އިންޑިއާގެ ސިކުން ހިންގާ ވަކިވެގަތުމުގެ ހަރަކާތަށް ތާއީދުކުރާ ހަރުދީޕް ސިންގް ނިޖާރް ކެނެޑާގައި މިދިޔަ އަހަރު މަރާލި މައްސަލައިގައި ތުހުމަތު ކުރާ ކެނެޑާގައި ހުންނަވާ އިންޑިއާ ސަފީރު، ސަންޖޭ ކުމާރު ވަރުމާ އެކަމަށް ދެކޮޅު ހައްދަވައިފިއެވެ.
ކެނެޑާގެ ނެޓްވޯކް ސީޓީވީ ނިއުސްއަށް އާދީއްތަ ދުވަހު ދެއްވި އިންޓަވިއުއެއްގައި ސަންޖޭ ކުމާރު ވަރްމާއާ ސުވާލުކުރުމުން އޭނާ ވިދާޅުވީ އެއީ އޭނާގެ ބައިވެރިވުން އޮތް ކަމެއް ނޫން ކަމަށާއި އެއީ ސިޔާސީ ގޮތުން ކޮށްފައިވާ ތުހުމަތެއް ކަމަށެވެ.
އެ އިންޓަވިއު ދީފައިވަނީ އިންޑިއާ ސަރުކާރުގެ އެޖެންޓުން ކެނެޑާގައި ބޮޑެތި ޖިނާއީ ހަރަކާތްތަކެއް ހިންގާކަމުގެ ހެކިތައް ހޯދިފައިވާ ކަމަށް ކެނެޑާގެ ފުލުހުން ބުނިތާ ދެތިން ދުވަސް ފަހުންނެވެ.
ކެނެޑާގެ ބޮޑުވަޒީރު ޖަސްޓިން ޓްރޫޑޯގެ ސަރުކާރުން ހޯމަ ދުވަހު އިއުލާން ކުރި ގޮތުގައި ނީޖާރް މަރާލުމުގައި ބައިވެރިވި ކަމަށް ތުހުމަތުކޮށް، ވަރުމާ ހިމެނޭ ގޮތަށް އިންޑިއާގެ ހަ ޑިޕްލޮމެޓުންނާއި ކޮންސިއުލާ އޮފިޝަލުން ވަކިކުރަން ވަނީ ނިންމާފައެވެ.
ރޯޔަލް ކެނެޑިއަން މައުންޓެޑް ޕޮލިސް (އާރުސީއެމްޕީ) އިން ބުނީ އިންޑިއާ ސަރުކާރުގެ އޮފިޝަލުންނަށް ސީދާ ހެކި ހުށަހަޅާފައިވާ ކަމަށާއި އަނިޔާވެރިކަން ހުއްޓުވުމުގައި އެއްބާރުލުން ދިނުމަށް ގޮވާލައި މިކަންކަން ހައްލުކުރުމަށް ކެނެޑާގެ ގާނޫނު ތަންފީޒުކުރާ އިދާރާތަކުން ގުޅިގެން މަސައްކަތް ކުރުމަށް އެދިފައިވާ ކަމަށެވެ.
ނަމަވެސް އެއްވެސް ހެއްކެއް ލިބިފައި ނުވާ ކަމަށް ވަރުމާ ވަނީ އެ އިންޓަވިއުގައި ވިދާޅުވެފައެވެ.
އަދި ކެނެޑާގައި ތިބި ސިކުންނަށް ތާއީދުކުރާ އެކްޓިވިސްޓުންގެ މައުލޫމާތު އެއްކުރުމަށް ދުވަހަކުވެސް އިރުޝާދުދީ ނުވަތަ މަޖުބޫރުކޮށްފައި ނުވާ ކަމަށް ވެސް އޭނާ ވިދާޅުވިއެވެ. "އަޅުގަނޑު، އިންޑިއާގެ ހައި ކޮމިޝަނަރުގެ ހައިސިއްޔަތުން، ދުވަހަކުވެސް އެކަހަލަ ކަމެއް ނުކުރަން،" ސީޓީވީ ނިއުސްއަށް ދެއްވި އިންޓަވިއުއެއްގައި އޭނާ ވިދާޅުވިއެވެ.
ނަމަވެސް ކެނެޑާގައި ދިރިއުޅޭ 770،000 އެއްހާ ސިކް ކޮމިއުނިޓީގެ މެމްބަރުން ވަނީ ދިގު ޒަމާންތަކެއް ވަންދެން ނުރައްކާތަކާ ކުރިމަތިލާން ޖެހިފައިވާ ކަމަށް ބުނެފައެވެ. އެމީހުންގެ އަޑު ކަނޑުވާލަން މަސައްކަތް ކުރަނީ އިންޑިއާ ސަރުކާރުން ތުހުމަތުކޮށްފައިވެއެވެ.
ސިކުންނަށް ވަކި ދައުލަތެއް އުފައްދަން ހިންގާ "ޚާލިސްތާން" ކެމްޕެއިނަށް ތާއީދުކުރާ ސިކުންގެ މީހެއް ކަމަށްވާ ނީޖާރް މިދިޔަ އަހަރު ޖޫން މަހު ސިކުންގެ ފައްޅިއެއްގެ ބޭރުގައި މަރާލުމުގެ އަޑީގައި ތިބީ އިންޑިއާގެ ޖާސޫސުން ކަމަށް ކެނެޑާއިން ތުހުމަތުކުރެއެވެ.
ކެނެޑާއަށް 1997 ވަނަ އަހަރު ހިޖުރަކޮށް، 2015 ވަނަ އަހަރު އެ ގައުމުގެ ރައްޔިތަކަށްވި ނީޖާރަކީ ޓެރަރިޒަމާއި މީހުން މެރުމަށް ރޭވުމުގެ ތުހުމަތުގައި އިންޑިއާގެ އިދާރާތަކުން ހޯދަމުންދިޔަ މީހެކެވެ.
ނީޖާރު މަރާލި މައްސަލައިގެ ތަހުގީގަށްފަހު ހާމަ ކުރި ކަންކަމާ ގުޅިގެން ދެ ގައުމުގެ ގުޅުން ގޯސްވެ، ދެ ގައުމުން ވެސް ވަނީ އަނެއް ގައުމުގެ ޑިޕްލޮމެޓުން ބޭރުކޮށްފައެވެ. އަދި އިންޑިއާއިން ކެނެޑާގެ އިސްތިގުލާލަށް އަރައިގެންފައިވާކަން ވަރަށް ސާފުކޮށް އެގެން އެބައޮތް ކަމަށް ވެސް ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވިދާޅުވިއެވެ.