ޓެކްސް ނުދައްކާނަމަ އެކައުންޓު ފްރީޒް ކުރެވޭ ގޮތަށް، ޓެކްސް ނުދައްކާ ފަރާތްތަކާމެދު އަމަލު ކުރާ އުސޫލުތައް ހަރުކަށި ކޮށްފިއެވެ.
މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން ވަނީ ޓެކްސް ނުދައްކާ ފަރާތްތަކާމެދު އަމަލުކުރުމަށް ހަމަޖެހިފައިވާ ތިން އުސޫލަކަށް ހަރުކަށި ބަދަލުތަކެއް ގެނެސްފައެވެ.
އެގޮތުން ބަދަލުތައް ގެނެސްފައިވަނީ ބޭންކް އެކައުންޓުގައި ހުރި ފައިސާ ހިފެހެއްޓުމާއި ބޭންކު އެކައުންޓު ބެލުމުގައި އަމަލު ކުރާނެ ގޮތުގެ އުސޫލާއި، ޓެކްސް ބަޔާން ހުށަނާޅާ ފަރާތްތަކާ މެދު ނުވަތަ ފައިސާ ނުދައްކާ ފަރާތްތަކާމެދު ފިޔަވަޅު އެޅުމުގައި އަމަލުކުރާނެ ގޮތުގެ އާންމު އުސޫލުގެ އިތުރުން، ޓެކްސް ބަޔާން ހުށަނާޅާ ނުވަތަ ފައިސާ ނުދައްކާ ފަރާތްތަކުގެ ނަން ހާމަކުރުމުގައި އަމަލުކުރާނެ ގޮތުގެ އުސޫލަށެވެ.
"ބޭންކް އެކައުންޓުގައި ހުރި ފައިސާ ހިފެހެއްޓުމާއި، ބޭންކު އެކައުންޓް ބެލުމުގައި އަމަލު ކުރާނެ ގޮތުގެ އުސޫލު"އަށް ގެނެސްފައިވާ އިސްލާހުގައިވާ ގޮތުން، މީރާއަށް ޓެކްސް ދައްކަންޖެހި، ނުދައްކައިވާ ފަރާތެއްގެ ބޭންކު އެކައުންޓުގައިވާ ފައިސާ ހިފެހެއްޓޭނީ، އެ ފަރާތްތަކަށް ދޭންޖެހޭ ނޯޓިސްތައް ފޮނުވާފައިވުމާއެކު، ކަންތައްތަކެއް ފުރިހަމަވާ ނަމައެވެ. އެއީ:
- އެ ފައިސާއަކީ ޖޫރިމަނާއާއި އިންޓްރެސްޓާ ނުލައި މީރާއިން ކަނޑައަޅާ ތްރެޝްހޯލްޑަކަށްވުރެ މަތީ އަދަދެއް ކަމުގައިވުން
- އެ ފައިސާއާ ގުޅޭގޮތުން, "އިންސްޓޯލްމަންޓަށް ބަހާލައިގެން ފައިސާ ދެއްކުމުގެ އުސޫލު"ގެ ދަށުން އެއްބަސްވުމެއްގައި ސޮއިކޮށްފައިނުވުން
- ދައުލަތުގެ އިދާރާއަކުން ނުވަތަ ދައުލަތުގެ 100 ޕަސަންޓު ހިއްސާ ނުވަތަ މެޖޯރިޓީ ހިއްސާ އޮންނަ ކުންފުންޏަކުން ލިބެންޖެހޭ ފައިސާއެއް ނުލިބުމާ ގުޅިގެން ނުދެއްކިވާ ފައިސާއެއް ކަމުގައިނުވުން
- ނުދައްކައިވާ ފައިސާއާއި ކަނޑައެޅޭނެ އެއްވެސް އިތުރު ފައިސާއެއް މީރާގައި ރިކޯޑުގައި ނެތުން
މި ހުރިހާ އިސްލާހެއް ވެސް މިއަދު ގެޒެޓުގައި ޝާއިއުކުރުމާއެކު އެ އިސްލާހުތަކަށް ވަނީ މިއަދުން ފެށިގެން އަމަލުކުރަން ފަށައިފައެވެ.