ ޔާމީން ވަނީ ސުވާލުއުފައްދަވައިފައެވެ.
ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު ފަޒުލް ރަޝީދު -- ސަން ފޮޓޯ/ އަމަން ލަތީފް
"މިއަދުވެސް އެ ކޮރަޕްޝަންގެ ކަންކަން އޮތްއިރު، މިއަދުވެސް ފުލުހުން އެ ބުނަނީ ފަޒުލްގެ މައްސަލައިގަ ފުލުހުން ބަލާ މައްސަލައަކީ ކޮރަޕްޝަންގެ މައްސަލައެއް ނޫނޭ. ދައުލަތުގެ ލިޔުންތަކެއް ނައްތާލި މައްސަލަ. ކޮންކަމެއްހޭ މިކުރަނީ؟" ޔާމީން ވިދާޅުވިއެވެ.
"މި މުއިއްޒަށް އެނގެއެއް ނޫންތޯ، ފަޒުލްގެ މިއުޅޭ މައްސަލައަކީ ރައްޔިތުންގެ ފައިސާ ބޮޑު އަދަދުން އެ ބެހީ ނުހައްގުން ގޯތިތަކެއް ދީގެން. އޭގެ ތެރޭގަ މީނަގެ ކޮއްކޮއަށް ބޭބެއަށް އަންހެނުންނަށް ދެންވެސް ތިބި މީހުންނަށް އެ ދެނީ. ކޮރަޕްޝަން ނައްތާލާނަމޭ ބުނެފަ މިކަން ދިޔައީ މިހެން،" ޔާމީން ވިދާޅުވިއެވެ.
ފެނަކައިގެ މައްސަލަ ނަންގަވައި ޔާމީން ވިދާޅުވީ، މުއާޒުގެ މައްސަލަ ބަލަން ވެސް މި ސަރުކާރަކަށް ނުކެރޭނެ ކަމަށެވެ.
"މުއާޒު އެ ބުނާ ވާހަކައަކީ ތިމަންނައާ ބެހިލަބަލާށޭ. ތިމަންނަ މުއިއްޒު ފަލީހަތްކޮށްލާނަމޭ. ބަރަހަނާކޮށްލާނަމޭ. ހަމަ އެހާ ސްޓްރޯގްކޮށް އޭނަ އެ ބުނީ،" ޔާމީން ވިދާޅުވިއެވެ.
މި ސަރުކާރުގެ ހުރިހާ އިދާރާއެއްގައި ވެސް މިވަގުތު އޮތީ ކޮރަޕްޝަން ކަމަށާއި އެ ހުރިހާ ކަމެއް ވެސް ކުރަނީ ރައީސް މުއިއްޒަށް އެނގިވަޑައިގެން ކަމަށް ޔާމީން ވަނީ ތުހުމަތުކުރައްވައިފައެވެ. އެމަނިކުފާނު އެކަމާ ދެކޮޅުނަމަ އެއިން ކޮންމެ މީހަކާ ދޭތެރޭ މިހާރު ހުންނަންވާނީ ބޮޑެތި ފިޔަވަޅު އަޅުއްވާފައި ކަމަށް ޔާމީން ވިދާޅުވިއެވެ.
"މުއިއްޒު އެކަމާ ދެކޮޅު ނޫންވީމަ، އެކަމަށް ހިތްވަރު ދޭތީ، މިހާ ހިސާބަށް މިކަންކަން ދިޔައީ. ތަހުގީގެއް ވެސް ހިންގަން ބޭނުން ނުވަނީ އެ މައްސަލައިގެ ތެރެއަށް މުއިއްޒުގެ ނަން އަންނާނެތީ،" ޔާމީން ވިދާޅުވިއެވެ.
ފަޒުލްއަށް ހެކި ނައްތާލެވުނީ ރައީސް މުއިއްޒު އެކަމަށް ވަގުތު ދެއްވުމުން ކަމަށް ޔާމީން ވަނީ ތުހުމަތުކުރައްވާފައެވެ.
ފެނަކަ ކޯޕަރޭޝަން ލިމިޓެޑުގެ ކުރީގެ މެނޭޖިން ޑިރެކްޓަރު މުޢާޒް މުޙައްމަދު ރަޝީދު -- ފޮޓޯ/ ރައީސް އޮފީސް
"ފަޒުލް ހުންނަންވާނީ ޖަލުގައި. މުއާޒު ހުންނަންވާނީ ޖަލުގައި. [ޖަލުގައި] ހުރެގެން އެކުރާ ތަހުގީގެއް މިހާރު ކުރަންވާނީ. އެއީ ގާނޫނުއަސާސީގަ އެކަން އޮތްގޮތް،" ޔާމީން ވިދާޅުވިއެވެ.
"އެހެންވީމަ ނޫހުގެ ހެޑްލައިންތައް މިއަދު ކެޕްޗާ ކުރަންވީ އެންމެ ވަގުން ގިނަ، އެންމެ ކޮރަޕްޓް މީހުން ގިނަ، މުޅި ސަރުކާރު ދޮވެލައިފަ ނުކުމެ ތިބި ބައެއް މިހާރު މިތިބީ. އެމީހުން ކުރި ކަމެއް ނެތިއްޔާ ފަޒުލްގެ މައްސަލަ ބެލެންވީ. މުއާޒު މުހައްމަދު ރަޝީދުގެ މައްސަލަ ބެލެންވީ،" ޔާމީން ވިދާޅުވިއެވެ.
ބިންވެރިޔާ ސްކީމުގެ ތެރެއިން ހައްގު ނޫން ބަޔަކަށް ގޯތި ދިން މައްސަލައިގައި ފަޒުލްގެ މައްޗަށް ކުރަނީ، އެ ތަނުގެ ރަސްމީ ލިޔެކިޔުންތަކެއް ނައްތައިލަން އުޅުނު ކަމުގެ ތުހުމަތު ކަމަށް ފުލުހުން ވަނީ ބުނެފައެވެ.
މި މައްސަލައިގައި ނުހައްގުން ގޯތި ލިބުނު މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ. ނަމަވެސް ފަޒުން ވަނީ އޭނާއަށް ކުރާ ތުހުމަތުތަކަށް އިންކާރު ކޮށްފައެވެ.
ފުލުހުންގެ ތަހުގީގަށް ޖާގަދޭން ކަމަށް ބުނެ މިދިޔަ ޑިސެންބަރު 21ގައި ފަޒުލް މަގާމުން އިސްތިއުފާ ދެއްވިއެވެ.
ފުލުހުން ބުނީ ފަޒުލްގެ މައްޗަށް ކުރެވޭ ތުހުމަތުތަކާއެކު، މައްސަލައިގެ ތަހުގީގަށް އޭނާއާ ސުވާލުކޮށް ބަޔާން ނަގާފައިވާ ކަމަށެވެ. އަދި އޭނާ ފުރުން މަނާކުރުމަށް ނެރުނު އަމުރު އަދި ވެސް ދެމި އޮތް ކަމަށް ފުލުހުން ބުންޏެވެ.
މައްސަލައިގެ ތަހުގީގަށް ފުލުހުން ފަޒުލްގެ ގެ ބަލައި ފާސްކުރިއިރު ދަބަހެއްގެ ތެރެއިން މިލިއަނަކަށްވުރެ ގިނަ ރުފިޔާ ވަނީ ފެނިފައެވެ.