ފަތުރުވެރިކަމުގެ ދާއިރާގައި އޭޝިއާ ސަރަހައްދުން ހޯދާ ކާމިޔާބީތަކާއި ޚިދުމަތްތަކުގެ އަގު ވަޒަންކުރުމަށް ސައުތު އޭޝިއަން ޓްރެވަލް އެވޯޑްސް (ސަޓާ)އިން ދޭ އެންމެ ޝަރަފުވެރި އެއް އެވޯޑު ކަމަށްވާ "ފޭސް އޮފް ސައުތު އޭޝިއާ" އެވޯޑް ޗަމްޕާ ދެބެއިންނަށް މިއަދު ދީފިއެވެ.
ޗަމްޕާ ބްރަދާޒްގެ ޗެއާމަން މުޙައްމަދު މޫސާ (އުއްޗު)އަށާއި، ޗަމްޕާ ކްރައުން ގްރޫޕުގެ ޗެއާމަން ހުސައިން އަފީފަށް މި އެވޯޑް ހަވާލުކުރުން އޮތީ، މީރު މޯލްޑިވްސް ރިސޯޓުގައި މިއަދު ބޭއްވި ޚާއްސަ ހަފްލާއެއްގައެވެ.
އެ ބޭފުޅުންނަށް އެވޯޑު ހަވާލުކޮށްދެއްވީ ސަޓާގެ ނައިބު ރައީސް ސޫރަޖު ޚާނެވެ.
ސަޓާގެ ފޭސް އޮފް ސައުތު އޭޝިއާ އެވޯޑް އުއްޗުއަށް ހަވާލުކުރުން -- ފޮޓޯ/ ހައިރައިޒް
އެވޯޑާ ހަވާލުވުމަށްފަހު ވާހަކަދައްކަވަމުން އުއްޗު ވިދާޅުވީ އެ ފަދަ އެވޯޑެއް ލިބުމަކީ ވަރަށް ބޮޑަށް އުފާކުރައްވާ ކަމެއް ކަމަށާއި، އެ އެވޯޑް ދެއްވީތީ ޝުކުރު އަދައިކުރައްވާ ކަމަށް ވިދާޅުވެފައެވެ.
މީގެ އިތުރުން އަފީފް ވެސްވަނީ މި އެވޯޑް ލިބުމަކީ ވަރަށް އުފާކުރައްވާ ކަމެއް ކަމަށް ވިދާޅުވެފައެވެ.
"އަޅުގަނޑާއި އަޅުގަނޑުގެ ބޭބެ [އުއްޗު] މަސައްކަތްކޮށްދީފައިވަނީ މި ގައުމަށާއި ރައްޔިތުންނަށް އެންމެ ހެޔޮ ގޮތްތައް ހޯދައިދިނުމަށް،" އަފީފް ވިދާޅުވިއެވެ.
ސަޓާގެ ފޭސް އޮފް ސައުތު އޭޝިއާ އެވޯޑް އުއްޗުއަށް ހަވާލުކުރުން -- ފޮޓޯ/ ހައިރައިޒް
ހަމައެއާއެކު އަފީފްވަނީ ފަތުރުވެރިކަމުގެ ސިނާއަތުގައި ފަރުދާގެ ފުރަގަހުގައި ތިބި މަސައްކަތްތެރިންގެ އަގުވަޒަންކުރުމުގެ މުހިންމު ކަން ވެސް ފާހަގަކުރައްވައިފައެވެ.
މި ފަދަ އެވޯޑުތައް ދީ އަގުވަޒަންކުރުމާ ގުޅޭގޮތުން "ސަން"އާ ވާހަކަދައްކަވަމުން އެމްއެމްޕީއާރްސީގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ ރާއްޖޭގައި ފަތުރުވެރިކަން ފަށައިގަތުމަށް މީގެ 50 އެއްހައި އަހަރުކުރިން އެ ބޭފުޅުން ކުރެއްވި މަސައްކަތަކީ ފިލާވަޅު ލިބިގަންނަންޖެހޭ ކަމެއް ކަމަށެވެ. އަދި މިއަދު ދިވެހީންނަށް ލިބެމުން އަންނަ މަންފާއަކީ ވެސް އެ ބޭފުޅުން ޒުވާންއިރު ކުރި މަސައްކަތުގެ ސަބަބުން ލިބޭ އެއްޗެއް ކަމަށް ވިދާޅުވިއެވެ.
"މިކަހަލަ އެވޯޑްތަކަކީ އަސްލުގައި ވަރަށް މުހިންމު ކަމެއް. މިކަހަލަ އެވޯޑްތައް ދީ އެ މީހުން ކުރި މަސައްކަތުގެ އަގު ވަޒަންކުރުން ވަރަށް މުހިންމު،" ޝިއުރީ ވިދާޅުވިއެވެ.
އެމްއެމްޕީއާރްސީގެ މެނޭޖިން ޑިރެކްޓަރު އިބްރާހިމް ޝިއުރީ --
މި އަހަރު އޮތީ ސަޓާ އެވޯޑްސްގެ އަށްވަނަ އެޑިޝަނެވެ. މި އަހަރުގެ ސަޓާގެ އެވޯޑްސްގެ ގާލާ ނައިޓް ބާއްވައިފައިވަނީ ނޭޕާލްގެ ކަތަމަންޑޫގައެވެ.
މީގެކުރިން ސަޓާ އެވޯޑު ހަފުލާތައް ލަންކާގެ މައުންޓް ލަވިނިއާ އާއި ގައްލު ސިޓީގައި އަދި ރާއްޖޭގެ އައްޑޫ ސިޓީ އާއި މާލޭގައި އަދި އިންޑިއާގެ މުމްބާއީއާއި ބެންގަލޫރުގައި ވެސް ބާއްވާފައިވެއެވެ.
ހަމަމިއާއެކު ގޮންޖެހުން ބޮޑު ކޮވިޑްގެ ދުވަސްވަރު އޮންލައިންކޮށް ވެސް ސަޓާއިން ވަނީ އެވޯޑު ހަފުލާ ކުރިއަށްގެންގޮސްފައެވެ.
މި އެވޯޑާއެކު ސަޓާއިން ވަނީ އޭޝިއާގެ ފަތުރުވެރިކަން ކުރިއަރުވައި، ބައިނަލްއަގްވާމީ މާކެޓުން ބަލައިގަންނަ އެއްޗަކަށް ހެދުމަށް މަގުފަހިކޮށްދީފައެވެ.