އިތުރު 10 ރަށަކާއެކު އެއްގަމު އުޅަނދު ދުއްވުމުގެ ލައިސަންސް ނެގޭ ރަށްތަކުގެ އަދަދު 39އަށް އިތުރުވެއްޖެއެވެ.
"ސަން" އަށް މައުލޫޫމާތު ދެމުން ޓްރާންސްޕޯޓް މިނިސްޓްރީގެ މީޑިއާ އޮފިޝަލް ވިދާޅުވީ އެއްގަމު އުޅަނދު ދުއްވުމުގެ ލައިސަންސް ދިނުމުގެ ހުއްދަ އިތުރު 10 ރަށެއްގެ ކައުންސިލަށް ދީފައި ވާކަމަށެވެ.
އޭގެތެރޭގައި ހިމެނެނީ:
* ހއ. މޮޅަދޫ ކައުންސިލް
* ހއ. އިހަވަންދޫ ކައުންސިލް
* ބ. ކެންދޫ ކައުންސިލް
* ވ އަތޮޅު ކައުން
* ހއ. ކެލާ ކައުންސިލް
* ތ. ވިލުފުށި ކައުންސިލް
* ރ. ހުޅުދުއްފާރު ކައުންސިލް
* ފ. ދަރަނބޫދޫ ކައުންސިލް
* ގދ. ގައްދޫ ކައުންސިލް
* މ. ދިއްގަރު ކައުންސިލް
ޓްރާންސްޕޯޓް މިނިސްޓްރީން ވަނީ މީގެ ކުރިން އެ ރަށްރަށުގައި މިކަމަށް މީހުން ތަމްރީނު ކޮށްފައި ވާކަމަށް ބުނެފައެވެ. އަދި އެ ތަމްރީނުތަކުގެ އެހީގައި އިތުބާރު ހިފޭ ގޮތަށް މި ޚިދުމަތް ފޯރުކޮށްދެވޭނެ ކަމަށް މިނިސްޓްރީން ވަނީ ބުނެފައެވެ.
މީގެ އިތުރުން އެ މިނިސްޓްރީން ވަނީ ލައިސަންސް ނަގަން ޢަމަލީ އިމްތިޙާނު ހެދުމުގައިވެސް ބޮޑެތި ބަދަލުތަކެއް ގެނައުމަށް މަޝްވަރާ ކުރާކަަމަށް ބުނެފައެވެ. އެ ގޮތުން ޢަމަލީ އިމްތިހާނު ހެދުން ފުލުހުންގެ ބެލުމުގެ ދަށުން ނުވަތަ މިކަމުގެ ހަރުދަނާ ސިސްޓަމެއް ގާއިމުކޮށްފައިވާ ފަރާތެއްގެ ބެލުމުގެ ދަށަށް ބަދަލުކުރުމަށް ވެސް މަޝްވަރާ ކުރިކަމަށް އޭރު މިނިސްޓްރީން ވަނީ ބުނެފައެވެ.
މި ބަދަލުތައް ގެނައުމުގެ މަގުސަދަކީ ލައިސަންސް ދޫކުރުމުގެ ނިޒާމު އިތުރަށް ހަރުދަނާކޮށް، މަގުމަތީގެ ރައްކާތެރިކަން އިތުރުކުރުން ކަމަށްވެސް މިނިސްޓްރީން ބުނެފައިވެއެވެ.