މާލީ ހިސާބުތައް އޮޅުވައިލައިފައި ހުރުމަކީ މިދިޔަ ސަރުކާރުގައި މަޖިލީހަށް ލިބުނު ސުޕަ މެޖޯރިޓީގެ ބޭނުން ނަހަމަގޮތުގައި ހިފުމުގެ ނަތީޖާކަމަށް ނައިބު ރައީސް ހުސައިން މުހައްމަދު ލަތީފު ވިދާޅުވެއްޖެއެވެ.
ދައުލަތުގެ ޚަރަދުތަކާ ގުޅޭ ގޮތުން ފިނޭންސް މިނިސްޓްރީން އާންމުކޮށްފައިވާ މައުލޫމާތުގައި ދެ ބިލިއަން ރުފިޔާ ހިސާބުނުކޮށް ހުރި ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވީ އިއްޔެ ބޭއްވި ނޫސްވެރިންގެ ބައްދަލުވުމެއްގައެވެ.
މިކަމާ ގުޅިގެން ނައިބު ރައީސް ކުރެއްވި ޕޯސްޓެއްގައި ވަނީ، މިއަދު ފެންނަނީ އެމްޑީޕީގެ ސުޕަ މެޖޯރިޓީ ބޭނުންކޮށްގެން ނަހަމަ ގޮތުގައި ކުރަމުންދިޔަ ކަންކަން ފަސްއަޅައި ފޮރުވުމުގެ ނަތީޖާ ކަމަށެވެ.
މީގެ އިތުރުން، ކޮވިޑު 19ގެ އާލަމީ ވަބާގައި ދިވެހި ދައުލަތަށް ލިބުނު އެހީތައް ވެސް ވަނީ މި ބީދައިން ފޮރުވައިފައި ކަމަށް ނައިބު ރައީސް ވަނީ ތުހުމަތު ކުރައްވައިފައެވެ.
"ގާނޫނު އަސަސީއާ ޚިލާފަށް ކޮށްފައިވާ ކަންކަމަށް ފުރިހަމައަށް ޖަވާބުދާރީ ވާން ޖެހޭ،" ނައިބު ރައީސް ލިޔުއްވާފައި ވެއެވެ.
ފިނޭންސް މިނިސްޓްރީން ކޮންމެ ހަފުތާއަކު އާންމުކުރަމުން އައި ވީކްލީ ފިސްކަލް ރިޕޯޓު މިދިޔަ ޖޫން މަހުން ފެށިގެން އާންމުނުކުރާކަން ފާހަގަކުރައްވައި، އިއްޔެ ޒަމީރު ވިދާޅުވީ ހިސާބުތައް އާންމުކުރުން ހުއްޓާލީ ރެކޯޑުތަކުގައި މައްސަލަތައް އުޅޭތީ ކަމަށެވެ. އޭގެ ތެރެއިން އެއް މައްސަލައަކީ މަޝްރޫއުތަކަށް ފައިސާ ދޫކުރުމަށް ފަހު، ރެކޯޑު ނުކުރުން ކަމަށް އޭނާ ވިދާޅުވިއެވެ.
އެ ހިސާބުތައް އިސްލާހު ކުރާނެ ގޮތާ ގުޅޭ ގޮތުން އޮޑިޓާ ޖެނެރަލްގެ ހުސައިން ނިޔާޒީއާ މަޝްވަރާ ކުރެއްވި ކަމަށް ޒަމީރު ވިދާޅުވިއެވެ.
"އަޅުގަނޑުމެންނަށް މިހާރު ފެންނަނީ ރެކޯޑު ކުރުމުގައި ގާތްގަނޑަކަށް ދެ ބިލިއަނެއްހާ ރުފިޔާގެ ތަފާތެއް އެބައުޅޭ. އޭގެ މާނައަކީ މި އަހަރުގެ ބަޖެޓުގައި އަޅުގަނޑުމެން ހިމަނައިފި ކަމަށްވަންޏާ މިދިޔަ އަހަރު ފާސްކުރި ބަޖެޓަށް ވުރެ ދެ ބިލިއަން އިތުރުވެގެންދާނެ،" އޭނާ ވިދާޅުވިއެވެ.
ޒަމީރު ވިދާޅުވީ އެ ހިސާބުތަކަށް ބަދަލު ގެންނާނީ ބަންޑާރަ ނައިބު އަހުމަދު އުޝާމްގެ ވެސް ލަފާ ހޯދުމަށް ފަހު ކަމަށެވެ.
މީގެ އިތުރުން، ވޭތުވެދިޔަ އަހަރުތަކުގައި ސަޕްލިމެންޓަރީ ބަޖެޓު ފާސްކުރަމުން އައީ މާލިއްޔަތު ގާނޫނާ ޚިލާފަށްކަމަށާއި އެކަމުގައި ޒިންމާވާންޖެހޭ ފަރާތްތަކާމެދު ފިޔަވަޅު އަޅާނެކަމަށް ވެސް އިއްޔެގެ ނޫސްވެރިންގެ ބައްދަލުވުމުގައި ބަންޑާރަ ނައިބު އަހުމަދު އުޝާމް ވިދާޅުވިއެވެ.
އޭނާ ވިދާޅުވީ، ފައިސާ ޚަރަދުކުރުމަށްފަހު ކުރިއަށްއޮތް އަހަރުގެ ބަޖެޓުގައި ސަޕްލިމަންޓެއްގޮތުގައި ހުށަހަޅައިގެން ސަޕްލިމެންޓަރީ ބަޖެޓު ފާސްކުރުމަކީ އެއްގޮތަކަށް ވެސް ގާނޫނު ދަންނަކަމެއް ނޫންކަމަށެވެ.
މި ވާހަކަތަކަށް ރައްދު ދެއްވައި ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވީ، މި ސަރުކާރުން ބަޖެޓުގެ ތަފާސްހިސާބުތައް ހާމަނުކުރަނީ އެއްވެސް މަޝްރޫއެއް ނުހިނގާއިރު ވެސް، ބަޖެޓުގެ ޚަރަދު ބޮޑުވެ، އިސްރާފު ގިނަވާތީ ކަމުގެ ހަގީގަތް އޮޅުވައިލަން ކަމަށެވެ.
މިދިޔަ ސަރުކާރުން ގޯހެއް ހަދާފައިވާނަމަ، އެ ކަމެއް ބަލައި، ތަފާސްހިސާބު ވެސް ހާމަކުރާހާ ދުވަސްވެއްޖެ ކަމަށް އަމީރު ވަނީ ވިދާޅުވެފައެވެ.