ރަސްފަރި ފަރު އާރާސްތުކޮށް، އިޔާދަކުރުމުގެ މަޝްރޫއުއަށް އެހީތެރިކަން ފޯރުކޮށްދޭން އެމްޑަބްލިއުއެސްސީން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)އާ އެކު ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގައި ސޮއިކޮށްފައިވަނީ، އީޕީއޭގެ ޑިރެކްޓަރު ޖެނެރަލް އިބްރާހިމް ނަޢީމާއި އެމްޑަބްލިޔުއެސްސީގެ މެނޭޖިން ޑިރެކްޓަރު ޢަބްދުލް މަތީން މުޙައްމަދެވެ.
އެމްޑަބްލިއުއެސްސީން ބުނީ، މި ފަހުމުނާމާގެ މަގުސަދަކީ އީޕީއޭއިން އިސްނަގައިގެން ކުރިއަށްގެންދާ ރަސްފަރީގެ ފަރުތަކާއި މުރަކަތައް އަލުން އިޔާދަކުރުމުގެ މަޝްރޫޢުއަށް އެ ކުންފުނިން ފަންނީ އެހީތެރިކަން ފޯރުކޮށްދިނުން ކަމަށެވެ.
ރަސްފަރި ފަރު އިއާދަކުރުމަށް އީޕީއޭއަށް އެހީވާން އެމްޑަބްލިއުއެސްސީން ފަހުމުނާއެއްގައި ސޮއިކޮށްފި --- ފޮޓޯ/ އީޕީއޭ
މިގޮތުން، މި މަޝްރޫޢުގައި ބޭނުންކުރަމުންދާ އާރުވީ ތިމާވެށި އުޅަނދުގައި އެ ކުންފުނިން ފެން ޕްލާންޓެއް ބެހެއްޓުމާއި ސާވޭކުރުމަށް ބޭނުންވާ ސާމާނު ހޯދައިދިނުމާއި ކުންފުނީގެ ޢިޖުތިމާއީ ޒިންމާގެ ދަށުން މަޝްރޫއަށް ބޭނުންވާ ފެން ފޯރުކޮށްދިނުމާއި ދަތުރުފަތުރުގެ އިންތިޒާމްތައް ހަމަޖައްސައިދިނުން ހިމެނޭ ކަމަށް އެމްޑަބްލިއުއެއްސީން ބުނެފައިވެއެވެ.
މި ފަހުމުނާމާއަކީ ރާއްޖޭގެ ކަނޑުގެ ވެށި ރައްކާތެރި ކުރުމަށް ސަރުކާރުން ކުރަމުންދާ މަސައްކަތަށް އެއްބާރުލުން ދިނުމަށް އެޅި މުހިންމު ފިޔަވަޅެއް ކަމަށް އެ ކުންފުނިން ބުނެފައިވެއެވެ.
އެމްޑަބްލިއުއެސްސީން ވަނީ، ތިމާވެށި ހިމާޔަތްކޮށް ރައްކާތެރިކުރުމަށް ކުރިއަށްގެންދާ މިފަދަ ހަރަކާތްތަކަށް އަބަދު ވެސް އެއްބާރުލުންދޭނެ ކަމަށް ބުނެފައެވެ.
ފާހަގަކޮށްލެވޭ ގޮތުގައި، ރަސްފަރި ފަރަކީ 1995 އިން ފެށިގެން ހިމާޔަތްކޮށްފައިވާ ފަރެކެވެ. އެ ފަރަށް އޮގަސްޓު 2021ގައި ވަނީ ބާޖެއް އަރައި، 2،800 އަކަ މީޓަރަށް ވުރެ ބޮޑު ސަރަހައްދެއް ހަލާކުވެފައެވެ.