ބުޅާ މަސް އަޅައިިގެން ކާ ތަކެތި ތައްޔާރުކުރިކަމުގެ ތުހުމަތުކުރެވުނު އެމްޑީ އަރަފާތު ހޮސައިން އެ ފަދަ ކަމެއް ކުރިކަމުގެ އެއްވެސް ހެއްކެއް ނުލިބޭ ކަމަށާއި އެހެންވެ ތަހުގީގު ހުއްޓައިލާފައިވާ ކަމަށް ފުލުހުން މިއަދު ބުނެފިއެވެ.
ބުޅާ މަސް އަޅައިގެން ކާނާ ތައްޔާރުކުރިކަމުގެ ތުހުމަތުގައި އަރަފާތު ހޯދައި، އިމިގްރޭޝަނާ ހަވާލުކުރީ އޮގަސްޓް 20 ގައެވެ.
އޭގެ ފަހުން ގިނަ ދުވަސްތަކެއްވެފައިވާއިރު، ފުލުހުން ބުނީ އޭނާ މިހާރު ޑީޕޯޓުކޮށްލާފައިވާ ކަމަށެވެ.
އެކަމަކު، ފުލުހުން ބުނި ގޮތުގައި އަރަފާތު ބުޅާ މަސް އަޅައިގެން ކާނާ ތައްޔާރުކުރިކަމުގެ އެއްވެސް ހެއްކެއް ފެނިފައެއް ނުވެއެވެ. އެހެންވެ، ޖިނާއީ ތަހުގީގެއް ހިންގޭ ވަރަށް ހެއްކާއި ގަރީނާ ލިބިފައިނުވާތީ، އެ މައްސަލައިގެ ތަހުގީގު ވަނީ ނިންމާލައިފައެވެ.
އަރަފާތު ބުޅާ މަރައި، ބުޅާ މަހުގައި ކާނާ ތައްޔާރުކޮށް، އެ ތަކެތި ވިއްކާ ކަމަށް ތުހުމަތުކުރީ އަމިއްލަ ޖަމިއްޔާއަކުންނެވެ.
ބުޅަލު މަހުގައި ކާނާ ތައްޔާރުކުރިކަމަށް ތުހުމަތުކުރެވުމުން ގިނަ ބަޔަކު ވަރަށް ބޮޑަށް ނުރުހުން ފާޅުކުރިއެވެ.
އެ މައްސަލައިގައި ކަންބޮޑުވުން ބޮޑުވެފައި އޮއްވައި އަރަފާތުގެ މައްސަލަ ފުލުހަށް ހުށަހެޅީ އެނިމަލް ވެލްފެއާ މިނިސްޓްރީންނެވެ.
ބުޅަލު މަހުގައި ކާނާ ތައްޔާރުކުރިކަމުގެ އެއްވެސް ހެއްކެއް ފެނިފައިނުވި ނަމަވެސް، އޭނާ ކާނާ ތައްޔާރުކުރަމުން ދިޔަ މުޑުދާރު ބަދިގޭގެ ފޮޓޯތަކާއި ވީޑިއޯތައް މީސްމީޑިއާގައި ދައުރުވިއެވެ. އެ ތަނަކީ ކާނާ ތައްޔާރުކުރަން އެކަށިގެންވާ ސާފުތާހިރު ތަނެއް ނޫނެވެ.
ރާއްޖޭގައި ގަވައިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، ސާފުތާހިރުކަން ކުޑަ ތަންތަނުގައި ކާބޯތަކެތި ތައްޔާރުކޮށް ވިއްކާ ގިނަ އަދަދެއްގެ ބިދޭސީން މިހާތަނަށް އަތުލައިގެންފައިވެއެވެ.